ބުދަ، 18 ނޮވެމްބަރު 2026
ޚަބަރު

ބާކީ އެންމެ 15 ލަނޑު! ރޮނާލްޑޯގެ ތޫފާނީ ހެޓްރިކާއެކު އަލް ނަސްރުން އަލް ޚުލޫދު ކަކޫޖައްސައިފި

އަލް ޚުލޫދާ ދެކޮޅަށް ކުޅުނު މެޗުގައި ހެޓްރިކް ހެދުމަށްފަހު އަލް ނަސްރުގެ ކެޕްޓަން ކްރިސްޓިއާނޯ ރޮނާލްޑޯ އުފާފާޅުކުރަނީ.
ފޮޓޯ ކުރެޑިޓް: އަލް ނަސްރު
އަލް ޚުލޫދާ ދެކޮޅަށް ކުޅުނު މެޗުގައި ހެޓްރިކް ހެދުމަށްފަހު އަލް ނަސްރުގެ ކެޕްޓަން ކްރިސްޓިއާނޯ ރޮނާލްޑޯ އުފާފާޅުކުރަނީ. ފޮޓޯ ކުރެޑިޓް: އަލް ނަސްރު

ސައޫދީ ޕްރޯ ލީގުގައި ކްރިސްޓިއާނޯ ރޮނާލްޑޯ 15 މިނެޓު ތެރޭގައި ކާމިޔާބުކުރި ހެޓްރިކާއެކު، އަލް ޚުލޫދު އަތުން 5-3 ގެ ނަތީޖާއަކުން މޮޅުވެ އަލް ނަސްރުން މުހިންމު ތިން ޕޮއިންޓް ކަށަވަރުކޮށްފިއެވެ.

މި މެޗުގައި ފެނިގެންދިޔަ ތިން ލަނޑާއެކު ރޮނާލްޑޯގެ ކެރިއަރުގައި ޖެހި ޖުމްލަ ލަނޑުގެ އަދަދު މިހާރު ވަނީ 985 އަށް އަރައި، އޭނާ ހާސިލުކުރަން އަމާޒުހިފާފައިވާ ތާރީޚީ 1,000 ލަނޑުގެ ލަނޑުދަނޑިއާ އިތުރަށް ގާތަށް ޖެހިލާފައެވެ.

ފޯރިގަދަ ކުޅުމެއް ފެނިގެންދިޔަ މި މެޗުގެ ފުރަތަމަ ހާފުގައި އަލް ޚުލޫދުން ވަނީ އެންމެ ފަހުގެ ޗެމްޕިއަން އަލް ނަސްރަށް ވަރުގަދަ ކުރިމަތިލުމެއް ދީފައެވެ. މެޗުގެ 16 ވަނަ މިނެޓުގައި ޖޫލިއަން ޑޮމިންގޭޒް އަލް ޚުލޫދަށް ކުރިހޯދައިދީފައި ވަނިކޮށް، 24 ވަނަ މިނެޓުގައި އޭންޖެލޯ ވަނީ އަލް ނަސްރަށް ނަތީޖާ ހަމަހަމަކޮށްދީފައެވެ. އޭގެ ފަހުން 38 ވަނަ މިނެޓުގައި ސަދިއޯ މާނޭ އަލް ނަސްރަށް ލީޑު ނަގައިދިން ނަމަވެސް، ފުރަތަމަ ހާފު ނިމުމުގެ ކުރިން އެންޓޮއިން ލޮއިކް އެސޮމްބާ ވަނީ އަލް ޚުލޫދަށް ނަތީޖާ 2-2 އަށް ބަދަލުކޮށްދީފައެވެ.

ދެވަނަ ހާފުގައި މުޅި މެޗުގެ އޮއިވަރު ބަދަލުކޮށްލީ ކެޕްޓަން ރޮނާލްޑޯއެވެ. އޭނާ ވަނީ މެޗުގެ 66، 72 އަދި އޭގެ އިރުކޮޅެއް ފަހުން ލަނޑުތައް ކާމިޔާބުކޮށް އޭނާގެ ހެޓްރިކް ފުރިހަމަކޮށްފައެވެ. މެޗުގެ އިތުރު ވަގުތުގައި އަލް ޚުލޫދުގެ ޑޮމިންގޭޒް ޕެނަލްޓީއަކުން ލަނޑެއް ޖެހި ނަމަވެސް، އަލް ނަސްރުން ވަނީ މެޗު ކާމިޔާބުކޮށް ތާވަލުގެ ކުރިއަށް ޖެހިލާފައެވެ. މި މޮޅާއެކު އަލް ނަސްރު ވަނީ ކުޅުނު 11 މެޗުން 28 ޕޮއިންޓް ހަމަކޮށްފައެވެ.