ބުދަ، 18 ނޮވެމްބަރު 2026
ޚަބަރު

އިންޑިއާއާ އެކު ފުޅާ އިގްތިސާދީ އެއްބަސްވުމަކަށް ރާއްޖެއިން މަޝްވަރާ ކުރަނީ

އިންޑިއާއާ އެކު ފުޅާ އިގްތިސާދީ އެއްބަސްވުމަކަށް ރާއްޖެއިން މަޝްވަރާ ކުރަނީ

ރާއްޖެ އާއި އިންޑިއާއާ ދެމެދު މިނިވަން ވިޔަފާރީގެ އެއްބަސްވުމަކާއި (އެފްޓީއޭ) އަދި އިންވެސްޓްމެންޓް ޓްރީޓީއެއް ގާއިމުކުރުމުގެ ރަސްމީ މަޝްވަރާތައް ފަށާފައިވާ ކަމަށް އިންޑިއާ ސަރުކާރުން ހާމަކޮށްފި އެވެ. މިކަން ހާމަކުރީ، އިންޑިއާގެ ބޮޑުވަޒީރު ނަރެންދުރަ މޯދީ، ރައީސް ޑރ. މުހައްމަދު މުއިއްޒުގެ ދައުވަތަކަށް ރާއްޖެއަށް ކުރައްވާ ފުރަމާނަ ދަތުރުފުޅުގެ ކުރިންނެވެ.

އިންޑިއާގެ ފޮރިން ސެކްރެޓަރީ ވިކްރަމް މިސްރީ ވިދާޅުވީ، މޯދީގެ ދަތުރުފުޅުގައި ދެ ގައުމުގެ އިގްތިސާދީ ގުޅުން ވަރުގަދަކުރުމަށްޓަކައި މުހިންމު މަޝްވަރާތަކެއް ކުރެވިގެންދާނެ ކަމަށެވެ. އޭގެ ތެރޭގައި އިޔާދަކުރަނިވި ހަކަތަ، މަސްވެރިކަން އަދި އުމްރާނީ ތަރައްގީ ފަދަ ދާއިރާތަކުން އިންވެސްޓްމެންޓް ފުރުސަތުތައް އިތުރުކުރުމާ ގުޅޭގޮތުން ވާހަކަ ދެކެވޭނެ އެވެ.

މިހާރު ވެސް ދެ ގައުމުގެ ވިޔަފާރީގެ އަގު 500 މިލިއަން ޑޮލަރަށް (7.7 ބިލިއަން ރުފިޔާ) އަރާއިރު، މި އެއްބަސްވުންތަކުގެ މަގުސަދަކީ އާ ދާއިރާތަކަށް ވިޔަފާރި ފުޅާކޮށް، އިގްތިސާދީ ގުޅުން އިތުރަށް ހަރުދަނާކުރުމެވެ. ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން ވެސް އިންޑިއާއާ އެކު ވިޔަފާރީގެ ހާއްސަ އެއްބަސްވުމެއް އެކުލަވާލުމުގެ މަސައްކަތް ފަށާފައިވާކަން ފާހަގަކޮށްލެވެ އެވެ.

އިގްތިސާދީ ގުޅުމުގެ އިތުރުން، އިންޑިއާއިން ހިންގާ ތަމްރީނާއި ތަރައްގީގެ ޕްރޮގްރާމުތަކުން ރާއްޖެއަށް ބޮޑެތި ފައިދާތަކެއް ލިބޭކަން ފާހަގަކުރައްވައި ވިކްރަމް ވިދާޅުވީ، ކެޕޭސިޓީ ބިލްޑިންގެ އިތުރު ޕްރޮގްރާމުތައް ހިންގުމަށް ރާވާފައިވާ ކަމަށެވެ. އަދި ކަނޑުގެ ސަލާމަތީ ކަންކަން ބެލެހެއްޓުމުގައި ރާއްޖެއަށް އެހީވުމުގެ ގޮތުން އިތުރު އުޅަނދުތަކާއި އެހެނިހެން ވަސީލަތްތައް ފޯރުކޮށްދޭނެ ކަމަށް ވެސް އޭނާ ޔަގީންކަން ދެއްވި އެވެ.

ބޮޑުވަޒީރު މޯދީ ރާއްޖެއަށް ވަޑައިގަންނަވަނީ ރާއްޖޭގެ 60 ވަނަ މިނިވަން ދުވަހުގެ ހަރަކާތްތަކުގައި ބައިވެރިވެވަޑައިގަތުމަށް އެންމެ ޝަރަފުވެރި މެހުމާނުގެ ހައިސިއްޔަތުންނެވެ. އެމަނިކުފާނު އަންނަ ހޮނިހިރު ދުވަހު ރާއްޖެއަށް ވަޑައިގެންނެވި ނަމަވެސް، އެ ދުވަހުގެ ހެނދުނު ބާއްވާ މިނިވަން ދުވަހުގެ ރަސްމީ ޖަލްސާގެ ކުރިން ފުރާވަޑައިގަންނަވާނެ ކަމަށް މައުލޫމާތު ލިބެ އެވެ.

މޯދީގެ މި ދަތުރުފުޅުގައި ރާއްޖޭގެ އުމްރާނީ ތަރައްގީއާ ގުޅުން ހުރި އާ މަޝްރޫއުތަކެއް އިއުލާނުކުރާނެ ކަމަށް ބެލެވޭ ކަމަށާއި، މި ދަތުރުފުޅާއެކު ދެ ގައުމުގެ ގުޅުން އާ ހަރުފަތަކަށް ދާނެ ކަމުގެ އުންމީދު ބޮޑު ކަމަށް ވިކްރަމް ވިދާޅުވި އެވެ.