ބުދަ، 18 ނޮވެމްބަރު 2026
ޚަބަރު

ތަލަވުމަށް އުންމީދީ ޙައްލެއް: 30 ދުވަހުން އިސްތަށި ފަޅުވާ ފުނަލެއް އުފައްދައިފި

ތަލަވުމަށް އުންމީދީ ޙައްލެއް: 30 ދުވަހުން އިސްތަށި ފަޅުވާ ފުނަލެއް އުފައްދައިފި

އެންމެ 30 ދުވަހުގެ ތެރޭގައި އިސްތަށިގަނޑު ގާތްގަނޑަކަށް އެއްކޮށް އަލުން ފަޅުވައިދޭ ޒަމާނީ އިލެކްޓްރިކް ފުނަލެއް ޗައިނާގެ ސައިންސްވެރިންގެ ޓީމަކުން ތަޙުލީލުކޮށް ކާމިޔާބުކަމާއެކު އުފައްދައިފިއެވެ.

ޗައިނާގެ ބެއިހާންގް ޔުނިވަރސިޓީގެ ދިރާސާ ޓީމަކުން އުފެއްދި "ޑިޓޭންގަލް" ނަމަކަށް ކިޔާ މި ފުނާ ބޭނުންކޮށްގެން މީދަލުގައި ކުރި ތަޙުލީލުތަކުގައި، 30 ދުވަހުގެ ތެރޭގައި ގާތްގަނޑަކަށް 100 އިންސައްތަ އިސްތަށި ވަނީ އަލުން ފަޅުވައިދީފައެވެ. މި ދިރާސާގެ މުހިންމު ހޯދުންތައް ވަނީ ސައިންސްގެ މަޝްހޫރު ޖާނަލްއެއް ކަމަށްވާ "ނޭޗަރ ކޮމިއުނިކޭޝަންސް" ގައި މި މަހު ޝާއިޢުކޮށްފައެވެ.

ދިރާސާގައި ބަޔާންކޮށްފައިވާ ގޮތުގައި، މި ފުނާ މަސައްކަތްކުރަނީ ފުނަލުގެ ދަތްތަކުގައި ހަރުކޮށްފައިވާ އިލެކްޓްރޯޑްތަކުން ބޮލުގެ ހަންގަނޑަށް މަޑު އިލެކްޓްރިކް ޕަލްސްތަކެއް ފޮނުވައިދީގެންނެވެ. މީގެ ސަބަބުން ހަންގަނޑުގެ ބޭރު ފަށަލަ ހުޅުވި، އިސްތަށި ފޭބުމަށް މެދުވެރިވާ ހޯމޯން ކަމަށްވާ "ޑައިހައިޑްރޯޓެސްޓޮސްޓެރޯން" އުފައްދާ އެންޒައިމް ހުއްޓުވައިދޭ މާއްދާތައް، ހަންގަނޑުގެ އަޑީގައި ހުންނަ އިސްތަށީގެ ބުޑުތަކާ ހަމައަށް ފަސޭހައިން ވާސިލުވެއެވެ. އާންމުކޮށް ހަންގަނޑުގައި އުނގުޅާ ބޭސްތަކަށްވުރެ ނުވަ ގުނަ ފުންމިނަށް މި ފުނާ މެދުވެރިކޮށް ބޭސް ފޯރުކޮށްދެވޭ ކަމަށް ދިރާސާވެރިން ހާމަކުރެއެވެ.

ޖަނަވާރުން ބޭނުންކޮށްގެން ކުރި މި ތަޙުލީލުތަކުގައި، އިސްތަށި ފޭބުމަށް މިހާރު އާންމުކޮށް ބޭނުންކުރާ "މިނޮކްސިޑިލް" ފަދަ ބޭސްތަކަށްވުރެ މި ފުނަލުން ލިބުނު ނަތީޖާ މާ ބޮޑަށްވެސް ރަނގަޅެވެ. އެގޮތުން، މިނޮކްސިޑިލް ބޭނުންކުރި ގުރޫޕުން 70 އިންސައްތަ އިސްތަށި ފެޅިއިރު، ޑިޓޭންގަލް ފުނާ ބޭނުންކުރި ގުރޫޕުން ގާތްގަނޑަކަށް 100 އިންސައްތަ އިސްތަށި ވަނީ ފަޅާފައެވެ. އަދި މި ފަރުވާގެ ސަބަބުން ހަންގަނޑަށް އެއްވެސް ގެއްލުމެއް ލިބިފައި ނުވާކަންވެސް ދިރާސާގައި ފާހަގަކޮށްފައިވެއެވެ.

ބެއިހާންގް ޔުނިވަރސިޓީގެ ސައިންސްވެރިން ވިދާޅުވި ގޮތުގައި، މި ފުނާ މެދުވެރިކޮށް ދޭ އިލެކްޓްރިކް ޕަލްސްތަކަކީ އިސްތަށީގެ ބުޑުތައް އަލުން އާލާކޮށް، އިސްތަށި ފެޅުމަށް ބާރުއަޅާ ރައްކާތެރި އަދި ނަތީޖާ ނެރެދޭ ނިޒާމެކެވެ. މީގެ އިތުރުން، ހަމުގެ އެކި ބަލިތަކަށް ފަރުވާ ދިނުމުގައި ހަންގަނޑުގެ އެތެރެއަށް ބޭސް ފޯރުކޮށްދިނުމަށްވެސް މި ޓެކްނޮލޮޖީ ބޭނުންކުރެވިދާނެ ކަމަށް އެ ޓީމުން ލަފާކުރެއެވެ.

ދުނިޔޭގެ އާބާދީގެ 1.5 ބިލިއަނަށްވުރެ ގިނަ މީހުންނަށް ދިމާވެފައިވާ ތަލަވުމުގެ މައްސަލައަށް މިއީ އުންމީދީ ޙައްލެއް ނަމަވެސް، މިއީ އަދި ހަމައެކަނި މީދަލަށް ކުރި ތަޙުލީލެއްކަން ސައިންސްވެރިން ހަނދާންކޮށްދެއެވެ. އެހެންކަމުން، އިންސާނުންނަށް މި ފުނާ ބޭނުންކުރުމަކީ ރައްކާތެރި އަދި ފައިދާހުރި ކަމެއްތޯ ޔަޤީންކުރުމަށް، ކުރިއަށް އޮތް ތަނުގައި އިންސާނުންގެ ކްލިނިކަލް ޓްރަޔަލްތައް ހަދަންޖެހޭނެއެވެ.