ބުދަ، 18 ނޮވެމްބަރު 2026
ޚަބަރު

ޤައުމީ ފަޚުރާއެކު އައު ޓާމިނަލްގެ ފެށުން: މޯލްޑިވިއަން ކްރޫން ޤައުމީ ހެދުމުގައި ޚިދުމަތަށް

ދިވެހި ހެދުމުގައި މޯލްޑިވިއަންގެ ކްރޫއިން-- ފޮޓޯ / މޯލްޑިވިއަން
ދިވެހި ހެދުމުގައި މޯލްޑިވިއަންގެ ކްރޫއިން-- ފޮޓޯ / މޯލްޑިވިއަން

ވެލާނާ އިންޓަނޭޝަނަލް އެއާޕޯޓުގެ އައު ޓާމިނަލުން ޚިދުމަތް ދިނުން ފަށާ ތާރީޚީ ވަގުތުކޮޅު، ޤައުމީ ފަޚުރާއި ދިވެހިވަންތަކަމުން ވިދާލުމަށް ޤައުމީ އެއާލައިން، މޯލްޑިވިއަންގެ ކްރޫން ޤައުމީ ހެދުމުގައި ޚިދުމަތަށް ނުކުތުމަށް ތައްޔާރުވެއްޖެއެވެ.

މި ފަޚުރުވެރި ފެށުމާއެކު، އައު ޓާމިނަލަށް ޖައްސާ ފުރަތަމަ ފްލައިޓަށް މަރުޙަބާ ކިޔާނީ، ދިވެހިވަންތަ ރީތި ހެދުންތަކުގައި ތިބި މޯލްޑިވިއަންގެ ފަޅުވެރިންނެވެ.

އައު ޓާމިނަލުން ޚިދުމަތްދޭ ފުރަތަމަ ފްލައިޓުގެ ޝަރަފު ލިބިފައިވަނީ، މިއަދު މެންދުރު 14:00 ހާއިރު އިންޑިއާގެ ކޮޗިންއިން އަންނަ މޯލްޑިވިއަންގެ އޭ330 މަރުކާގެ ބޯޓަށެވެ.

މި ހާއްސަ ދަތުރަކީ، ދިވެހިރާއްޖޭގެ 60 ވަނަ މިނިވަން ދުވަހާ ދިމާކޮށް ހުޅުވި ޒަމާނީ ޓާމިނަލްގެ އާ ޞަފްޙާއެއްގެ ފެށުންކަން މޯލްޑިވިއަންގެ ކްރޫންގެ ހެދުމުން ރަމްޒުކޮށްދެއެވެ.

ނުވަ އަހަރުގެ އިންތިޒާރަކަށް ފަހު ހުޅުވި މި ޓާމިނަލަކީ 457 މިލިއަން ޑޮލަރު ޚަރަދުކޮށްގެން ތަރައްޤީކުރި ތަނެކެވެ. މި ޓާމިނަލްގެ ފަރުމާއިންވެސް ދިވެހިވަންތަކަން ވަރަށް ބޮޑަށް ފެނިގެންދެއެވެ. ޓާމިނަލްގެ ބޭރުގައިވާ ހިރިގަލުގެ ފަންނުވެރި ކެނޑުންތަކުން ދިވެހި ތާރީޚާއި ސަޤާފަތް ދައްކުވައިދޭއިރު، އެތެރޭގެ ފަރުމާއިން ރާއްޖޭގެ ގުދުރަތީ ރީތިކަން ހާމަވެއެވެ.

މި ތާރީޚީ ފްލައިޓަށްފަހު މޯލްޑިވިއަންގެ ހުރިހާ ދަތުރެއް އައު ޓާމިނަލުން ކުރިއަށްގެންދާނެއެވެ. އަދި ވީއައިއޭއަށް ދަތުރުކުރާ އަނެއް 34 އެއާލައިނަށްވެސް މަޑުމަޑުން ޚިދުމަތް ފުޅާކޮށް، އަންނަ ސެޕްޓެމްބަރު މަހުގެ ނިޔަލަށް އެންމެންގެ އޮޕަރޭޝަންތައް އައު ޓާމިނަލަށް ބަދަލުކުރުމަށް އެމްއޭސީއެލްއިން އަންނަނީ މަސައްކަތް ކުރަމުންނެވެ.

އައު ޓާމިނަލާއެކު، އަހަރަކު 7.5 މިލިއަން ފަސިންޖަރުންނަށް ޚިދުމަތް ދިނުމުގެ ޤާބިލުކަން ލިބި، 12 އޭރޯބްރިޖާއެކު ފަސިންޖަރުންނަށް ބޮޑެތި ފަސޭހަތަކެއް ލިބިގެންދާނެއެވެ.