ކުދި ވިޔަފާރިތަކަށް ރައީސްގެ ބޮޑު ލުޔެއް: ޓެކްސް ކުޑަކުރަނީ!
ކުދި އަދި މެދުފަންތީގެ ވިޔަފާރިތަކަށް ޓެކްސްގެ ލުއިތަކެއް ދިނުމަށް ސަރުކާރުން ނިންމަވާފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާނު ކުރައްވައިފިއެވެ. ރައީސުލްޖުމްހޫރިއްޔާ މިކަން ހާމަކުރެއްވީ "މޯލްޑިވްސް އެކްސްޕޯ 2026" (މައުރަޒު 26) ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
މި ރަސްމިއްޔާތުގައި ވާހަކަފުޅު ދައްކަވަމުން ރައީސް މުޢިއްޒު ވިދާޅުވީ، ދިވެހިރާއްޖޭގެ އިޤްތިޞާދުގެ މައިބަދައަކީ ކުދި އަދި މެދުފަންތީގެ ވިޔަފާރިތައް ކަމަށާއި، އެ ވިޔަފާރިތައް ކުރިއެރުވުމަށް ސަރުކާރުން ޚާއްޞަ އިސްކަމެއް ދެއްވާނެ ކަމަށެވެ. އެގޮތުން، ވިޔަފާރިތަކަށް ދިމާވާ މާލީ ގޮންޖެހުންތަކުން އަރައިގަތުމަށް އެހީތެރިވުމުގެ ގޮތުން ޓެކްސްގެ ނިޒާމަށް ލުއިތަކެއް ގެނައުމަށް މިހާރު ނިންމަވާފައިވާ ކަމަށް އެމަނިކުފާނު ވިދާޅުވިއެވެ.
މީގެ އިތުރުން، ރާއްޖޭގައި އުފެއްދުންތެރިކަމާއި އީޖާދީ މަސައްކަތްތައް އިތުރުކޮށް، ދިވެހި އުފެއްދުންތަކަށް އިސްކަންދިނުމުގެ ސިޔާސަތުގެ ދަށުން ވިޔަފާރިތަކަށް ބޭނުންވާ ފަހި މާޙައުލެއް ޤާއިމުކޮށްދެއްވާނެ ކަމުގެ ޔަޤީންކަން ވެސް ރައީސުލްޖުމްހޫރިއްޔާ ވަނީ ދެއްވާފައެވެ.
Ads by BML
Ads by MACL
