ރޭ ދަންވަރުން ފެށިގެން ބޯކޮށް ވާރޭވެހި ގދ. ފިޔޯރީގެ 90 އިންސައްތަ ގެއަށް ފެންވަދެއްޖެ
ގދ. ފިޔޯރީއަށް ރޭ ދަންވަރުން ފެށިގެން މެދުނުކެނޑި ބޯކޮށް ވާރޭވެހި، އެ ރަށުގެ އާންމު ދިރިއުޅޭ ގޭގެތަކުގެ 90 އިންސައްތައަށް ފެން ވަދެ ބޮޑެތި އުނދަގޫތަކަކާ ކުރިމަތިލާންޖެހިއްޖެއެވެ.
ނެޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އިން މަޢުލޫމާތު ދެއްވާގޮތުގައި ރޭ ދަންވަރު 1:30 ހާއިރު ފެށުނު މި ވިއްސާރައިގައި ރަށުގެ ގިނަ ގޭގެއަށް ފެން ވަދެފައިވީ ނަމަވެސް، އެއްވެސް ގެއަކުން މީހުން ހުސްކުރަންޖެހޭ ފަދަ ނުރައްކާތެރި ހާލަތެއް އަދި ދިމައެއް ނުވެއެވެ.
ރަށުގައި ބޮޑުވެފައިވާ ފެން ހިންދުމުގެ މަސައްކަތް ފިޔޯރީ ކައުންސިލުން އިސްނަގައިގެން ކުރިއަށްގެންދާއިރު، އެންޑީއެމްއޭއިން އަންނަނީ ކައުންސިލާ ގުޅިގެން ރަށުގެ ހާލަތު ވަރަށް ގާތުން ބަލައި، އެހީތެރިކަން ބޭނުންވާ ފަރާތްތަކަށް އެހީތެރިކަން ފޯރުކޮށްދިނުމުގެ ކަންކަން ހަމަޖައްސަމުންނެވެ.
Ads by BMLފިޔޯރީ ކައުންސިލްގެ ރައީސް އަބްދުﷲ މުބާހު ވިދާޅުވީ، ރަށުގެ ހާލަތު ރަނގަޅުކުރުމަށް މަސައްކަތްކުރަމުންދާއިރު އަދިވެސް މެދުނުކެނޑި ރަށަށް ވާރޭވެހެމުންދާ ކަމަށެވެ.
މޫސުމާ ބެހޭ ގައުމީ އިދާރާއިން ވަނީ މިއަދު މެންދުރުފަހު 1:30 އިން ފެށިގެން ގއ. އަތޮޅާއި ގދ. އަތޮޅާ ދެމެދުގެ ސަރަހައްދުތަކަށް ޔެލޯ އެލާޓް ނެރެފައެވެ.
މިދިޔަ ހަފުތާއިން ފެށިގެން ރާއްޖޭގެ އެކި ހިސާބުތަކަށް ހުޅަނގު މޫސުމުގެ ވިއްސާރަ ކުރަމުންދާއިރު، ވައި މަޑުވެ ކަނޑުތައް އާދައިގެ ވަރަކަށް މަޑުވި ނަމަވެސް، ވިލާގަނޑުގައި ވައިގަދަވުން އެކަށީގެންވާ ކަމަށް މެޓް އޮފީހުން ވަނީ ލަފާކޮށްފައެވެ.
Ads by MACL
