މަޤާމުން ވަކިވެ ޖަލަށް ދާންޖެހިދާނެތީ، އިދިކޮޅު އިއްތިޙާދު ރޫޅާލަން ނަތަންޔާހޫ ފަހު ވަގުތު ތެޅިފޮޅެނީ!
އިޒްރޭލުގެ ޢާންމު އިންތިޚާބުގެ ރަސްމީ ނަތީޖާއާއެކު ވެރިކަން ގެއްލުމުގެ ބިރު ބޮޑުވެ، މަޤާމުން ވަކިވާންޖެހިއްޖެ ނަމަ ކޮރަޕްޝަންގެ މައްސަލަތަކުގައި ޖަލަށް ދާންޖެހިދާނެތީ، ބޮޑުވަޒީރު ބެންޖަމިން ނަތަންޔާހޫ އިދިކޮޅު އިއްތިޙާދު ރޫޅާލުމަށް ފަހު ވަގުތު އާދޭހާއެކު ތެޅިފޮޅެން ފަށައިފިއެވެ.
އޮކްޓޫބަރު 27 ގައި ބޭއްވުނު އިންތިޚާބުން ނަތަންޔާހޫގެ ކަނާތު ފިޔައިގެ ކޯލިޝަނަށް ކްނެސެޓް (ޤާނޫނުހަދާ މަޖިލިސް) ގެ އަޣްލަބިއްޔަތު ގެއްލި، ލިބިފައިވަނީ އެންމެ 53 ގޮނޑިއެވެ. އައު ސަރުކާރެއް އެކުލަވައިލުމަށް 61 ގޮނޑި ބޭނުންވާއިރު، ނަތަންޔާހޫގެ އިއްތިހާދީ ބައިވެރިއެއް ކަމަށްވާ "ޔުނައިޓެޑް ޓޯރާ ޖުޑާއިޒަމް" ޕާޓީން ވެސް ވަނީ އޭނާއަށް ތާއީދު ނުކުރަން ނިންމާފައެވެ. މިއާ ޚިލާފަށް، ކުރީގެ އަސްކަރީ ވެރިޔާ ގާޑީ އެއިސެންކޮޓް އިސްވެ ހުންނަވާ އިދިކޮޅު ބްލޮކަށް އަރަބި ޕާޓީތަކުގެ ތާއީދާއެކު ޖުމްލަ 67 ގޮނޑީގެ ބާރުގަދަ އަޣްލަބިއްޔަތެއް ވަނީ ކަށަވަރުވެފައެވެ.

މަސްރަޙު ދިރާސާކުރާ ފަރާތްތަކުން ބުނާގޮތުގައި، ބޮޑުވަޒީރުކަމުގެ މަޤާމުން ވަކިވެއްޖެ ނަމަ، ނަތަންޔާހޫގެ މައްޗަށް ދައުލަތުން އުފުލާފައިވާ ރިޝްވަތާއި ޚިޔާނާތުގެ ބޮޑެތި ޖިނާއީ ދަޢުވާތަކުން އޭނާއަށް ލިބިދޭ ޤާނޫނީ ޙިމާޔަތް (އިމިއުނިޓީ) އެއްކޮށް ގެއްލޭނެއެވެ. މިއާއެކު އޭނާގެ މުޅި ސިޔާސީ ޙަޔާތް ނިމުމަކަށް އައިސް، ދިގު މުއްދަތަކަށް ޖަލަށް ދާންޖެހުމުގެ ފުރުޞަތު އޮތީ ވަރަށް ބޮޑުވެފައެވެ.
Ads by BMLމި ޤާނޫނީ މަޅިންނާއި ޖަލުގެ ބިރުން ސަލާމަތްވުމަށްޓަކައި، ނަތަންޔާހޫ މިހާރު ދަނީ އިދިކޮޅު އިއްތިޙާދުގެ ތެރޭގައި ހިމެނޭ ވަކިވަކި މެންބަރުންނަށް ބޮޑެތި އިނާޔަތްތަކާއި މަޤާމުތަކުގެ ދަހިވެތިކަން ހުށަހަޅައި، އެ ކޯލިޝަން ރޫޅާލުމަށް ކެނޑިނޭޅޭ މަސައްކަތްތަކެއް ކުރަމުންނެވެ. ނަމަވެސް، އިދިކޮޅު ފަރާތްތަކުން ތިބީ ނަތަންޔާހޫގެ ޒަމާންވީ ވެރިކަން ނިމުމަކަށް ގެނައުމަށް ސާބިތުކަމާއެކު އެއްގަލަކަށް އަރައެވެ.
އިޒްރޭލުގެ ރައީސް އައިޒަކް ހަރުޒޮގް އަންނަ އާދިއްތަ ދުވަހު އައު ސަރުކާރު އެކުލަވައިލުމުގެ ފުރުޞަތު ރަސްމީކޮށް ހަވާލުކުރާނެ ފަރާތެއް އިޢުލާންކުރައްވާނެއެވެ. އައު ކޯލިޝަނެއް އެކުލަވައިނުލެވިއްޖެ ނަމަ، 2027 ގެ ކުރީކޮޅު އަނެއްކާވެސް އިތުރު އިންތިޚާބަކަށް ދާންޖެހުން ގާތެވެ.
Ads by MACL
