ކުރިއަށް އޮތް ދެ ދުވަހު ރާއްޖޭގެ ހުރިހާ ހިސާބަކަށް ވިއްސާރަކުރާނެ: މެޓްއޮފީސް
މިނިވަން ދުވަހުގެ ދިގު ބަންދާ ދިމާކޮށް ގިނަ ބަޔަކު ރަށްރަށަށް ދަތުރުކޮށްފައިވާ އިރު، ކުރިއަށް އޮތް ދެ ދުވަހު ރާއްޖޭގެ ހުރިހާ ހިސާބަކަށް ވިއްސާރަކުރާނެ ކަމަށް މޫސުމާ ބެހޭ ގައުމީ އިދާރާ (މެޓް އޮފީސް) އިން ލަފާކޮށްފިއެވެ. އަދި އޭގެ އިތުރުން، ކުރިއަށް އޮތް ފަސް ދުވަސް ވަންދެން ދެކުނުގެ އަތޮޅުތަކަށް ވައިގަދަވާނެ ކަމަށްވެސް އެ އިދާރާއިން ވަނީ ބުނެފައެވެ.
މެޓް އޮފީހުން އިތުރަށް ވިދާޅުވާ ގޮތުގައި، ދެކުނުގެ އަތޮޅުތަކަށް ވިއްސާރައިގެ އަސަރު ދިގުލައިގެން ދާނެއެވެ. ނަމަވެސް އުތުރާއި މެދުރާއްޖެތެރޭގެ އަތޮޅުތަކަށް ބުރާސްފަތި ދުވަހުން ފެށިގެން ކެރީގެ އަސަރު ކުޑަވާނެއެވެ. ވައި މަޑުވުމަށް ބަލާއިރު، އުތުރުގެ އަތޮޅުތަކަށް ބުދަ ދުވަހަށް ފަހު ވައި މަޑުވާން ފަށާއިރު، މެދުރާއްޖެތެރެއަށް ވައި މަޑުވާނީ ހުކުރު ދުވަހުން ފެށިގެންނެވެ.
މޫސުމާ ބެހޭ ލަފާތަކަށް ބަލާއިރު، ގުގުރުމާއެކު ވިއްސާރަކުރުމުގެ އިތުރުން، ހާއްސަކޮށް ދެކުނުގެ ބައެއް ރަށްތަކަށް ބޯކޮށް ވާރޭވެހުން އެކަށީގެންވެއެވެ. އުތުރުގެ އަތޮޅުތަކަށް ހުޅަނގާއި ހުޅަނގު އުތުރުން، އަދި އެހެން ހިސާބުތަކަށް އިރާއި އިރުދެކުނުން ގަޑިއަކު 7 މޭލާއި 17 މޭލާ ދެމެދުގެ ބާރުމިނުގައި ވައިޖެހޭނެއެވެ. އަދި ވިލާގަނޑުގައި ވައިގެ ބާރު ގަޑިއަކު 40 މޭލަށް ގަދަވެދާނެ ކަމަށް މެޓުން ލަފާކުރެއެވެ.
Ads by BMLމިކަމަށް އިތުރު ބާރެއް ލިބެނީ، ފާއިތުވި 24 ގަޑިއިރުގެ ތަފާސްހިސާބުތަކުންނެވެ. އެގޮތުން، އެންމެ ގިނަ ވާރޭ ވެހިފައިވަނީ ގދ. ކާޑެއްދޫއަށް ކަމަށާއި، އެރަށަށް 33.7 މިލިމީޓަރުގެ ވާރޭ ވެހިފައިވެއެވެ. ދެވަނައަށް އެންމެ ގިނައިން ވާރޭ ވެހުނީ 22.5 މިލިމީޓަރުން ފުވައްމުލަކަށެވެ. މިއީ ދިވެހި ނަކަތްތެރިކަމަށް ބަލާއިރު ފުސް ނަކަތުގެ ފަހު ދުވަސް ކަމުގައި ވާއިރު، މާދަމާ ފެށޭ އަހުލިހަ ނަކަތުގައި އާންމުކޮށް ވިއްސާރަ މަޑުވާނެ ކަމަށް ބެލެވެއެވެ.
މޫސުން ގޯސްވުމުން ލިބިދާނެ ގެއްލުމުގެ ސީރިއަސްކަން، ފަހުގެ ހާދިސާއަކުންވެސް ވަނީ ހާމަވެފައެވެ. މީގެ އެންމެ ހަފްތާއެއްހާ ދުވަސް ކުރިން ކުރި ގަދަ ވިއްސާރައެއްގައި ހއ. މުރައިދޫގައި މީހުން ދިރިއުޅޭ ތިން ގެއަކާއި އެރަށު ކައުންސިލް އިދާރާގެ ފުރާޅު ވަނީ އެއްލާލާފައެވެ.
Ads by MACL
