ބުދަ، 18 ނޮވެމްބަރު 2026
ޚަބަރު

ރާއްޖެ-ޗައިނާ ވިޔަފާރި ގުޅުވައިދޭ ބިޒްނަސް ގޭޓްވޭ އިފްތިތާހުކޮށްފި

 ޗައިނާ މޯލްޑިވްސް ބިޒްނަސް ގޭޓްވޭ އެސޯސިއޭޝަން ފޯރަމްގެ ތެރެއިން ---- ފޮޓޯ: ރައީސުލްޖުމްހޫރިއްޔާގެ އޮފީސް
ޗައިނާ މޯލްޑިވްސް ބިޒްނަސް ގޭޓްވޭ އެސޯސިއޭޝަން ފޯރަމްގެ ތެރެއިން ---- ފޮޓޯ: ރައީސުލްޖުމްހޫރިއްޔާގެ އޮފީސް

ދިވެހިރާއްޖެއާއި ޗައިނާއާ ދެމެދު އޮތް ވިޔަފާރިއާއި އިންވެސްޓްމަންޓްގެ ގުޅުންތައް އާ ހަރުފަތަކަށް ގެންދިއުމަށްޓަކައި، "ޗައިނާ މޯލްޑިވްސް ބިޒްނަސް ޓްވޭ އެސޯސިއޭޝަން" (ސީއެމްބީޖީއޭ) ރަސްމީކޮށް އިފްތިތާހުކޮށްފިއެވެ.

މި ޖަމްއިއްޔާ އިފްތިތާހުކޮށްފައިވަނީ އިއްޔެ ބޭއްވުނު "ޗައިނާ–މޯލްޑިވްސް އިންވެސްޓްމަންޓް ކޯޕަރޭޝަން ފޯރަމް 2026" ގެ ތެރެއިންނެވެ. ބިޒްނަސް ގޭޓްވޭ ރަސްމީކޮށް އިފްތިތާހުކޮށްދެއްވީ ޗައިނާއިން ރާއްޖެއަށް ކަނޑައަޅުއްވާފައި ހުންނަވާ ސަފީރު ކޮންގް ޝިއަންހުއާ އާއި، ސީއެމްބީޖީއޭގެ ރައީސް މުހައްމަދު ބައްސާމް އާދަމްއެވެ.

މިއީ ދެ ގައުމުގެ އަމިއްލަ ވިޔަފާރިތަކާއި އިންވެސްޓަރުން ސީދާގޮތުން ގުޅުވައިދިނުމަށްޓަކައި ގާތްގަނޑަކަށް އަހަރެއްހާ ދުވަހު ކުރެވުނު މަސައްކަތުގެ ނަތީޖާއެކެވެ. މި ޖަމްއިއްޔާގެ މައި އޮފީސް މާލޭގައި ހުންނައިރު، ޗައިނާގެ ވެރިރަށް ބެއިޖިންގްގައިވެސް އިތުރު އޮފީހެއް ވަނީ ގާއިމުކޮށްފައެވެ.

މި ޖަމްއިއްޔާގެ މައިގަނޑު މަގްސަދަކީ ވިޔަފާރި، އިންވެސްޓްމަންޓް، ފަތުރުވެރިކަން އަދި ޓެކްނޮލޮޖީގެ ދާއިރާއިން ދެ ގައުމުގެ އަމިއްލަ ސެކްޓަރަށް އާ ފުރުސަތުތަކެއް ހޯދައިދީ، ބާޒާރުތަކަށް ވަނުމަށް ބޭނުންވާ އެހީތެރިކަން ފޯރުކޮށްދިނުމެވެ.

ސީއެމްބީޖީއޭގެ ރައީސް މުހައްމަދު ބައްސާމް އާދަމް ވިދާޅުވި ގޮތުގައި، މި އިފްތިތާހަކީ ފެށުމެކެވެ. ޖަމްއިއްޔާގެ ކުރިއަށް އޮތް އަމާޒަކީ މާނަހުރި ވިޔަފާރި ގުޅުންތައް ބިނާކޮށް، ދެ ގައުމަށް ފައިދާހުރި އަމަލީ ބައިވެރިވުންތަކެއް އުފެއްދުމެވެ. މި ޖަމްއިއްޔާ ގާއިމުކުރުމުގައި މިނިސްޓްރީ އޮފް އިކޮނޮމިކް ޑިވެލޮޕްމަންޓް، ޓްރާންސްޕޯޓް އެންޑް ޓްރޭޑް އަދި އިންވެސްޓް މޯލްޑިވްސްއިން ވެސް ބޮޑު އެހީތެރިކަމެއް ދީފައިވެއެވެ