ބުދަ، 18 ނޮވެމްބަރު 2026
ޚަބަރު

ޕާކިސްތާނަށް ކުރެއްވި ތާރީޚީ ފުރަމާނަ ދަތުރުފުޅަށްފަހު ރައީސް މުޢިއްޒު މާލެ ވަޑައިގެންފި

ޕާކިސްތާނަށް ކުރެއްވި ތާރީޚީ ފުރަމާނަ ދަތުރުފުޅަށްފަހު ރައީސް މުޢިއްޒު މާލެ ވަޑައިގެންފި

ޕާކިސްތާނުގެ ބޮޑުވަޒީރު މުޙައްމަދު ޝެހްބާޒް ޝަރީފްގެ ދަޢުވަތަކަށް އެ ޤައުމަށް ކުރެއްވި ފުރަމާނަ ދަތުރުފުޅު ނިންމަވާލެއްވުމަށްފަހު، ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒާއި އެމަނިކުފާނުގެ އަނބިކަނބަލުން ސާޖިދާ މުޙައްމަދު މިއަދު އެނބުރި މާލެ ވަޑައިގެންފިއެވެ. މި އޮކްޓޫބަރު މަހުގެ 20 އިން 22 އަށް ކުރެއްވި މި ދަތުރުފުޅަކީ ދެ ޤައުމުގެ ދެމެދުގައި ސިޔާސީ ގުޅުން ޤާއިމުކުރިތާ 60 އަހަރު ފުރުނު ތާރީޚީ މުނާސަބަތާ ދިމާކޮށް ކުރެއްވި ދަތުރުފުޅެކެވެ.

މި ދަތުރުފުޅުގެ ތެރެއިން ރައީސް މުޢިއްޒު ވަނީ ޕާކިސްތާނުގެ ބޮޑުވަޒީރު ޝެހްބާޒް ޝަރީފާއި ރައީސް އާސިފް ޢަލީ ޒަރްދާރީގެ އިތުރުން އެ ޤައުމުގެ ސަރުކާރާއި ޢަސްކަރިއްޔާގެ އިސް މަސްއޫލުވެރިންނާ ބައްދަލުކުރައްވާފައެވެ. އެގޮތުން ނައިބު ބޮޑުވަޒީރު އަދި ޚާރިޖީ ވަޒީރު އިސްޙާޤް ދާރާއި، ޗީފް އޮފް އާމީ ސްޓާފް ފީލްޑް މާޝަލް ސައްޔިދު އާސިމް މުނީރާއި، ނޭޝަނަލް އެސެމްބްލީގެ ސްޕީކަރ ސަރްދާރު އަޔާޒް ޞާދިޤު އަދި ސެނެޓުގެ ޗެއަރމަން ސައްޔިދު ޔޫސުފް ރަޒާ ގިލާނީއާ އެމަނިކުފާނު މަޝްވަރާ ކުރެއްވިއެވެ.

މި ބައްދަލުވުންތަކުގައި ވިޔަފާރިއާއި އިންވެސްޓްމަންޓް، ޞިއްޙަތު، ތަޢުލީމު، ފަތުރުވެރިކަން، މަސްވެރިކަމާއި ދަނޑުވެރިކަން، ޒުވާނުންނާއި ކުޅިވަރު އަދި ދިފާޢީ ދާއިރާއިން ގުޅުން ފުޅާކުރުމަށް ދެ ޤައުމުން އެއްބަސްވިއެވެ. މީގެ އިތުރުން ދެ ގައުމުގެ މެދުގައި 20 ފަހުމުނާމާއަކާއި އެއްބަސްވުމެއް ބަދަލުކުރެވުނުއިރު، ކުރިއަށް އޮތް ދެ އަހަރު ދުވަހުގެ ތެރޭގައި ދެމެދުގައި ކުރެވޭ ވިޔަފާރީގެ މިންވަރު 200 މިލިއަން އެމެރިކާ ޑޮލަރަށް އިތުރުކުރުމަށް ވަނީ އަމާޒުހިފާފައެވެ.

އިސްލާމްއާބާދުގައި ބޭއްވި "މޯލްޑިވްސް-ޕާކިސްތާން ބިޒްނަސް ފޯރަމް 2026" ގައި ވާހަކަފުޅުދައްކަވަމުން، ކާބޯތަކެތީގެ ރައްކާތެރިކަމާއި، ޞިއްޙީ ދާއިރާއާއި، އިމާރާތްކުރުމުގެ އިތުރުން އިއާދަކުރަނިވި ހަކަތައާއި އިސްލާމިކް ފައިނޭންސްގެ ދާއިރާއިން ރާއްޖޭގައި އިންވެސްޓްކުރުމަށް ޕާކިސްތާނުގެ ވިޔަފާރިވެރިންނަށް ރައީސް ދަޢުވަރު އެރުވިއެވެ. އަދި ޤައުމީ އެއަރލައިން މޯލްޑިވިއަނުން މާލެއާއި ކަރާޗީއާ ދެމެދު ސީދާ ދަތުރުތައް ވަރަށް އަވަހަށް ފެށުމަށް ހަމަޖެހިފައިވާކަންވެސް އެމަނިކުފާނު އިޢުލާންކުރެއްވިއެވެ.

މި ދަތުރުފުޅުގެ ތެރެއިން ރާއްޖޭގައި ފަސް މިލިއަން ގަސް އިންދުމަށް ފަށާފައިވާ މަޝްރޫޢަށް އެހީތެރިވުމުގެ ގޮތުން، 100,000 ޒައިތޫނި ގަހުގެ ކުރި އަދި އެކި ބާވަތްބާވަތުގެ 100,000 މުޑުވައް ހަދިޔާކުރުމަށް ޕާކިސްތާނުން ވަނީ ނިންމާފައެވެ. ސަރުކާރުގެ ވަޒީރުންނާއި އިސް އޮފިޝަލުން ހިމެނިވަޑައިގެންނެވި މި ދަތުރުފުޅަކީ ދެ ގައުމުގެ އިޤްތިޞާދީ އަދި ސިޔާސީ ގުޅުމުގައި އާ ބާބެއް ފެށިގެންދިޔަ މުހިންމު ދަތުރުފުޅެއް ކަމަށް ރައީސް އޮފީހުން ފާހަގަކުރެއެވެ.