ދިވެހިރާއްޖެއާއި އިންޑިއާއިން މަސްވެރިކަމުގެ ދާއިރާ ތަރައްޤީކުރުމަށް ފަހުމުނާމާއެއްގައި ސޮއިކޮށްފި
ދިވެހިރާއްޖޭގެ މަސްވެރިކަމުގެ ސިނާޢަތު ހަރުދަނާކޮށް، ދެ ޤައުމުގެ ދެމެދުގައި މި ދާއިރާއިން އޮންނަ ގުޅުން އިތުރަށް ބަދަހިކުރުމުގެ މަޤްޞަދުގައި، ދިވެހި ސަރުކާރާއި އިންޑިއާ ސަރުކާރާ ދެމެދު ޚާއްޞަ ފަހުމުނާމާއެއްގައި ސޮއިކޮށްފިއެވެ.
މި ފަހުމުނާމާގައި ސޮއިކުރެވިފައިވަނީ ރާއްޖޭގެ މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސް އާއި އިންޑިއާގެ މިނިސްޓްރީ އޮފް ފިޝަރީޒް، އެނިމަލް ހަސްބަންޑްރީ އެންޑް ޑެއިރީންގެ ދަށުން ހިނގާ ޑިޕާޓްމަންޓް އޮފް ފިޝަރީޒްއާ ދެމެދުގައެވެ.
މިނިސްޓްރީ އޮފް ފިޝަރީޒް އިން ނެރުނު ބަޔާނެއްގައިވާ ގޮތުން، މި އެއްބަސްވުމުގެ މައިގަނޑު މަޤްޞަދުތަކުގެ ތެރޭގައި ދެމެހެއްޓެނިވި ގޮތެއްގައި މަސްވެރިކަން ކުރުމާއި، އެކުއަކަލްޗަރ ތަރައްޤީކުރުމާއި، އަދި ތިމާވެއްޓާ ރައްޓެހި ފިޝަރީޒް-ޓޫރިޒަމް ކުރިއެރުވުން ހިމެނެއެވެ.
Ads by BMLމި ފަހުމުނާމާގެ ދަށުން ދެ ޤައުމުން އެއްބާރުލުން ދިނުމަށް ހަމަޖެހިފައިވާ މުހިންމު ކަންކަމުގެ ތެރޭގައި:
-
ދެމެހެއްޓެނިވި ގޮތުގައި ކަނޑުމަހުގެ މަސްވެރިކަން ކުރިއެރުވުން.
-
އެކުއަކަލްޗަރ ތަރައްޤީކުރުމާއި، ރާއްޖޭގެ މެރިކަލްޗަރ ދާއިރާގައި އަމިއްލަ ފަރާތްތަކުގެ ބައިވެރިވުން އިތުރުކުރުން.
-
މަސްވެރިކަމުގެ ވެލިއު ޗެއިން ތަރައްޤީކުރުން.
-
ސައިންޓިފިކް ދިރާސާތަކާއި ތަމްރީނު ޕްރޮގްރާމްތަކުގައި އެއްބާރުލުން ދިނުން.
-
މި ދާއިރާގައި އިންވެސްޓްމަންޓް ފުރުސަތުތައް ފަހިކޮށްދިނުން.
މިނިސްޓްރީން ފާހަގަކުރާ ގޮތުގައި، މިއީ ދެ ޤައުމުންވެސް ތިމާވެށި ރައްކާތެރިކޮށް، މަސްވެރިކަމުގެ ވަސީލަތްތައް ދެމެހެއްޓެނިވި ގޮތެއްގައި ބޭނުންކުރުމަށް ދޭ އަހައްމިއްޔަތު ހާމަކޮށްދޭ ކަމެކެވެ.
މި ފަހުމުނާމާއަކީ ދެ ޤައުމުގެ ދެމެދުގައި އޮތް ގާތް ގުޅުން އިތުރަށް ހަރުދަނާވެ، ދެ ޤައުމުގެ މަސްވެރިކަމުގެ ސިނާޢަތަށް ފައިދާހުރި، އީޖާބީ ނަތީޖާތަކެއް ނެރެދޭނެ މުހިންމު ފިޔަވަޅެއް ކަމަށް އުންމީދުކުރާ ކަމަށްވެސް މިނިސްޓްރީގެ ބަޔާނުގައިވެއެވެ.
Ads by MACL
