ރާއްޖެއާއި ޕާކިސްތާނާ ދެމެދު އިގްތިސާދީ އަދި ވިޔަފާރީގެ އެއްބަސްވުމެއްގައި ސޮއިކޮށްފި
ދިވެހިރާއްޖެއާއި ޕާކިސްތާނާ ދެމެދު އޮންނަ އިގްތިސާދީ ގުޅުންތައް އިތުރަށް ބަދަހިކުރުމުގެ ގޮތުން، ދެ ގައުމުގެ ދެމެދުގައި ވިޔަފާރީގެ ދާއިރާއިން އެއްބާރުލުން ދިނުމުގެ މުހިންމު އެއްބަސްވުމެއްގައި ސޮއިކޮށްފިއެވެ.
މި އެމްއޯޔޫގައި ސޮއިކޮށްފައިވަނީ މިހާރު ކުރިއަށްދާ 'މޯލްޑިވްސް–ޕާކިސްތާން ބިޒްނަސް އެންޑް އިންވެސްޓްމަންޓް ފޯރަމް 2026' ގެ ތެރެއިންނެވެ. މި އެއްބަސްވުމުގައި ދިވެހިރާއްޖޭގެ ފަރާތުން ސޮއިކުރެއްވީ މިނިސްޓްރީ އޮފް އިކޮނޮމިކް ޑިވެލޮޕްމަންޓް، ޓްރާންސްޕޯޓް އެންޑް ޓްރޭޑުންނެވެ. އަދި ޕާކިސްތާނުގެ ފަރާތުން ސޮއިކުރެއްވީ ފެޑެރޭޝަން އޮފް ޕާކިސްތާން ޗެމްބާސް އޮފް ކޮމާސް އެންޑް އިންޑަސްޓްރީ ގެ އިސް ބޭފުޅުންނެވެ.
މި އެއްބަސްވުމުގެ މައިގަނޑު މަގުސަދަކީ ދެ ގައުމުގެ ދެމެދުގައިވާ ބައިލެޓްރަލް (ދެފަރާތުގެ) ވިޔަފާރީގެ ގުޅުންތައް ކުރިއަރުވައި، އިގްތިސާދީ ގޮތުން ދެމެހެއްޓެނިވި ގުޅުމެއް ގާއިމުކުރުމެވެ. މީގެ އިތުރުން، ދެ ގައުމުގެ ވިޔަފާރިވެރިންނަށާއި އިންވެސްޓަރުންނަށް ހުރި ފުރުސަތުތައް ފުޅާކުރުމަށްޓަކައި ދެމެހެއްޓެނިވި ގޮތެއްގައި ގުޅިގެން މަސައްކަތްކުރުމުގެ މުހިންމުކަމުގެ މައްޗަށް މި ފޯރަމްގައި ވަނީ އަލިއަޅުވާލާފައެވެ.
Ads by BMLމި ފޯރަމަކީ ރާއްޖެއާއި ޕާކިސްތާނާ ދެމެދު ވިޔަފާރީގެ އައު ދޮރުތަކެއް ހުޅުވި، ދެ ގައުމުގެ އިގްތިސާދީ ބައިވެރިކަން އައު ހިސާބަކަށް ގެންދިއުމަށް އެޅުނު ވަރަށް ހަރުދަނާ ފިޔަވަޅެއްގެ ގޮތުގައި މިނިސްޓްރީން ފާހަގަކުރެއެވެ.
Ads by MACL
