ބުދަ، 18 ނޮވެމްބަރު 2026
ޚަބަރު

ރާއްޖެއަކީ އިންވެސްޓްމަންޓުގެ ގިނަ ފުރުސަތުތަކެއް ހުރި ޤައުމެއް: ރައީސް

ރާއްޖެއަކީ އިންވެސްޓްމަންޓުގެ ގިނަ ފުރުސަތުތަކެއް ހުރި ޤައުމެއް: ރައީސް

ދިވެހިރާއްޖެއަކީ ބޭރުގެ އިންވެސްޓަރުންނަށް ފަހި އަދި ފުޅާ ދާއިރާއެއްގައި އިންވެސްޓްކުރުމުގެ ގިނަ ފުރުޞަތުތަކެއް ހުރި ޤައުމެއްކަމަށް ރައީސް ވިދާޅުވެއްޖެއެވެ.

ޕާކިސްތާނުގައި ބޭއްވި ރާއްޖެ - ޕާކިސްތާނު ބިޒްނަސް ފޯރަމް އިފްތިތާޙުކުރުމުގެ ރަސްމިއްޔާތުގައި ވާހަކަފުޅު ދައްކަވަމުން، ދިވެހިރާއްޖެއަކީ ބޭރުގެ އިންވެސްޓަރުންނަށް ފަހި އަދި ފުޅާ ދާއިރާއެއްގައި އިންވެސްޓްކުރުމުގެ ގިނަ ފުރުޞަތުތަކެއް ހުރި ޤައުމެއްކަން ހާމަކުރައްވައި، އެ ފުރުޞަތުތަކުގެ ބޭނުން ހިފުމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ޕާކިސްތާނުގެ ވިޔަފާރިވެރިންނަށް އިލްތިމާސްކުރައްވައިފިއެވެ.

އެމަނިކުފާނު ވިދާޅުވީ ދެ ޤައުމުގެ ދެމެދުގައި އޮތް އިޤްތިޞާދީ ގުޅުން އިތުރަށް ވަރުގަދަކޮށް، ކުރިއަށް އޮތް ދެ އަހަރުގެ ތެރޭގައި ވިޔަފާރީގެ މުއާމަލާތްތައް 200 މިލިއަން އެމެރިކާ ޑޮލަރަށް އިތުރުކުރުމަކީ މުހިންމު އަމާޒެއް ކަމަށެވެ.

ރާއްޖޭގެ ދާއިމީ އާބާދީއަކީ އެކުއެކީގައި ފަސް ލައްކައެއްހާ މީހުން ކަމުގައި ވީނަމަވެސް، އަހަރަކު ދެ މިލިއަނަށްވުރެ ގިނަ ފަތުރުވެރިން ޒިޔާރަތްކުރާ ބޮޑު މާކެޓެއް ރާއްޖޭގައި އޮތްކަން ރައީސް ފާހަގަކުރެއްވިއެވެ. އެގޮތުން ފަތުރުވެރިކަމުގެ އިތުރުން ސިނާއީ މަސައްކަތްތަކާއި، އިމާރާތްކުރުމުގެ ދާއިރާއާއި، ތަޢުލީމީ އަދި ޞިއްޙީ ދާއިރާއަކީ އިންވެސްޓަރުންނަށް ބޮޑެތި ފުރުޞަތުތަކެއް ހުޅުވިފައިވާ މުހިންމު ދާއިރާތަކެއްގެ ގޮތުގައި އެމަނިކުފާނު ސިފަކުރެއްވިއެވެ.

ޞިއްޙީ ޚިދުމަތްތައް ތަރައްޤީކުރުމަށްޓަކައި ރާއްޖޭގެ އެކި ސަރަޙައްދުތަކުގައި ޓާޝަރީ ހޮސްޕިޓަލްތަކާއި އަތޮޅު ފެންވަރުގެ ވަޞީލަތްތައް ޤާއިމުކުރުމުގެ ބޮޑެތި މަޝްރޫޢުތައް ކުރިއަށްދާއިރު، ފެންވަރު ރަނގަޅު ބޭހާއި މެޑިކަލް ސާމާނު ސަޕްލައިކުރުމުގައި ޕާކިސްތާނުގެ ކުންފުނިތަކަށް ފުޅާ ދާއިރާއެއްގައި ބައިވެރިވެވޭނެ ކަމަށް ރައީސް ވިދާޅުވިއެވެ. މީގެއިތުރުން ކާނާގެ ރައްކާތެރިކަން ކަށަވަރުކުރުމަށްޓަކައި، ޒަމާނީ ފުޑް ޕްރޮސެސިންގ އަދި މޫސުމީ ބަދަލުތަކަށް ނުގުރެވޭ ދަނޑުވެރިކަމުގެ ޓެކްނޮލޮޖީގެ ދާއިރާއިން ގުޅިގެން މަސައްކަތް ކުރުމަށްވެސް އެދިވަޑައިގެންނެވިއެވެ.

ޢުމްރާނީ ތަރައްޤީގެ ދާއިރާއިން ބޯހިޔާވަހިކަމާއި، ބިން ހިއްކުމާއި، ގުޅުވައިދިނުމުގެ ބޮޑެތި މަޝްރޫޢުތައް ރާއްޖޭގައި ހިނގަމުންދާތީ، ޕާކިސްތާނުގެ ކޮންސްޓްރަކްޝަން ކުންފުނިތަކާއި އިންޖިނިއަރިންގ ފާމްތަކުން އެ މަޝްރޫޢުތަކުގައި އިންވެސްޓްކުރުމަށް ރައީސް ދަޢުވަތު އަރުވައިފިއެވެ. އަދި ދެ ޤައުމުގެ ދެމެދުގައި ވިޔަފާރީގެ މުއާމަލާތްތައް އަވަސްކޮށް ފުޅާކުރުމަށްޓަކައި ޝިޕިންގ، ޕޯޓް އަދި ލޮޖިސްޓިކްސް ދާއިރާއިން ސީދާ ދަތުރުފަތުރުގެ ނިޒާމެއް ޤާއިމުކުރުމުގެ މުހިންމުކަންވެސް އެމަނިކުފާނު ފާހަގަކުރެއްވިއެވެ.

ރާއްޖެއާއި ޕާކިސްތާނާ ދެމެދު ޚާރިޖީ ގުޅުން ޤާއިމުކުރިތާ 60 އަހަރު ފުރިފައިވާއިރު، އެއްވެސް ހީނަރުކަމެއް ނެތި މި ގުޅުން ދެމިއޮތީ ދެ ޤައުމުގެ ދެމެދުގައި އޮތް އިތުބާރާއި ދާޚިލީ ޔަޤީންކަމުގެ ސަބަބުން ކަމަށް ރައީސް ވިދާޅުވިއެވެ. އަދި ކުރިއަށް އޮތް ތަނުގައިވެސް ދެ އިޤްތިޞާދު ގުޅިގެން ކުރިއަށްދިއުމުގެ ފުރިހަމަ ޔަޤީންކަން އޮތްކަން އެމަނިކުފާނު ފާހަގަކުރެއްވިއެވެ.