ބުދަ، 18 ނޮވެމްބަރު 2026
ޚަބަރު

އޭ20 ޕްރޯ ޗިޕާއެކު އެޕަލްއިން މުޅިން އައު އައިޕެޑް މިނީ ބާޒާރަށް ނެރެފި!

އިންޓެލިޖެންސް އޭއައި ފީޗާސްތަކާއެކު ފަރުމާކޮށްފައިވާ މި އައު އައިޕެޑް މިނީ / ފޮޓޯ: އެޕަލް ނިއުސްރޫމް
އިންޓެލިޖެންސް އޭއައި ފީޗާސްތަކާއެކު ފަރުމާކޮށްފައިވާ މި އައު އައިޕެޑް މިނީ / ފޮޓޯ: އެޕަލް ނިއުސްރޫމް

އެޕަލް ކުންފުނީގެ އެންމެ ފަހުގެ އުފެއްދުން ކަމުގައިވާ، އޭ20 ޕްރޯ ޗިޕް އަދި 8.5 އިންޗީގެ އޯލެޑް ޑިސްޕްލޭއެއް ހިމެނޭ އައު އައިޕެޑް މިނީ ރަސްމީކޮށް ތައާރަފުކޮށްފިއެވެ. މި އައު ޑިވައިސް ދައްކާލާފައިވަނީ އެޕަލްއިން ބޭއްވުމަށް ހަމަޖެހިފައިވާ ޕްރޯ އެންޑް ޓެލް ހަރަކާތުގެ ދެ ދުވަސް ކުރިންނެވެ.

ކުރީގެ މޮޑެލްތަކަށްވުރެ ތުނިކޮށް، އެންމެ 5.4 މިލިމީޓަރުގެ ބޯމިނާއެކު ފަރުމާކޮށްފައިވާ މި އައު އައިޕެޑް މިނީގެ ވައިފައި މޮޑެލްގެ އަގަކީ 699 އެމެރިކާ ޑޮލަރެވެ. އަދި ވައިފައި އާއެކު ސެލިއުލާ ސަޕޯޓްކުރާ މޮޑެލްގެ އަގު އުޅެނީ 849 އެމެރިކާ ޑޮލަރުގައެވެ. ދެ ކުލައަކުން ލިބެން ހުންނާނެ މި ޑިވައިސްގައި ސުޕަ ރެޓިނާ އެކްސްޑީއާރު އޯލެޑް ޓެކްނޮލޮޖީ ބޭނުންކޮށްފައިވާއިރު، ޕީކް ބްރައިޓްނެސް 1,200 ނިޓްސްއަށް އަރައެވެ. މިއީ ކުރީގެ މޮޑެލްއަށްވުރެ ދެގުނަ އިތުރު އަދަދެކެވެ.

މި ފަހަރުގެ އައިޕެޑް މިނީގައި އަޑުގެ ފެންވަރު ރަނގަޅުކުރުމަށް އެކޫސްޓިކް ޑިސްޕްލޭ ޓެކްނޮލޮޖީ ހިމަނާފައިވާއިރު، ސްކްރީނުން އަލި އެޅުން ކުޑަކޮށްދޭ ނެނޯ-ޓެކްސްޗާ ޑިސްޕްލޭ އޮޕްޝަންވެސް ލިބެން ހުރެއެވެ. މީގެ އިތުރުން، 12 މެގަޕިކްސެލްގެ ސެންޓާ ސްޓޭޖް ފްރަންޓް ކެމެރާއަކާއި، ފާސްޓް-ޗާޖިން ސަޕޯޓްވެސް މި ޑިވައިސްގައި ހިމެނެއެވެ.

އާޓިފިޝަލް އިންޓެލިޖެންސް އަށް ޚާއްޞަކޮށްގެން ސެކަންޑް ޖެނެރޭޝަންގެ އެޕަލް އިންޓެލިޖެންސް އަދި ސިރީ އޭއައި ހިމަނާފައިވާ މި އައިޕެޑް މިނީގެ 7-ކޯ ޖީޕީޔޫގެ ސަބަބުން، ކުރީގެ މޮޑެލްއަށްވުރެ އޭއައި ޕާފޯމަންސް 4.5 ގުނަ އަވަސްވާނެއެވެ. އަދި އޭ20 ޕްރޯ ޗިޕްގެ 6-ކޯ ސީޕީޔޫއާއެކު މަލްޓިތުރެޑެޑް ޕާފޯމަންސް 60 އިންސައްތައަށް ހަލުވިވެގެންދާނެއެވެ.

އައު އައިޕެޑް މިނީއަށް ޕްރީ-އޯޑަރު ކުރުމުގެ ފުރުސަތު ކުރިއަށް އޮތް ބުދަ ދުވަހު ހުޅުވާލާއިރު، ނޮވެމްބަރު މަހުގެ 6 ވަނަ ދުވަހުން ފެށިގެން ބާޒާރުން ލިބެން ހުންނާނެއެވެ.