މިނިވަން ދުވަހުގެ ހެޔޮއެދުމާއި ތަހުނިޔާ، ޗައިނާގެ ރައީސް ޝީ ޖިންޕިން، ރައީސް ޑރ. މުޙައްމަދު މުޢިއްޒުއަށް ފޮނުއްވައިފި
ދިވެހިރާއްޖޭގެ 60 ވަނަ މިނިވަން ދުވަހުގެ ހެޔޮއެދުމާއި ތަހުނިޔާ، ޗައިނާގެ ރައީސް ޝީ ޖިންޕިން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއަށް ފޮނުއްވައިފިއެވެ.
މި ތަހުނިޔާގެ މެސެޖުގައި، ދެ ޤައުމުގެ ދެމެދުގައިވާ 'ފުޅާ ދާއިރާއެއްގައި އެކުވެރިކަމާއެކު އޮންނަ އިސްތިރާޖީ ބައިވެރިކަން އިތުރަށް ހަރުދަނާކުރުމުގެ ޢަޒުމް ޗައިނާގެ ރައީސް ވަނީ އައުކުރައްވާފައެވެ.
މިދިޔަ ޖެނުއަރީ މަހު ރައީސް ޑރ. މުޙައްމަދު މުޢިއްޒު، ޗައިނާއަށް ކުރެއްވި ފުރަމާނަ ދަތުރުފުޅަކީ ދެ ޤައުމުގެ ގުޅުމުގައި އާ ބާބެއް ފެށިގެން ދިޔަ، ކާމިޔާބު ދަތުރުފުޅެއްކަން ރައީސް ޝީ ފާހަގަކުރެއްވިއެވެ. އެއީ ރައީސް މުޢިއްޒުގެ ފުރަތަމަ ފުރަމާނަ ދަތުރުފުޅުކަމުން، އެމަނިކުފާނުގެ ސަރުކާރުގެ ޚާރިޖީ ސިޔާސަތުގައި ޗައިނާއަށް ދެއްވާ އަހައްމިއްޔަތުކަން ހާމަވެގެންދާކަމަށް އޭރުވެސް ފާހަގަކުރެވިފައިވެއެވެ.
Ads by BMLމި ދަތުރުފުޅުގެ ތެރެއިން ދެ ޤައުމުގެ ދެމެދުގައި ވަނީ 20 އެއްބަސްވުމެއްގައި ސޮއިކޮށްފައެވެ. އޭގެ ތެރޭގައި، އިޤްތިޞާދީ އަދި ފަންނީ އެހީތެރިކަން ފޯރުކޮށްދިނުމާއި، 'ބެލްޓް އެންޑް ރޯޑް' މަޝްރޫޢުގެ ދަށުން ގުޅުންތައް ވަރުގަދަކުރުމާއި، ރަސްމާލެ ތަރައްގީކުރުމާއި، ފަތުރުވެރިކަމާއި ޑިޖިޓަލް އިކޮނޮމީ ފަދަ ދާއިރާތައް ހިމެނެއެވެ.
ރައީސް މުޢިއްޒުއާއެކު މަސައްކަތްކުރެއްވުމަށް އޮތް ޝައުޤުވެރިކަން ފާޅުކުރައްވަމުން ޝީ ވިދާޅުވީ، ދެ ޤައުމުގެ ގުޅުން ކުރިއެރުވުމަށް ޚާއްޞަ އިސްކަމެއް ދެއްވާ ކަމަށެވެ.
"އަޅުގަނޑު ޗައިނާ-ދިވެހިރާއްޖެ ގުޅުމުގެ ތަރައްޤީއަށް ވަރަށް ބޮޑު އަހައްމިއްޔަތުކަމެއް ދެން. އަދި، ރައީސް ޑރ. މުޙައްމަދު މުޢިއްޒުއާއެކު، ޗައިނާ-ދިވެހިރާއްޖޭގެ ފުޅާ ދާއިރާއެއްގައި އެކުވެރިކަމާއެކު އޮންނަ އިސްތިރާޖީ ބައިވެރިކަން އިތުރަށް ކުރިއެރުވުމަށާއި، ޗައިނާ-ދިވެހިރާއްޖޭގެ މުސްތަޤުބަލު ބިނާކުރުމުގައި އެކުގައި މަސައްކަތްކުރުމަށް ބޭނުންވޭ،" ރައީސް ޝީގެ މެސެޖުގައި ވިދާޅުވެފައިވެއެވެ.
ޗައިނާއާއި ރާއްޖެއާ ދެމެދު ޑިޕްލޮމެޓިކް ގުޅުން ޤާއިމުކުރެވުނީ 1972 ވަނަ އަހަރުއެވެ. އެ ފަހުން ދެ ޤައުމުގެ ގުޅުން ހަރުދަނާކަމާއެކު ކުރިއަރަމުން އަންނަކަން ފާހަގަކުރައްވަމުން ރައީސް ޝީ ވިދާޅުވީ، ސައިޒުގެ ގޮތުން ތަފާތު ދެ ޤައުމު، ހަމަހަމަކަމާއި އެއްބައިވަންތަކަމާއެކު ގުޅުން ބަދަހިކޮށް، ދެފަރާތަށްވެސް ފައިދާހުރި ގޮތެއްގައި މަސައްކަތްކުރުމުގެ ފުރިހަމަ ނަމޫނާއެއްކަމަށެވެ. ސިނަމާލެ ބްރިޖު ފަދަ ބޮޑެތި މަޝްރޫޢުތަކަކީ މި ގުޅުމުގެ ދިރުންހުރި އަލާމާތެކެވެ.
މީގެ އިތުރުން، ޗައިނާގެ ޚާރިޖީ ވަޒީރު އަދި ޗައިނާގެ ކޮމިއުނިސްޓު ޕާޓީގެ ސެންޓްރަލް ކޮމިޓީގެ ޕޮލިޓިކަލް ބިއުރޯގެ މެމްބަރު ވޭންގ ޔީ ވެސް ވަނީ، މިނިވަން ދުވަހުގެ މުނާސަބަތުގައި، ދިވެހިރާއްޖޭގެ ޚާރިޖީ ވަޒީރު ޢަބްދުﷲ ޚަލީލަށް ތަހުނިޔާގެ ޚާއްޞަ މެސެޖެއް ފޮނުއްވާފައެވެ. މިއީ ދެ ޤައުމުގެ ދެމެދުގައި ހުރިހާ ފަންތިއެއްގައިވެސް ގާތް ގުޅުމެއް އޮންނަކަން ދައްކުވައިދޭ ކަމެކެވެ.
Ads by MACL
