ގއ. އަތޮޅު ކަނޑުން ބޮޑު ދަގަނޑު ބޮޔެއް އޮޔާދާތީ ކަނޑުދަތުރުވެރިން ސަމާލުވުމަށް އިލްތިމާސްކޮށްފި
ގއ. އަތޮޅު ދިގުވަރު ކަނޑުއެތެރެވަރިން ބޮޑު ދަގަނޑު ބޮޔެއް އޮޔާދާތީ، އެ ސަރަހައްދުން ދަތުރުކުރާ އުޅަނދުފަހަރުގެ ސަލާމަތާއި ރައްކާތެރިކަމަށްޓަކައި ކަނޑުދަތުރުވެރިން ސަމާލުވުމަށް މޯލްޑިވްސް ޕޮލިސް ސާވިސްއިން އިލްތިމާސްކުރައްވައިފިއެވެ.
ފުލުހުން ހާމަކުރެއްވި ގޮތުގައި މި ބޮއެ ފެނިފައިވަނީ މިއަދު ހެނދުނު 11:30 އެހާކަންހާއިރުއެވެ. އޮޔާދާ މި ދަގަނޑު ބޮޔަކީ ދިގުމިނުގައި 15 ފޫޓު އަދި ފުޅާމިނުގައި 5 ފޫޓު ހުރި ބޮޔެކެވެ. މި ބޮއެ މިހާރު އޮޔާދަނީ ދެކުނުން އުތުރަށް ކަމަށް ފުލުހުން މައުލޫމާތު ދެއްވައެވެ.
ކަނޑުގެ އޮއިވަރު ހުރިގޮތުން މިރޭގެ ވަގުތެއްގައި ގއ. ވިލިނގިލި، ގއ. މާމެންދޫ، ގއ. ނިލަންދޫ އަދި ގއ. ދާންދޫ ހިމެނޭ ސަރަހައްދަށް މި ބޮއެ ލެއްވުން ނުވަތަ އޮޔާދިއުން އެކަށީގެންވާ ކަމަށް ފުލުހުން ލަފާކުރައްވައެވެ. އެހެންކަމުން މި ސަރަހައްދުން ދަތުރުކުރައްވާ ހުރިހާ ފަރާތްތަކުން ވެސް މިކަމަށް ހާއްސަ ސަމާލުކަމެއް ދެއްވުމަށް ފުލުހުން ވަނީ އެދިވަޑައިގެންފައެވެ.
ފުލުހުން މިފަދަ އިލްތިމާސެއް ކުރައްވާފައިވާއިރު، މޫސުމާބެހޭ ގައުމީ އިދާރާ އިން ވަނީ ދެކުނުގެ ކަނޑުތައް ގަދަވާނެ ކަމަށް ލަފާކޮށް ލ. އަތޮޅުން ފެށިގެން އައްޑޫ އަތޮޅާ ހަމައަށް ވައިޓް އެލާޓް ނެރެފައެވެ.
މެޓް އޮފީހުން ލަފާކުރާގޮތުގައި މިއަދު މެންދުރުފަހުން ފެށިގެން މިރޭގެ ނިޔަލަށް އެ ސަރަހައްދަށް ބޯކޮށް ވާރޭވެހުމާއެކު ގުގުރާނެއެވެ. އަދި ވިލާގަނޑުގައި ގަޑިއަކު 40 މޭލަށް ވައިގަދަވެ، ކަނޑުތައް އާދައިގެ ވަރަކަށް ގަދަވެފައި ވިލާގަނޑުގައި އިތުރަށް ގަދަވާނެ ކަމަށް ވެސް އެ އިދާރާއިން މައުލޫމާތު ދެއްވައެވެ.
Ads by MACL
