ފުވައްމުލަކު މަގުހެދުމުގެ ދެވަނަ ފިޔަވަހީގެ މަސައްކަތް ބާރުދުވެލީގައި ކުރިއަށް
ޏ. ފުވައްމުލަކު އެތެރޭގެ މަގުތައް ހެދުމުގެ ދެވަނަ ފިޔަވަހީގެ މަސައްކަތްތައް ބާރުދުވެލީގައި ކުރިއަށްދާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިން ހާމަކޮށްފިއެވެ.
އެމްޓީސީސީން ހާމަކޮށްފައިވާ ގޮތުގައި، ފުވައްމުލަކު އެތެރޭގެ މަގުތައް ފަރުމާކުރުމާއި ބިނާކުރުމުގެ މަޝްރޫޢުގެ ދެވަނަ ފިޔަވަހީގެ ދަށުން މިހާރު ސައިޓުގައި ކުރިއަށްދަނީ ސެޓްލްމަންޓް ޓޭންކުތައް ބެހެއްޓުމާއި، ހޮޅި އެޅުމުގެ މަސައްކަތްތަކެވެ. މީގެ އިތުރުން ކޭބަލް ޖަންކްޝަން ބޮކްސްތައް ހަރުކުރުމުގެ މަސައްކަތްތައް ވެސް މިހާރު ހަލުވިކަމާއެކު ކުރިއަށްދާ ކަމަށް އެ ކުންފުނިން ބުނެއެވެ.
ފުވައްމުލަކުގެ މަގުތައް ޒަމާނީ ފެންވަރަށް ތަރައްޤީކުރުމަށް ކުރިއަށްގެންދާ މި މަޝްރޫޢަކީ އެ ރަށުގެ ރައްޔިތުންނަށް ދިމާވެފައިވާ ދަތުރުފަތުރުގެ ދަތިތަކަށް ބޮޑު ހައްލެއް ހޯދައިދިނުމަށްޓަކައި ސަރުކާރުން ކުރިއަށްގެންދާ މުހިންމު އުމްރާނީ ތަރައްޤީގެ މަޝްރޫޢެކެވެ.
Ads by BMLމި މަޝްރޫޢާ ގުޅޭ އިތުރު މަޢުލޫމާތާއި ފަހުގެ އަދާހަމަތައް އެމްޓީސީސީ ޕްރޮޖެކްޓްސް ޕޯޓަލް މެދުވެރިކޮށް ބަލައިލެވޭނެ ކަމަށްވެސް އެ ކުންފުނިން މަޢުލޫމާތުދެއެވެ.
Ads by MACL
