ބުދަ، 18 ނޮވެމްބަރު 2026
ޚަބަރު

ސ. ހިތަދޫ ރީޖަނަލް އެމަޖެންސީ އޮޕަރޭޝަން ސެންޓަރުގެ ރޭމްޕް ކޮންކްރީޓް އެޅުމުގެ މަސައްކަތް ފަށައިފި

ސ. ހިތަދޫ ރީޖަނަލް އެމަޖެންސީ އޮޕަރޭޝަން ސެންޓަރުގެ ރޭމްޕް ކޮންކްރީޓް އެޅުމުގެ މަސައްކަތް ފަށައިފި

އައްޑޫ ސިޓީ ހިތަދޫގައި އިމާރާތް ކުރަމުންދާ ރީޖަނަލް އެމަޖެންސީ އޮޕަރޭޝަން ސެންޓަރުގެ ރޭމްޕްގެ ކޮންކްރީޓް މަސައްކަތްތަކާއި ރެނިގަނޑު އެޅުމުގެ (މޭސަންރީ) މަސައްކަތްތައް ބާރުސްޕީޑްގައި ކުރިއަށްދާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އިން ހާމަކޮށްފިއެވެ.

އެމްޓީސީސީން ބުނެފައިވަނީ ސައިޓުގައި މިހާރު ކުރިއަށްދަނީ އިމާރާތުގެ ރޭމްޕްގެ ކޮންކްރީޓް ކުރުމުގެ މަސައްކަތާއި ރޭނުމުގެ މަސައްކަތްތައް ކަމަށެވެ. އަދި މި މަޝްރޫޢުގެ އެންމެ ފަހުގެ މައުލޫމާތުތަކާއި އަދާހަމަތައް އެ ކުންފުނީގެ ޕްރޮޖެކްޓްސް ޕޯޓަލް މެދުވެރިކޮށް ބަލައިލެވޭނެ ކަމަށްވެސް އެމްޓީސީސީން ވަނީ ބުނެފައެވެ.

ސ. ހިތަދޫގައި ގާއިމުކުރާ މި ރީޖަނަލް އެމަޖެންސީ އޮޕަރޭޝަން ސެންޓަރަކީ ކާރިސާތަކާއި ކުއްލި ނުރައްކަލުގެ ހާލަތްތަކުގައި ސަރަހައްދީ ފެންވަރުގައި އެހީތެރިކަން ފޯރުކޮށްދިނުމާއި، އޮޕަރޭޝަންތައް ރޭވުމަށް ގާއިމުކުރާ މުހިންމު މަރުކަޒެކެވެ. މި މަޝްރޫޢުގެ އަމަލީ މަސައްކަތް ރަސްމީކޮށް އިފްތިތާޙުކޮށްފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒާއި ދިފާޢީ ވަޒީރު މުޙައްމަދު ޣައްސާން މައުމޫނުގެ އިތުރުން އެމްޓީސީސީގެ އިސްވެރިން ބައިވެރިވެވަޑައިގެން ބޭއްވި ޚާއްޞަ ރަސްމިއްޔާތެއްގައެވެ.

ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން އިސްނަގައިގެން ރާއްޖޭގެ ތިން ސަރަހައްދެއްގައި މިފަދަ އެމަޖެންސީ އޮޕަރޭޝަން ސެންޓަރުތައް ގާއިމުކުރުމަށް ވަނީ ނިންމާފައެވެ. އެއީ އައްޑޫ ސިޓީ ހިތަދޫގެ އިތުރުން ލ. އަތޮޅާއި ގދ. ތިނަދޫގައެވެ. މި މަރުކަޒުތައް ގާއިމުކުރުމުގެ މައިގަނޑު މަޤްޞަދަކީ ކާރިސާތަކަށް އިޖާބަދިނުމާއި، ރައްކާތެރިކަމުގެ ފިޔަވަޅުތައް އެޅުމުގެ ޤާބިލުކަން ސަރަހައްދީ ފެންވަރުގައި އިތުރުކޮށް ހަރުދަނާކުރުމެވެ.