ނުރަސްމީ ދަތުރުފުޅެއްގައި ރައީސް ސިންގަޕޫރަށް ވަޑައިގެންފި
ސިންގަޕޫރަށް ފުރަމާނަ ދަތުރުފުޅެއް ކުރެއްވިތާ މަހެއްވެސް ނުވަނީސް، ރައީސުލްޖުމްހޫރިއްޔާ ޑރ. މުޙައްމަދު މުއިއްޒު، ރޭގެ ވަގުތެއްގައި އަނެއްކާވެސް އެ ޤައުމަށް ވަޑައިގެންފިއެވެ. ނަމަވެސް މިފަހަރުގެ މި ދަތުރުފުޅަކީ ނުރަސްމީ، އަމިއްލަފުޅު ދަތުރުފުޅެކެވެ.
މި ދަތުރުފުޅަކީ ރައީސްގެ އަމިއްލަފުޅު ދަތުރުފުޅަކަށްވާތީ، ދަތުރުފުޅުގެ މަޤްޞަދާއި، އެމަނިކުފާނު އެނބުރި ވަޑައިގަންނަވާނެ ދުވަހެއް ފަދަ އިތުރު ތަފްޞީލެއް ރައީސް އޮފީހުން ހާމައެއް ނުކުރައްވައެވެ.
ރައީސް މުއިއްޒު މި ދަތުރުފުޅު ކުރައްވާފައި މިވަނީ، މިދިޔަ މަހުގެ 29 އިން މިމަހުގެ 2 ވަނަ ދުވަހުގެ ނިޔަލަށް ސިންގަޕޫރަށް ކުރެއްވި ފުރަމާނަ ދަތުރުފުޅަށްފަހު ވަރަށް ކުޑަ ދުވަސްކޮޅެއްގެ ތެރޭގައެވެ.
Ads by BMLއެ ފުރަމާނަ ދަތުރުފުޅުގައި ދެ ޤައުމުގެ ދެމެދުގައި އިޤްތިޞާދީ އަދި އިޖްތިމާޢީ ގުޅުންތައް އިތުރަށް ބަދަހިކުރުމާ ގުޅޭގޮތުން ވަނީ ފުޅާ ދާއިރާއެއްގައި މަޝްވަރާ ކުރައްވާފައެވެ. އެގޮތުން ވިޔަފާރިއާއި، ޢުމްރާނީ ތަރައްޤީގެ މަޝްރޫޢުތަކާއި، ދެ ޤައުމުގެ ދެމެދުގައި ހުނަރުވެރިން ބަދަލުކުރުން ފަދަ މުހިންމު ކަންކަމާ ގުޅޭގޮތުން ވަނީ ވާހަކަފުޅު ދައްކަވާފައެވެ.
Ads by MACL
