ބުދަ، 18 ނޮވެމްބަރު 2026
ޚަބަރު

ގައުމީ މިނިވަންކަން މަތީ ދެމިއޮތުމަށް ސިފައިންގެ މަތިވެރި ޖިހާދުން ފިލާވަޅު ލިބިގަންނަންޖެހޭ: ރައީސް

ނަޞްރުގެ ދުވަހުގެ ހަރަކާތްތަކުގެ ތެރެއިން، ހަނދާނީ ބިނާގައި ދިދަ އާއި ގާޑް މައުންޓުކުރުން، ފޮޓޯ: ރައީސް އޮފީސް
ނަޞްރުގެ ދުވަހުގެ ހަރަކާތްތަކުގެ ތެރެއިން، ހަނދާނީ ބިނާގައި ދިދަ އާއި ގާޑް މައުންޓުކުރުން، ފޮޓޯ: ރައީސް އޮފީސް

ދިވެހިރާއްޖޭގެ މިނިވަންކަމާއި ސިޔާދަތު ރައްކާތެރިކޮށް ދެމެހެއްޓުމަށްޓަކައި ދިވެހި ސިފައިން ވެފައިވާ މަތިވެރި ގުރުބާނީއާއި ކުރި ސާބިތު ޖިހާދުން ކޮންމެ ދިވެހި ރައްޔިތަކުވެސް އިބުރަތް ލިބިގަންނަންޖެހޭ ކަމަށް ރައީސުލްޖުމްހޫރިއްޔާ މުހައްމަދު މުއިއްޒު ވިދާޅުވެއްޖެއެވެ.

މިއަދު ފާހަގަކުރަމުންދާ 38 ވަނަ ނަޞްރުގެ ދުވަހުގެ މުނާސަބަތުގައި ސޯޝަލް މީޑިއާ މެދުވެރިކުރައްވައި ފޮނުއްވި މެސެޖެއްގައި ރައީސް ވަނީ ދިވެހި ސިފައިންނަށާއި އެންމެހައި ރައްޔިތުންނަށް ދުވަހުގެ ހެޔޮއެދުންތައް އަރިސްކުރައްވާފައެވެ. އެމަނިކުފާނު ފާހަގަކުރެއްވި ގޮތުގައި ގައުމުގެ ފަސްގަނޑު މިނިވަންކަންމަތީ ދެމިއޮތުމުގެ އަސްލަކީ ސިފައިން ދެއްކެވި ހިތްވަރާއި މަތިވެރި ޖިހާދެވެ.

ނަސްރުގެ ދުވަހުގެ ހަރަކާތްތައް މިއަދު ހެނދުނު ރަސްމީކޮށް ފަށާފައިވަނީ އިސްލާމީ މަރުކަޒުގައި ބޭއްވި ބޮޑު ޖަމާއަތުގެ ފަތިސް ނަމާދުންނެވެ. އެއަށްފަހު ނޮވެމްބަރު 3 ގެ ހަނދާނީ ބިނާގައި ބޭއްވި ދިދަ ނެގުމާއި ގާޑު މައުންޓްކުރުމުގެ ހާއްސަ ރަސްމިއްޔާތު ރައީސް މުއިއްޒުގެ ދެކަނބަލުން ވަނީ ޝަރަފުވެރިކޮށްދެއްވާފައެވެ. މި ރަސްމިއްޔާތުގައި ވަޒީރުންނާއި ސަރުކާރުގެ އިސްވެރިންވެސް ބައިވެރިވެވަޑައިގެންނެވިއެވެ.

ރާއްޖޭގައި ނަސްރުގެ ދުވަސް ފާހަގަކުރަނީ 1988 ވަނަ އަހަރުގެ ނޮވެމްބަރު މަހުގެ 3 ވަނަ ދުވަހު ދިވެހިންގެ މަދު ބަޔަކު ސްރީލަންކާގެ ޕްލޮޓް ޖަމާއަތުގެ ތަމަޅަ ހަނގުރާމަވެރިންނާ ގުޅިގެން ރާއްޖެއަށް ދިން އުދުވާނީ ހަމަލާ ނާކާމިޔާބުކޮށްލައި ދިވެހިންނަށް ލިބުނު ނަސްރުގެ ހަނދާން އާކުރުމުގެ ގޮތުންނެވެ. އެ ނުރައްކާތެރި ހަމަލާގައި ސިފައިންގެ 8 ބޭކަލަކާއި އާންމުންގެ 11 މީހުންނާއެކު ޖުމްލަ 19 ދިވެހިން ވަނީ ޝަހީދުވެފައެވެ.

އުދުވާނީ ހަމަލާ ނާކާމިޔާބުވުމުން ތަމަޅަ ހަނގުރާމަވެރިން "ޕްރޮގްރެސް ލައިޓް" ނަމަކަށް ކިޔާ މުދާ އުފުލާ ބޯޓެއްގައި ފިލައިގެން ދާން މަސައްކަތް ކުރަނިކޮށް، އިންޑިއާ ސިފައިން ވަނީ ކަނޑުމަތިން އެ ބޯޓު ހުއްޓުވައި ހަމަލާދީ ފައްތާލާފައެވެ. އަދި މި ހަމަލާގެ އިސް މޭސްތިރިން ކަމަށްވާ ހާޖަރާގޭ އަބްދުﷲ ލުތުފީއާއި ސަގަރު އަހުމަދު ނާސިރު މާލެ ގެނެސް، ރަހީނުކުރި ގިނަ ބަޔަކު ވަނީ ސަލާމަތްކޮށްފައެވެ.

މި އުދުވާނީ ހަމަލާއާ ގުޅިގެން ލުތުފީއާއި ނާސިރުގެ މައްޗަށް ހައިކޯޓުން މަރުގެ އަދަބު ކަނޑައެޅި ނަމަވެސް، އޭރުގެ ރައީސުލްޖުމްހޫރިއްޔާ މައުމޫން އަބްދުލްގައްޔޫމް ވަނީ ގާނޫނުއަސާސީން ލިބިދޭ ބާރުގެ ދަށުން އެ އަދަބު އުމުރު ދުވަހުގެ ޖަލު ހުކުމަކަށް ލުއިކޮށްދެއްވާފައެވެ.