ކީރިތި ރަސޫލާގެ ޙަދީޘްފުޅެއް ޢަރަބިބަހުން ވިދާޅުވެ، ރަސްގެފާނު ޗާލްސް ބައިނަލްއަޤުވާމީ ސަމާލުކަން ހޯއްދަވައިފި
އިނގިރޭސިވިލާތަށް ކުރެއްވި ރަސްމީ ދަތުރުފުޅެއްގައި އޮމާންގެ ސުލްޠާން ހައިޘަމް ބިން ޠާރިޤަށް މަރުޙަބާ ދެންނެވުމަށް ވިންޑްސަރ ކާސްލްގައި ބޭއްވި ދައުލަތުގެ ރަސްމީ ޖާފަތެއްގައި، އިނގިރޭސިވިލާތުގެ ރަސްގެފާނު ޗާލްސް ތިންވަނަ ކީރިތި ރަސޫލާ (ޞައްލަﷲ ޢަލައިހި ވަސައްލަމަ) ގެ ޙަދީޘްފުޅެއް ޢަރަބިބަހުން ވިދާޅުވުމާ ގުޅިގެން ބައިނަލްއަޤުވާމީ މީޑިއާތަކުގެ ސަމާލުކަން އެކަމަށް ހުއްޓިއްޖެއެވެ.
ފުރިހަމަ ނަންފުޅަކީ ޗާލްސް ފިލިޕް އާތަރ ޖޯޖް ކަމުގައިވާ ރަސްގެފާނު ޗާލްސް ތިންވަނައަކީ އިނގިރޭސިވިލާތުގެ (ޔުނައިޓެޑް ކިންގްޑަމް) އިތުރުން ކޮމަންވެލްތުގެ އެހެން 14 ޤައުމެއްގެ ރަސްކަލުންނެވެ. 14 ނޮވެމްބަރު 1948 ގައި އުފަންވެވަޑައިގަތް ޗާލްސްއަކީ މަލިކާ އެލިޒަބެތު ދެވަނައާއި ޕްރިންސް ފިލިޕްގެ އެންމެ ދޮށީ ދަރިކަލުންނެވެ. އޭނާ ރަސްކަމުގެ ތަޚުތާ ހަވާލުވެވަޑައިގަތީ 8 ސެޕްޓެމްބަރު 2022 ގައި، މަންމާފުޅު އަވަހާރަވުމާ ގުޅިގެންނެވެ. ރަސްކަމަށް ވަޑައިގަތުމުގެ ކުރިން "ޕްރިންސް އޮފް ވޭލްސް" ގެ ލަޤަބު ފުރެއްވި ޗާލްސްއަކީ އިނގިރޭސި ތާރީޚުގައި ޔުނިވަރސިޓީ ޑިގްރީއެއް ހާސިލްކުރެއްވި ފުރަތަމަ ރަސްކަލުންނެވެ. އާއިލީ ދިރިއުޅުއްވުމަށް ބަލާއިރު، ޕްރިންސަސް ޑަޔާނާއާއެކު ކުރެއްވި ފުރަތަމަ ކައިވެންޏަށް ދެ ބޭފުޅުން (ޕްރިންސް ވިލިއަމް އަދި ޕްރިންސް ހެރީ) ލިބިވަޑައިގަތްއިރު، މިހާރު ކައިވެނިބައްލަވައިގެން އުޅުއްވަނީ މަލިކާ ކެމީލާއާއެވެ.
🔗 ތަފްޞީލް ކިޔުމަށް: [ލިންކް]
Ads by BMLhttps://twitter.com/MurtazaViews/status/2113037728132616513
ސުލްޠާން ހައިޘަމް އިނގިރޭސިވިލާތަށް ކުރެއްވި މި ދަތުރުފުޅަކީ 1982 ވަނަ އަހަރުގެ ފަހުން އޮމާންގެ ސުލްޠާނަކު އިނގިރޭސިވިލާތަށް ކުރެއްވި ފުރަތަމަ ދައުލަތުގެ ރަސްމީ ދަތުރުފުޅެވެ. މި ޖާފަތުގައި ވާހަކަފުޅު ދައްކަވަމުން ރަސްގެފާނު ޗާލްސް ވަނީ މެދުއިރުމަތީގެ ޞުލްޙަ މަސަލަސްކަމާއި ހަމަޖެހުން ޤާއިމްކުރުމަށް އޮމާނުން ކުރަމުންދާ ޚާރިޖީ މަސައްކަތްތަކަށް ވަރަށް ބޮޑަށް ތަޢުރީފު ކުރައްވާފައެވެ. ޚާއްޞަކޮށް، ދެބަސްވުންތައް ޙައްލުކުރުމުގައި ތަފާތު އެކި ފަރާތްތަކާއެކު މަޝްވަރާގެ މަގު އިޚްތިޔާރުކުރުމަށް އޮމާނުން ގެންގުޅޭ ސިޔާސަތު ފާހަގަކުރެއްވިއެވެ. މީގެ އިތުރުން، ބައިނަލްއަޤުވާމީ ވިޔަފާރިއާއި ދަތުރުފަތުރަށް މުހިންމު ސަރަޙައްދެއް ކަމަށްވާ ހޯރްމުޒް ކަނޑުއޮޅި ކަނޑުގެ ދަތުރުފަތުރަށް ހުޅުވާފައި ބޭއްވުމަށް އޮމާނުން ކޮށްފައިވާ ބުރަ މަސައްކަތްތައް ރަސްގެފާނު ޗާލްސް ޝުކުރުވެރިކަމާއެކު ބަލައިގަންނަވާފައިވެއެވެ.
މި ޖާފަތުގައި އެންމެންގެ ސަމާލުކަން ދަމައިގަތީ، ރަސްގެފާނު ޗާލްސް ޞަޙީޙު މުސްލިމްގެ 2544 ވަނަ ޙަދީޘްފުޅުން ނަންގަވައިގެން ޢަރަބިބަހުން ވިދާޅުވި ބަސްފުޅެވެ. ރަސްގެފާނު ވިދާޅުވީ: "لَوْ أَنَّ أَهْلَ عُمَانَ أَتَيْتَ مَا سَبُّوكَ وَلَا ضَرَبُوكَ" މާނައީ: "ތިބާ އޮމާންގެ އަހުލުވެރިންގެ ގާތަށް ދިޔަނަމަ، އެއުރެން ތިބާއަށް ހުތުރުބަހުން އެއްޗެހި ނުކީހެވެ. އަދި ތިބާގެ ގައިގާ ނުވެސް ތެޅީހެވެ."
ރަސްގެފާނުގެ ޚިޠާބުގައި ޢަރަބިބަހުން ޙަދީޘްފުޅު ވިދާޅުވި މި ޚާއްޞަ ދަނޑިވަޅަކީ، އިސްލާމީ ދުނިޔެއާއި ހުޅަނގުގެ ގުޅުން ބަދަހިކުރުމަށާއި، ދެ ޤައުމުގެ ދެމެދުގައި އޮތް ތާރީޚީ އަދި ސަގާފީ ގުޅުން އިތުރަށް ހާމަކޮށްދިން ކަމެއްގެ ގޮތުގައި ބައިނަލްއަޤުވާމީ ދިރާސާކުރައްވާ ފަރާތްތަކުން ސިފަކުރެއެވެ.
Ads by MACL
