ވެހިކަލް ދުއްވުން މިހާރު ހުއްދަ، އެކަމަކު ފުލުހުންނާއި ސިފައިންގެ ބޭނުމަށް ބަންދުކުރާ މަގުތަކުގައި ދުއްވުން މަނާވާނެ!
މާލޭ ސަރަޙައްދުގައި އެއްގަމު އުޅަނދު ދުއްވުން މިވަގުތު އާންމުކޮށް ހުއްދަ ނަމަވެސް، މިނިވަން ދުވަހުގެ ހަރަކާތްތަކާ ގުޅިގެން 3 ދުވަހަށް، ވަކި ގަޑިތަކެއްގައި، ބައެއް އުޅަނދުތައް ދުއްވުން މަނާކޮށްފައިވާކަން ޓްރާންސްޕޯޓް މިނިސްޓްރީން އިއުލާނުކޮށްފިއެވެ.
މި އިއުލާނުގައިވާ ގޮތުން، ސަލާމަތީ ބާރުތަކުގެ އުޅަނދުތައް ފިޔަވައި އެހެން އުޅަނދުތަކަށް މި މަނާ ގަޑިތަކުގައި މަގުތަކަށް ނުނިކުމެވޭނެއެވެ.
ޓްރާންސްޕޯޓް މިނިސްޓްރީން ނެރުނު އިއުލާނުގައިވާ ގޮތުން، ދިވެހިރާއްޖޭގެ 60 ވަނަ މިނިވަން ދުވަހުގެ ހަރަކާތްތައް ކުރިއަށް ގެންދިއުމަށްޓަކައި، މަގުމަތީގެ ސަލާމަތާއި ރައްކާތެރިކަން ކަށަވަރުކުރުމުގެ ގޮތުން ގްރޭޓަރ މާލެ ސަރަޙައްދުގައި އުޅަނދު ދުއްވުން މަނާ ވަގުތުތައް ވަނީ ކަނޑައަޅާފައެވެ. އެގޮތުން:
Ads by BML-
26 ޖުލައި 2025: ހަވީރު 3:00 އިން ހަވީރު 6:30 އަށް، ހުރިހާ ބާވަތެއްގެ އެއްގަމު އުޅަނދު ދުއްވުން މަނާ.
-
27 ޖުލައި 2025: އިރުއޮއްސި 6:00 އިން ދަންވަރު 12:00 އަށް، V, C0, C2, D, E އަކުރުން ފެށޭ ނަންބަރު ޕްލޭޓުގެ ސައިކަލު ދުއްވުން މަނާ.
މި ގަޑިތަކުގައި ދުއްވުން މަނާކުރި ނަމަވެސް، ބައެއް އުޅަނދުތައް މި މަނަލުން ވަނީ އިސްތިސްނާކޮށްފައެވެ. އޭގެ ތެރޭގައި ސަލާމަތީ ބާރުތަކުން (ފުލުހުންނާއި ސިފައިން) ބޭނުންކުރާ އުޅަނދުތަކާއި، އެމްބިއުލާންސް އަދި އެއްގަމު ދަތުރުފަތުރުގެ ޤާނޫނުގެ ދަށުން ޓްރާންސްޕޯޓް މިނިސްޓްރީން ހާއްސަ ހުއްދަ ދީފައިވާ އުޅަނދުތައް ހިމެނެއެވެ.
މި ބަދަލުތައް ގެނެސްފައިވަނީ އެއްގަމު ދަތުރުފަތުރުގެ ޤާނޫނު (5/2009)ގެ 5 ވަނަ މާއްދާގެ (ޅ) އިން މިނިސްޓްރީއަށް ލިބިދޭ ބާރުގެ ދަށުންނެވެ. އާންމުން މި ވަގުތުތަކަށް ސަމާލުވުމަށް އިއުލާނުގައި އިލްތިމާސްކޮށްފައިވެއެވެ.
Ads by MACL
