ބުދަ، 18 ނޮވެމްބަރު 2026
ޚަބަރު

ނ. ހެނބަދޫގައި އަލަށް އިމާރާތްކުރާ މިސްކިތުގެ ބިންގާ އަޅައިފި.

ނ. ހެނބަދޫ މިސްކިތުގެ ބިންގާ އެޅުން. ފޮޓޯ ރައީސް އޮފީސް
ނ. ހެނބަދޫ މިސްކިތުގެ ބިންގާ އެޅުން. ފޮޓޯ ރައީސް އޮފީސް

މިލަދުންމަޑުލު ދެކުނުބުރީ ހެނބަދޫގައި އަލަށް އިމާރާތްކުރާ މިސްކިތުގެ އަމަލީ މަސައްކަތް ފެށުމުގެ ގޮތުން މިސްކިތުގެ ބިންގާއެޅުމުގެ ރަސްމިއްޔާތު ބާއްވައިފިއެވެ.

ހެނބަދޫ މިސްކިތުގެ ބިންގާ އަޅައި ޢަމަލީ މަސައްކަތް ފަށާފައިވަނީ ރައީސުލްޖުމްހޫރިއްޔާ މިލަދުންމަޑުލު ދެކުނުބުރީގެ ބައެއް ރަށްރަށަށް ކުރައްވަމުން ގެންދަވާ ދަތުރުފުޅުގެ ތެރެއިން ހެނބަދޫގައި މިކަމަށްޓަކއި ބޭއްވި ރަސްމިއްޔާތެއްގައެވެ.

މި ރަސްމިއްޔާތުގައި ރައީސުލްޖުމްހޫރިއްޔާ ޑރ. މުހައްމަދު މުއިއްޒު، އަދި އިސްލާމީ ކަންކަމާބެހޭ ވަޒީރު ޑރ. މުހައްމަދު ޝަހީމް އަލީ ސައީދުގެ އިތުރުން ދައުލަތުގެ ވަޒީރުންނާއި ރަށުގެ މުއަައްސަސާތަކުގެ ވެރިން ބައިވެރިވަޑައިގެންނެވިއެވެ. އަދި މި ރަސްމިއްޔާތުގެ ތެރެއިން މިސްކިތުގެ ބިންގާ އަޅުއްވާދެއްވީ ވަޒީރު ޑރ. މުހައްމަދު ޝަހީމް އަލީ ސައީދުއެވެ.

ރަށްރަށުގެ ތަރައްޤީއަށް ގިނަ މަސައްކަތްތަކެއް ފެނަކަ އަދި އެމްޓީސީސީއާ ގުޅިގެން ކުރިއަށްގެންދާއިރު، މި މަސައްކަތަކީވެސް ފެނަކަ ކޯޕަރޭޝަން ލިމިޓެޑްއާއި ހަވާލުކޮށްގެން ކުރެވޭ މަސައްކަތެކެވެ.

ރައީސުލްޖުމްހޫރިއްޔާ ޑރ.މުހައްމަދު މުއިއްޒު މިމަހުގެ 21 އިން 25އަށް ނ.އަތޮޅަށް ކުރައްވާ ދަތުރުފުޅުގެ އެ އަތޮޅު  13 ރަށަކަށް ވަޑައިގަންނަވާނެއެވެ.