ލަންކާއިން ދިވެހިންނަށް އެއް އަހަރުގެ މަލްޓިޕަލް-އެންޓްރީ ވިސާ ދޫކުރަން ނިންމައިފި
ސްރީލަންކާ ސަރުކާރުން އެ ޤައުމުގެ ފަތުރުވެރިކަން އިތުރަށް ކުރިއެރުވުމަށް އަޅަމުންދާ ފިޔަވަޅުތަކުގެ ތެރެއިން، ދިވެހިންނަށް އެއް އަހަރުގެ މަލްޓިޕަލް-އެންޓްރީ ވިސާ ދޫކުރަން ނިންމައިފި އެވެ.
އަންނަ އޯގަސްޓް މަހުގެ އެއްވަނަ ދުވަހުން ފެށިގެން މި ޚިދުމަތް ފަށާނެކަން އެ ޤައުމުގެ ޚާރިޖީ ވަޒީރު، ވިޖިތް ހެރަތް ވަނީ ކަށަވަރުކޮށްދެއްވާފައެވެ.
ކޮލޮމްބޯގައި ވާހަކަ ދައްކަވަމުން ވަޒީރު ހެރަތް ފާހަގަކުރެއްވި ގޮތުގައި، މީގެ ކުރިން ދިވެހިންނަށް ދޫކުރަމުން އައީ ވަކި ޝަރުތުތަކަކާއެކު ކުރު މުއްދަތުގެ ވިސާ އެކަންޏެވެ. މިކަމުގެ ސަބަބުން، ޚާއްޞަކޮށް ބޭސްފަރުވާއަށާއި އެހެނިހެން ބޭނުންތަކަށް ދިގު މުއްދަތަކަށް ލަންކާގައި މަޑުކުރަން ބޭނުންވާ ދިވެހިންނަށް ގިނަ ދަތިތަކަކާ ކުރިމަތިލާން ޖެހުނު ކަމަށް އޭނާ ވިދާޅުވިއެވެ. "އެހެންކަމުން އަޅުގަނޑުމެން މި ނިންމުން ބަދަލުކޮށް، ދިވެހިންނަށް މި ފަސޭހަ ހޯދައިދޭން ނިންމީ،" ވަޒީރު ވިދާޅުވި އެވެ.
Ads by BMLދިވެހިންނަށް ވިސާގެ އިންތިޒާމުތައް ފަސޭހަކޮށްދިނުމަކީ ސްރީލަންކާގެ ފަތުރުވެރިކަމުގެ ސިނާޢަތް ދިރުވުމަށް އެ ޤައުމުން ހިންގާ ބޮޑު ޕްރޮގްރާމެއްގެ ބައެކެވެ.
މިހާރުވެސް ޗައިނާ، އިންޑިއާ، ރަޝިޔާ، އަދި ޖަޕާން ފަދަ 7 ޤައުމަކަށް ހިލޭ ވިސާ ދޫކުރަމުން އަންނައިރު، މި ސްކީމް އިތުރު 40 އަށްވުރެ ގިނަ ޤައުމަށް ފުޅާކުރުމަށް ކެބިނެޓުން ނިންމާފައިވާ ކަމަށް ވަޒީރު ހެރަތް ވިދާޅުވިއެވެ. މި ނިންމުމުގެ ސަބަބުން ސަރުކާރަށް ވިސާ ފީގެ ގޮތުގައި ލިބޭ ގާތްގަނޑަކަށް 66 މިލިއަން ޑޮލަރުގެ އާމްދަނީއަކުން މަޙްރޫމް ވާނެ ކަމަށް ވެސް އޭނާ ފާހަގަކުރެއްވި އެވެ.
މި ނިންމުން އައިސްފައި މިވަނީ ސްރީލަންކާގެ ރައީސް، އަނުރާ ކުމާރާ ޑިސަނާޔަކަ، އަންނަ ހަފްތާގައި ރާއްޖެއަށް ކުރެއްވުމަށް ހަމަޖެހިފައިވާ ރަސްމީ ދަތުރުފުޅެއްގެ ކުރިން ކަން ފާހަގަކޮށްލެވެއެވެ.
މިއީ ދެ ޤައުމުގެ ދެމެދުގައި އޮންނަ ގާތް ގުޅުން އިތުރަށް ބަދަހިވެގެންދާނެ ކަމެއްގެ ގޮތުގައި ބެލެވެއެވެ. ފާހަގަކޮށްލަންޖެހޭ އަނެއް ކަމަކީ، ދިވެހިރާއްޖެއިން ސްރީލަންކާގެ ރައްޔިތުންނަށް ވިސާ އާ ނުލައި ރާއްޖެ އެތެރެވެވޭނެ އިންތިޒާމު މިހާރުވެސް ހަމަޖައްސާދީފައިވާ ކަމެވެ.
މި އާ އިންތިޒާމުގެ ދަށުން ދިވެހިންނަށް ލިބިގެންދާ އެއް އަހަރު ދުވަހުގެ ވިސާއަކީ ޒަމާނުއްސުރެ ދިވެހިންނާއި ސްރީލަންކާއާ ދެމެދު އޮންނަ ތާރީޚީ އަދި ސަގާފީ ގުޅުންތަކަށް ލިބިގެންދާނެ އިތުރު ހިތްވަރެކެވެ. އަދި ޞިއްޙީ، ތަޢުލީމީ އަދި ވިޔަފާރީގެ ބޭނުންތަކަށް ސްރީލަންކާއަށް ދަތުރުކުރާ ދިވެހިންނަށް މިއީ ވަރަށް ބޮޑު ލުއިފަސޭހައަކަށް ވެގެންދާނެއެވެ.
Ads by MACL
