ބުދަ، 18 ނޮވެމްބަރު 2026
ޚަބަރު

ކުރިއަށް އޮތް ދެ އަހަރު ތާރީޚު ނުދެކޭ ވަރަށް ދިވެހިންނަށް ބޯހިޔާވަހިކަން ޔަޤީންކޮށްދެއްވާނަން: ރައީސް

ޕަބްލިކް ސަރވިސް މީޑިއާ (ޕީއެސްއެމް) ގެ "ނޭޝަން ޗެޓް" ޕޮޑްކާސްޓް ސިލްސިލާގެ 6 ވަނަ އެޕިސޯޑްގައި ވާހަކަފުޅުދައްކަވަމުން / ފޮޓޯ: ރައީސް އޮފީސް
ޕަބްލިކް ސަރވިސް މީޑިއާ (ޕީއެސްއެމް) ގެ "ނޭޝަން ޗެޓް" ޕޮޑްކާސްޓް ސިލްސިލާގެ 6 ވަނަ އެޕިސޯޑްގައި ވާހަކަފުޅުދައްކަވަމުން / ފޮޓޯ: ރައީސް އޮފީސް

ދިވެހިރާއްޖޭގައި ފެށިގެންދަނީ ބޯހިޔާވަހިކަމުގެ ރަންޒަމާނެއް ކަމަށާއި، ކުރިއަށް އޮތް ދެ އަހަރު ދުވަހަކީ ތާރީޚު ދެކެފައި ނުވާ މިންވަރަށް ދިވެހި ރައްޔިތުންނަށް ބޯހިޔާވަހިކަން ކަށަވަރުކޮށްދެވޭނެ މުއްދަތެއް ކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދެއްވައިފިއެވެ.

ދައުލަތުގެ މީޑިއާ، ޕަބްލިކްސަރވިސް މީޑިއާ (ޕީއެސްއެމް) ގެ "ނޭޝަން ޗެޓް" ޕޮޑްކާސްޓް ސިލްސިލާގެ 6 ވަނަ އެޕިސޯޑުގައި ވާހަކަފުޅުދައްކަވަމުން ރައީސުލްޖުމްހޫރިއްޔާ ވިދާޅުވީ، ސަރުކާރުގެ އެންމެ ބޮޑު އަމާޒަކީ ކޮންމެ ދިވެހި ރައްޔިތަކަށްމެ އަމިއްލަ ބޯހިޔާވަހިކަމެއް ކަށަވަރުކޮށްދިނުން ކަމަށެވެ. އަދި މި މަޝްރޫޢާ ގުޅުވައިގެން މުޖުތަމަޢުގައި ފަތުރަމުންދާ އަޑުތަކަކީ އެއްވެސް އަސާސެއް ނެތް ވާހަކަތަކެއް ކަމަށް ވެސް އެމަނިކުފާނު ހާމަކުރެއްވިއެވެ

މި ޚަބަރުގެ މުހިންމު ނުކުތާތައް:
• ޝަރުޠުހަމަވާ އެންމެނަށް ބޯހިޔާވަހިކަން: ރަސްމާލެއިން ބޯހިޔާވަހިކަމަށް އެދި ހުށަހެޅި ފަރާތްތަކުގެ ތެރެއިން، ހުރިހާ ގިންތިއަކުން ޝަރުޠުހަމަވާ ހުރިހާ ރައްޔިތުންނަށް ބޯހިޔާވަހިކަން ކަށަވަރުވާނެއެވެ.
• ދައުލަތަށް ދަރަނި ނުވުން: މިފަދަ ބިޔަ މަޝްރޫޢުތައް ކުރިއަށްގެންދަނީ ދައުލަތުގެ ބޮލުގައި އެއްވެސް ދަރަންޏެއް ނޭޅޭނެ ފަދަ އީޖާދީ އުޞޫލުތަކެއްގެ ދަށުން، ފިއުޗަރ ރެވެނިއު ނުވަތަ ބިން ދޫކުރާ އުޞޫލުންނެވެ.
• ޙައްޤުތައް ހަނިނުވުން: ބޭރުގެ ފަރާތްތަކުން އިންވެސްޓް ކުރި ނަމަވެސް، ދިވެހި ރައްޔިތުންނަށް އޮތް ބޯހިޔާވަހިކަމުގެ ފުރުޞަތު އެއްވެސް މިންވަރަކަށް ހަނިވެގެން ނުދާނެއެވެ.
• ޢަޒުމް ވަރުގަދަކަން: ޤައުމާއި ރައްޔިތުންގެ ޙައްޤުގައި ކުރައްވާ މަސައްކަތްތައް، އިޒްރޭލާ ދެކޮޅަށް ކުރައްވާ މަސައްކަތްޕުޅުތަކާ އެއްގޮތަށް، ސާބިތުކަމާއެކު ކުރިއަށް ގެންދަވާނެއެވެ.

ރައީސް ޑރ. މުޢިއްޒު އިތުރަށް ވިދާޅުވީ، ކަންކަމުގެ ރަނގަޅާއި ގޯސް ވަކިކޮށް ބަލައި، އޭގެ ތެރެއިން ރަނގަޅު ގޮތް އިޚްތިޔާރުކުރާ ބަޔަކު މުޖުތަމަޢުގައި އުޅޭ ކަމަށާއި، ރަސްމާލޭގެ ތަރައްޤީގެ މަޝްރޫޢާ ގުޅިގެން ރައްޔިތުން ކަންބޮޑުވާންޖެހޭ އެއްވެސް ސަބަބެއް ނެތް ކަމަށެވެ. މި މަޝްރޫޢުން ސީދާ ރައްޔިތުންނަށް އޭގެ ހެޔޮ ލާބަޔާއި މަންފާ ލިބޭނެ ކަމުގެ ފުރިހަމަ ޔަޤީންކަން އެމަނިކުފާނު ވަނީ ތަކުރާރުކޮށް އަރުވާފައެވެ.