ޑރ. މުޙައްމަދު މުޢިއްޒު، ޕާކިސްތާނުގެ ގައުމީ މަޖިލީހުގެ ސަރުދާރު އަޔާޒް ޞާދިޤާ ބައްދަލުކުރައްވައިފި
ދިވެހިރާއްޖޭގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ޕާކިސްތާނުގެ ގައުމީ މަޖިލީހުގެ ސްޕީކަރު ސަރުދާރު އަޔާޒް ޞާދިޤާ ބައްދަލުކުރައްވައި، ދެ ގައުމުގެ ދެމެދުގައި އޮތް ބަރުލަމާނީ އަދި އިގްތިސާދީ ގުޅުންތައް އިތުރަށް ބަދަހިކުރުމާ ބެހޭގޮތުން ފުޅާ ދާއިރާއެއްގައި މަޝްވަރާ ކުރައްވައިފިއެވެ.
ރައީސުލްޖުމްހޫރިއްޔާ ޕާކިސްތާނަށް ކުރައްވަމުންދާ ރަސްމީ ދަތުރުފުޅުގެ ތެރެއިން ބޭއްވެވި މި ބައްދަލުކުރެއްވުމުގައި، ގައުމީ މަޖިލީހުގެ ސްޕީކަރު ވަނީ ރައީސް ޑރ. މުޢިއްޒުގެ މި ދަތުރުފުޅަށް ވަރަށް ހޫނު މަރުޙަބާއެއް ދަންނަވާފައެވެ. މި ބައްދަލުވުމުގައި ދެ ބޭފުޅުން ވަނީ ދެ ގައުމުގެ ދެމެދުގައިވާ ދޭދޭ ގުޅުންތަކުގެ އިތުރުން، ސަރަހައްދީ އަދި ބައިނަލްއަގުވާމީ މުހިންމު ކަންތައްތަކާ ބެހޭގޮތުން ޚިޔާލު ބަދަލުކުރައްވާފައެވެ.
ބައްދަލުވުމުގައި ވާހަކަދައްކަވަމުން ސްޕީކަރު ސަރުދާރު އަޔާޒް ޞާދިޤް ވިދާޅުވީ، ޕާކިސްތާނުން ދިވެހިރާއްޖެއާއެކު އޮންނަ ޒަމާންވީ އަދި ގާތް ގުޅުމަށް ވަރަށް ބޮޑު އަހައްމިއްޔަތެއް ދޭ ކަމަށެވެ. އަދި ދެ ގައުމުގެ ދެމެދުގައި ވިޔަފާރީގެ މުާމަލާތްތައް އިތުރުކުރުމަށް ވެވުނު އެއްބަސްވުންތަކަށް މަރުޙަބާ ވިދާޅުވަމުން، ރައީސްގެ މި ދަތުރުފުޅަކީ ގުޅުންތައް ކުރިއެރުވުމަށް އެޅުނު މުހިންމު ފިޔަވަޅެއްގެ ގޮތުގައި ސްޕީކަރު ސިފަކުރެއްވިއެވެ. މީގެއިތުރުން، ދެ ގައުމުގެ ބަރުލަމާނީ ގުޅުން ކުރިއެރުވުމުގައި "ޕާކް-މޯލްޑިވްސް ޕާލިމެންޓަރީ ފްރެންޑްޝިޕް ގްރޫޕް" އިން ހަރަކާތްތެރި ދައުރެއް އަދާކުރަމުންދާކަން ފާހަގަކުރައްވައި، ސަރަހައްދީ ގައުމުތަކުގެ ގުޅުން ބަދަހިކުރުމުގައި ބަރުލަމާނީ ޚާރިޖިއްޔާ (ޕާލިމެންޓަރީ ޑިޕްލޮމެސީ) އަށް ބޮޑު ދައުރެއް އަދާކުރެވޭނެ ކަމަށްވެސް ސްޕީކަރު ވިދާޅުވިއެވެ.
Ads by BMLމި ބައްދަލުކުރެއްވުމުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްކެވި ވާހަކަފުޅުގައި، ޕާކިސްތާނާއެކު އޮތް ގުޅުން އިތުރަށް ބަދަހިކުރެއްވުމަށް ރާއްޖެއިން އަބަދުވެސް މަސައްކަތް ކުރާނެ ކަމުގެ ޔަގީންކަން ދެއްވިއެވެ. އަދި ދިވެހިރާއްޖޭގެ ރައްޔިތުންނާއި ޕާކިސްތާނުގެ ރައްޔިތުންގެ ދެމެދުގައި އޮންނަނީ ފުން އަދި ތާރީޚީ ގުޅުމެއްކަން އެމަނިކުފާނު ފާހަގަކުރެއްވިއެވެ. ރައީސްގެ ވާހަކަފުޅުގައި، ސަރަހައްދީ ސުލްހަ މަސަލަސްކަން ގާއިމުކުރުމުގައި ޕާކިސްތާނުން އަދާކުރާ މުހިންމު ދައުރަށް ތައުރީފު ކުރައްވައި، އެމަނިކުފާނަށާއި ދިވެހި ވަފުދަށް ޕާކިސްތާނު ސަރުކާރާއި ރައްޔިތުންގެ ފަރާތުން ކީ ހޫނު މަރުޙަބާ އާއި ބެހެއްޓެވި މެހެމާންދާރީއަށްޓަކައި ޚާއްޞަ ޝުކުރެއް އަދާކުރެއްވިއެވެ.
މި މުހިންމު ބައްދަލުކުރެއްވުމުގައި ދެ ގައުމުގެ އިސްބޭފުޅުންގެ އިތުރުން، ޕާކިސްތާނުގެ ގައުމީ މަޖިލީހުގެ މެންބަރުން ކަމަށްވާ ޝާޒިއާ ތައުހީދު، ޝާއިސްތާ ޚާން އަދި ސަންޖީވް ޕްރަބާކަރް ވެސް ބައިވެރިވެވަޑައިގެންނެވިއެވެ.
Ads by MACL
