ބުދަ، 18 ނޮވެމްބަރު 2026
ޚަބަރު

ބޯކޮށް ވާރޭވެހި މާލޭގެ ބޮޑުބައެއްގައި ފެންބޮޑުވެއްޖެ

މާލޭގެ މަގެއްގައި ފެންބޮޑުވެފައި --- ފޮޓޯ: ސޯޝަލް މީޑިއާ
މާލޭގެ މަގެއްގައި ފެންބޮޑުވެފައި --- ފޮޓޯ: ސޯޝަލް މީޑިއާ

މުޅި މާލެއަށް ހުއްޓާނުލައި ބޯކޮށް ވާރޭވެހި މާލޭގެ ބޮޑުބައެއްގައި ފެންބޮޑުވުމާ ގުޅިގެން، މަގުތަކުން ފެން ހިންދުމުގެ ކުއްލި އޮޕަރޭޝަނެއް އެމްއެންޑީއެފުން ފަށައިފިއެވެ.

ވިއްސާރައިގެ ސަބަބުން މާލޭގެ ބޮޑެތި މަގުތަކުގައި ފެންބޮޑުވެ، އާންމު ދަތުރުފަތުރަށާއި ހިނގާބިނގާވެ އުޅުމަށް ބޮޑެތި ދަތިތަކެއް ދަނީ ކުރިމަތިވަމުންނެވެ.

ގައުމީ މޫސުމާ ބެހޭ އިދާރާ (މެޓް) އިން ހާމަކުރެއްވި ގޮތުގައި، ރާއްޖެ ސަރަހައްދުގައި ހުޅަނގު މޫސުމުގެ ބާރު ގަދަވެ، އަރަބި ކަނޑާއި ބޭ އޮފް ބެންގާލްގައި އުފެދިފައިވާ ކޮޅިގަނޑުތަކުގެ ސަބަބުން ބޯ ވިއްސާރަ ވިލާތައް ދަނީ އަތޮޅުތަކުގެ މައްޗަށް ފެތުރެމުންނެވެ.

ކުރިއަށް އޮތް 24 ގަޑިއިރުގެ ތެރޭގައިވެސް އެކި ހިސާބުތަކަށް ބޯކޮށް ވާރޭވެހޭނެ ކަމަށް ބެލެވޭތީ، މާލެ ސަރަހައްދު ހިމެނޭހެން ރާއްޖޭގެ ބޮޑު ބަޔަކަށް މެޓް އޮފީހުން ވަނީ ރީނދޫ ސަމާލު ނެރެފައެވެ.

މަގުތަކުގައި ފެންބޮޑުވެފައިވާ ސަރަހައްދުތަކުން ފެން ހިންދުމަށްޓަކައި އެމްއެންޑީއެފް ފަޔަރ އެންޑް ރެސްކިއު ސާވިސްގެ ސިފައިން ޕަންޕު ބޭނުންކޮށްގެން އަމަލީ ގޮތުން ހަރަކާތްތެރިވަމުންދާއިރު، އާންމުންގެ މުދަލަށް ލިބިދާނެ ގެއްލުމަކުން ރައްކާތެރިވުމަށް ސަމާލުވުމަށް ކަމާބެހޭ އިދާރާތަކުން ވަނީ އިލްތިމާސްކޮށްފައެވެ.