ބުދަ، 18 ނޮވެމްބަރު 2026
ޚަބަރު

ރަސްމާލެ މަޝްރޫޢާ ގުޅޭގޮތުން ފާޑުކިޔާ ސިޔާސީ ފަރާތްތަކުގެ އިޚްލާޞްތެރިކަމެއް ނެތް: ރައީސް

ރަސްމާލެ މަޝްރޫޢު/ ފޮޓޯ: ރައީސް އޮފީސް
ރަސްމާލެ މަޝްރޫޢު/ ފޮޓޯ: ރައީސް އޮފީސް

ރަސްމާލެ މަޝްރޫޢާ ގުޅޭގޮތުން ފާޑުކިޔާ ސިޔާސީ ފަރާތްތަކުގެ އެއްވެސް އިޚްލާޞްތެރިކަމެއް ނެތް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.

ޕަބްލިކް ސަރވިސް މީޑިއާ (ޕީއެސްއެމް) ގެ "ނޭޝަން ޗެޓް" ޕްރޮގްރާމްގައި ވާހަކަފުޅުދައްކަވަމުން ރައީސުލްޖުމްހޫރިއްޔާ މިރޭ ވިދާޅުވީ، އިދިކޮޅު ފަރާތްތަކުން ރަސްމާލެ މަޝްރޫޢާ ގުޅުވައިގެން ބިރުވެރިކަން އުފެއްދުމަށް އެކި ވާހަކަތައް ފެތުރި ނަމަވެސް، އެތަނަކީ މުސްލިމުންނަށް ފަހި މާޙައުލެއްގެ ގޮތުގައި ތަރައްޤީކުރާނެ ސައްތައިން ސައްތަ އިސްލާމީ މަރުކަޒެއް ކަމަށެވެ. އެގޮތުން އެ ސަރަހައްދުގައި ރަލާއި އޫރުމަސް ވިއްކުމާއި، ބުއިމާއި ގެންގުޅުން މުޅިން މަނާވާނެ ކަމަށް އެމަނިކުފާނު ތަކުރާރުކުރެއްވިއެވެ.

ރައީސުލްޖުމްހޫރިއްޔާގެ ވާހަކަފުޅުން ފާހަގަކޮށްލެވޭ މުހިންމު ނުކުތާތައް:
• އިސްލާމީ އުޞޫލުތައް ހިފެހެއްޓުން: ރަސްމާލޭގައި ފަސް ވަގުތު ބަންގިގޮވައި މިސްކިތްތައް ހުންނާނެއެވެ. ބޭރުގެ އެއްވެސް ފަރާތެއްގެ ކޮންޓްރޯލް ހިނގާ ގޮތަށް އެއްވެސް ތަޢުލީމީ މުއްދަސާއެއް ނުވަތަ ސްކޫލެއް އެތާކު ނުހުންނާނެއެވެ.
• މުސްލިމުންގެ ޝައުޤުވެރިކަން: އެތަނުން ޕްރޮޕަޓީތައް ގަތުމަށް އެންމެ ބޮޑަށް ޝައުޤުވެރިވަނީ އަރަބި އިސްލާމީ ޤައުމުތަކުގެ މުސްލިމުން ކަމަށްވުމުން، އެތަނުގައި ތިބޭނީ ދިވެހިންނާއި އެހެން ޤައުމުތަކުގެ މުސްލިމުންނެވެ.
• ޤައުމީ ލިމިޓް އަދި އިޒްރޭލު މަނާވުން: ވަކި ޤައުމެއްގެ ރައްޔިތުންނަށް އެންމެ ގިނައިން ވެސް ވިއްކޭނީ 25 އިންސައްތަ ޕްރޮޕަޓީއެވެ. ނަމަވެސް އިޒްރޭލުގެ ރައްޔިތުންނަށް ޕްރޮޕަޓީ ވިއްކުމާއި، ކުއްޔަށްދިނުން އަދި އެ ސަރަހައްދަށް ވަނުން ވެސް ޤާނޫނުން މުޠުލަޤަށް މަނާވާނެއެވެ.

ރައީސުލްޖުމްހޫރިއްޔާ މިފަދައިން ވިދާޅުވެފައިވަނީ، ރަސްމާލެއިން ހިއްކާފައިވާ 500 އަށްވުރެ ބޮޑު ހެކްޓަރުގެ ސަރަހައްދެއް 99 އަހަރަށް ޔޫއޭއީގެ އީގަލް ހިލްސްއަށް ކުއްޔަކާ ނުލައި ދޫކުރާތީއާއި، އެތަނުގައި ޔަހޫދީން ވަޒަންވެރިވެދާނެ ކަމަށް ބުނެ ޢާންމުންނާއި އިދިކޮޅު ފަރާތްތަކުން ކަންބޮޑުވުން ފާޅުކުރަމުންދާ ދަނޑިވަޅެއްގައެވެ.

މި މަޝްރޫޢާ ގުޅިގެން ޤާނޫނީ ވަކީލު ޢަލީ ޙުސައިން ވަނީ ބޯހިޔާވަހިކަމަށް ރައްޔިތުން ބޭނުންވެފައި ތިއްބައި ބޭރުގެ ބަޔަކަށް ބިން ދިނުމަކީ ބޭއިންސާފެއް ކަމަށް ވިދާޅުވެ، މިއީ ރައްޔިތުންގެ އުންމީދުތަކުގައި ކޮޅުފައިން ޖެހުން ކަމަށް ސިފަކުރައްވާފައެވެ. އަދި މި މަޝްރޫޢު ހުއްޓުވުމަށް އޭނާ ސުޕްރީމް ކޯޓަށް ހުށަހެޅި މައްސަލަ ބަލައިނުގަތުމަށް އެ ކޯޓުގެ ރަޖިސްޓްރާ ނިންމެވި ނިންމެވުން މުރާޖަޢާކޮށްދިނުމަށް މިހާރު ވަނީ އަލުން ހުށަހަޅާފައެވެ. މީގެއިތުރުން، އިދިކޮޅު އެމްޑީޕީން މަޖިލީހަށް ހުށަހެޅި ކުއްލި މައްސަލައާއި ޤަރާރުތައް ވެސް ސަރުކާރުގެ ސުޕަރ މެޖޯރިޓީ އޮތް މަޖިލީހުން ވަނީ ބޭރުކޮށްލާފައެވެ.