އީރާނުގެ ވެރިކަން ވައްޓާލަން ނަތަންޔާހޫގެ ވައުދެއް: ހަގީގަތަކަށް ހެދިދާނެތަ؟
އިސްރާއީލުގައި އަންނަ ހަފުތާގައި ބޭއްވުމަށް ހަމަޖެހިފައިވާ ގައުމީ އިންތިޚާބާ ދިމާކޮށް، ބޮޑުވަޒީރު ބެންޖަމިން ނަތަންޔާހޫއަށް އޮތް ސިޔާސީ ތާއީދު ދަށަށް ދަމުންދާ ދަނޑިވަޅެއްގައި، އީރާނުގެ މިހާރުގެ ސަރުކާރު ވައްޓާލުމަކީ އިސްރާއީލުގެ "އެންމެ އިސް އަމާޒު" ކަމަށް އޭނާ އިއުލާނު ކުރައްވައިފިއެވެ.
ނަތަންޔާހޫ މިހެން ވިދާޅުވީ އެމެރިކާގެ ރައީސް ޑޮނަލްޑް ޓްރަމްޕްއާ ފޯނުން ވާހަކަދެއްކެވުމަށްފަހު، އަދި އެމެރިކާގެ ޕެންޓަގަންގެ ވެރިޔާ ޕީޓް ހެގްސެތު އިސްރާއީލަށް ކުރެއްވި ޒިޔާރަތަކަށް ފަހުއެވެ. ނަމަވެސް، އީރާނުގެ ވެރިކަން ބަދަލުކުރުމުގެ އަސްކަރީ ކެމްޕޭނެއްގައި އެމެރިކާއިން އަމަލީ ގޮތުން ބައިވެރިވާނެ ކަމުގެ އެއްވެސް ޔަގީންކަމެއް ވޮޝިންގޓަނުން ދީފައިވާ ކަމުގެ އިޝާރާތެއް ނަތަންޔާހޫ ކުރައްވާފައެއް ނުވެއެވެ.
އަސްކަރީ ތަޖުރިބާކާރުންގެ ރައުޔު
Ads by BMLބައިނަލްއަގުވާމީ އަސްކަރީ މުހައްލިލުންނާއި ސިޔާސީ ތަޖުރިބާކާރުން ބުނާ ގޮތުގައި، އިސްރާއީލަށް އީރާނުގެ އަސްކަރީ އަމާޒުތަކަށް ބޮޑެތި ގެއްލުންތަކެއް ދިނުމުގެ ހަތިޔާރާއި ވައިގެ ބާރު ލިބިގެންވީ ނަމަވެސް، ހަމައެކަނި ވައިގެ ހަމަލާތަކުން ގައުމެއްގެ ވެރިކަން ވައްޓައެއް ނުލެވޭނެއެވެ.
ރޯޔަލް ޔުނައިޓެޑް ސަރވިސަސް އިންސްޓިޓިއުޓް ގެ ރިސާޗް ފެލޯ، އާބަން ކޮނިންގހަމް ފާހަގަކުރެއްވި ގޮތުގައި، އީރާނުގެ ބިމުގެ އަޑީގައި ފޮރުވާފައިވާ ނިއުކްލިއަރ މަރުކަޒުތައް ހަލާކުކޮށްލެވޭނީ އެމެރިކާގެ ބޭނުންކުރާ 30،000 ޕައުންޑުގެ ބަންކަރ-ބަސްޓިންގ ބޮން ފަދަ ވަސީލަތްތައް ލިބިގެންނެވެ. އެމެރިކާގެ އެހީތެރިކަމެއް ނެތި އިސްރާއީލުން އެކަނި ދޭ ހަމަލާއަކުން ސަރުކާރު ބަދަލުކުރުމުގެ ސިޔާސީ އަމާޒު ހާސިލެއް ނުކުރެވޭނެއެވެ.
ތުރުކީގެ އަބްދުﷲ ގުލް ޔުނިވަރސިޓީގެ އެސިސްޓެންޓް ޕްރޮފެސަރ ކަގްލަރ ކުރްކް ވިދާޅުވި ގޮތުގައި، އީރާނުގެ ވެރިކަން ވައްޓާލަން ބޭނުންނަމަ އެއްގަމު ސިފައިން ފޮނުވައިގެން ގިނަ އަހަރުތަކެއް ވަންދެން އެގައުމު ހިސާރުކުރަން ޖެހޭނެއެވެ. ނަމަވެސް އެފަދަ ބޮޑު ހަނގުރާމައެއްގެ ތެރެއަށް ވަނުމުގެ ޝައުގުވެރިކަމެއް އެމެރިކާއަކަށްވެސް އަދި އިސްރާއީލަކަށްވެސް ނެތެވެ. ޖާސޫސީ އަދި ސައިބަރ ހަމަލާތަކަކީވެސް ސަރުކާރު ވައްޓާލެވޭނެ މައިގަނޑު ވަސީލަތްތަކެއް ނޫންކަން މުހައްލިލުން ފާހަގަކުރެއެވެ.
އީރާނުގެ ބަދަލުހިފުމުގެ ގާބިލުކަން
މުހައްލިލުން އިތުރަށް ބުނާ ގޮތުގައި އީރާނުން ވަނީ ކުރިން ދެވުނު ދެ ބުރުގެ ހަމަލާއިން ސަލާމަތްވެ، އެގައުމުގެ މިސައިލް އަދި އަގުހެޔޮ ޑްރޯންގެ ރިޒާވް ވަރުގަދަކޮށްފައެވެ. އިސްރާއީލުން އަގުބޮޑު ދިފާއީ މިސައިލް ބޭނުންކޮށްގެން އީރާނުގެ އަގުހެޔޮ ޑްރޯންތައް ހުއްޓުވަން ޖެހުމަކީ އިސްރާއީލުގެ އިގްތިސާދަށާއި ހަތިޔާރުގެ ރިޒާވަށް އޮތް ބޮޑު ގޮންޖެހުމެކެވެ. އީރާނުގެ ދިފާއީ އަދި ހަމަލާދޭ ނިޒާމުތައް ފަރުބަދަތަކުގެ އަޑީގައި ރަނގަޅަށް ފޮރުވާފައި ހުރުމުން، ވައިގެ މަގުން އެތަންތަން މުޅިން ނައްތާލުމަކީ ނާދިރު ކަމެކެވެ.
ހަމައެއާއެކު، ކުރިއަށް އޮތް އެމެރިކާގެ މިޑްޓާރމް އިންތިޚާބާ ދިމާކޮށް، މެދުއިރުމަތީގައި އިތުރު ހަނގުރާމައެއް ފެށުމަށް ރައީސް ޑޮނަލްޑް ޓްރަމްޕް ބޭނުންފުޅުނުވާތީ، އިސްރާއީލުން ހުށަހެޅި އާ ހަމަލާގެ ޕްލޭނަށް އެމެރިކާއިން ހުއްދަ ދީފައިނުވާ ކަމަށް ބައިނަލްއަގުވާމީ މީޑިއާތަކުން ރިޕޯޓްކުރެއެވެ. އެހެންކަމުން، ނަތަންޔާހޫގެ މި ވައުދަކީ އިންތިޚާބާ ދިމާކޮށް ސިޔާސީ މަންފާއެއް ހޯދުމަށް ވެފައިވާ ވައުދެއް ކަމަށް ބެލުމުގެ ފުރުސަތު ބޮޑެވެ.
Ads by MACL
