ބުދަ، 18 ނޮވެމްބަރު 2026
ޚަބަރު

5 މިލިއަން ގަސް އިންދުމުގެ މަޝްރޫޢު: މިހާތަނަށް 2.46 މިލިއަން ގަސް އިންދައިފި

މިލިއަން ގަސް އިންދުމުގެ މަޝްރޫޢުގެ ދަށުން / ފޮޓޯ: މޫސުމީ ބަދަލުތަކާއި ތިމާވެއްޓާއި ހަކަތައާބެހޭ ވުޒާރާ
މިލިއަން ގަސް އިންދުމުގެ މަޝްރޫޢުގެ ދަށުން / ފޮޓޯ: މޫސުމީ ބަދަލުތަކާއި ތިމާވެއްޓާއި ހަކަތައާބެހޭ ވުޒާރާ

ދިވެހިރާއްޖެއިން ނެތެމުންދާ ގަސްތައް އަލުން އާލާކުރުމަށާއި، ރަށްތަކުގެ ފެހިކަން އިތުރުކުރުމަށް ސަރުކާރުން ފައްޓަވާފައިވާ "5 މިލިއަން ގަސް އިންދުމުގެ" ބޮޑު މަޝްރޫޢުގެ ދަށުން، މިހާތަނަށް 2.46 މިލިއަނަށްވުރެ ގަސް އިންދައިފިއެވެ.

މޫސުމީ ބަދަލުތަކާއި ތިމާވެއްޓާއި ހަކަތައާބެހޭ ވުޒާރާއިން އާންމުކޮށްފައިވާ އެންމެ ފަހުގެ ތަފާސްހިސާބުތަކަށް ބަލާއިރު، މި ޕްރޮގްރާމްގެ ދަށުން މުޅި ޖުމްލަ 2,463,339 (ދެ މިލިއަން ހަތަރު ލައްކަ ފަސްދޮޅަސް ތިން ހާސް ތިންސަތޭކަ ތިރީސް ނުވަ) ގަސް ވަނީ އިންދާފައެވެ. ސަރުކާރުގެ މި އަމާޒަށް ވާސިލުވުމަށްޓަކައި އަދި އިތުރަށް ގާތްގަނޑަކަށް 2.54 މިލިއަން ގަސް އިންދަން ޖެހެއެވެ. މިއީ މިހާތަނަށް އެކި ފަރާތްތަކުން އިންދަން ވައުދުވެފައިވާ ޖުމްލަ އަދަދުގެ ގާތްގަނޑަކަށް 39 އިންސައްތައެވެ.

އެންމެ ގިނަ ގަސް އިންދީ ރިސޯޓުތަކުން
މި މަޝްރޫޢުގައި މިހާތަނަށް އެންމެ ބޮޑު ޙިއްޞާއެއްވެފައިވަނީ ފަތުރުވެރިކަމުގެ ދާއިރާއިންނެވެ. އެގޮތުން ރިސޯޓުތަކުން އެކަނިވެސް 1,222,991 ގަސް އިންދާފައިވެއެވެ. މީގެ ތެރެއިން އެންމެ ކުރީގައި އުޅެނީ 881,223 ގަސް އިންދާފައިވާ ރޯޒްވުޑް ރިސޯޓެވެ. އެ ރިސޯޓަކީ 1,478,244 ގަސް އިންދުމަށް ވައުދުވެ، ލިސްޓުގެ އެންމެ ކުރީގައި އޮތް ފަރާތްވެސް މެއެވެ.

ކައުންސިލްތަކާއި ކުންފުނިތަކުގެ ދައުރު
ރަށްރަށާއި ސިޓީ ކައުންސިލްތަކުން ޖުމްލަ 566,555 ގަސް އިންދާފައިވާއިރު، ވަކިވަކި ކައުންސިލްތަކަށް ބަލާއިރު އެންމެ ގިނަ ގަސް އިންދައިގެން ރެކޯޑު ހަދާފައިވަނީ ކ. ކާށިދޫ ކައުންސިލުންނެވެ. އެ ކައުންސިލުން ވަނީ 30,000 ގަސް އިންދާފައެވެ.

ސަރުކާރު ހިއްސާވާ ކުންފުނިތަކަށް ބަލާއިރު، ޖުމްލަ 414,911 ގަސް އިންދާފައިވެއެވެ. މީގެ ތެރެއިން އެންމެ ގިނަ ގަސް އިންދީ ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިންނެވެ. އެއީ 210,270 ގަހެވެ. މީގެ އިތުރުން ސްޓެލްކޯއިން 129,902 ގަސް އަދި އެމްއޭސީއެލްއިން 40,878 ގަސް ވަނީ އިންދާފައެވެ. ވައުދުތަކަށް ބަލާއިރު އެޗްޑީސީ އާއި އެމްޕީއެލްއިން ކޮންމެ ކުންފުންޏަކުން 1 މިލިއަން ގަސް އިންދުމަށް ވަނީ އެއްބަސްވެފައެވެ.

އެހެނިހެން ދާއިރާތަކުގެ ކުރިއެރުން
• ސްކޫލްތައް: 189,965 ގަސް.
• އަމިއްލަ ވިޔަފާރިތަކާއި ޖަމްޢިއްޔާތައް: ޖުމްލަ 42,349 ގަސް (މީގެ ތެރޭގައި އެސްޑީއެމް ފާމުން 30,000 ގަސް، ކްލީން މޯލްޑިވްސްއިން 9,750 ގަސް، އަދި އުރީދޫ މޯލްޑިވްސްއިން 2,569 ގަސް ހިމެނެއެވެ).
• ވުޒާރާތަކާއި އެމްބަސީތައް: 25,973 ގަސް.
މަޝްރޫޢު އަވަސްކުރުމަށް ކުރެވޭ މަސައްކަތްތައް
މި ޕްރޮގްރާމް ރާއްޖޭގެ އެކި ކަންކޮޅުތަކަށް ފުޅާކޮށް، ހަލުވި މިނެއްގައި ކުރިއަށް ގެންދިއުމަށްޓަކައި އެންވަޔަރަންމަންޓް މިނިސްޓްރީން ދަނީ ގިނަ ފިޔަވަޅުތަކެއް އަޅަމުންނެވެ.

އެގޮތުން ގަސް އިންދުމަށް ބޭނުންވާ ނާސަރީތައް ހެދުމަށްޓަކައި 10 ރަށަކަށް ޚާއްޞަ ގްރާންޓް (އެހީ) ދޫކޮށްފައިވެއެވެ. އަދި ހުޅުމާލޭގައި 'ގްރީން ނާސަރީއެއް' ތަރައްޤީކުރުމުގެ ބޮޑު މަޝްރޫޢެއްގެ މަސައްކަތްވެސް މިހާރު ދަނީ ބާރުގަދަ ދުވެއްޔެއްގައި ކުރަމުންނެވެ.

މި ތިމާވެށީގެ ބޮޑު ޙަރަކާތަށް އެހީތެރިވުމުގެ ގޮތުން، އަވައްޓެރި ބައެއް ޤައުމުތައް ކަމަށްވާ އިންޑިއާ، ބަންގްލަދޭޝް، އަދި ޕާކިސްތާނުންވެސް ދަނީ ރާއްޖެއަށް ބޭނުންވާ ގަހާއި އެކި ބާވަތްތަކުގެ މުޑުވައް ހަދިޔާކުރަމުންނެވެ.