ބުދަ، 18 ނޮވެމްބަރު 2026
ޚަބަރު

ސަރުކާރުގެ ވައުދާ އެއްގޮތަށް، ބޯންމެރޯ ޓްރާންސްޕްލާންޓަށް މިމަހު 7 ކުއްޖަކު ފުރަނީ

ބޯންމެރޯ ހެދުމަށް ފޮނުވާ ހަތް ކުދިންނާ، ހެލްތް މިނިސްޓަރު ބައްދަލުކުރެއްވުން-- ފޮޓޯ / ހެލްތް މިނިސްޓްރީ
ބޯންމެރޯ ހެދުމަށް ފޮނުވާ ހަތް ކުދިންނާ، ހެލްތް މިނިސްޓަރު ބައްދަލުކުރެއްވުން-- ފޮޓޯ / ހެލްތް މިނިސްޓްރީ

ސަރުކާރުގެ "ހަފުތާ 14" ވައުދުގެ ދަށުން، ކޮންމެ އަހަރަކު ތެލަސީމިއާ 10 ކުދިންނަށް ބޯންމެރޯ ޓްރާންސްޕްލާންޓް ހަދައިދިނުމަށް ހަމަޖެހިފައިވާ ގޮތުގެ މަތިން، ބާކީ ތިބި ހަތް ކުއްޖަކު މިމަހުގެ ތެރޭގައި ފަރުވާއަށް ފުރުމަށް ތައްޔާރުވެއްޖެއެވެ.

ތެލަސީމިއާގެ ފަރުވާ ހޯދާ ފަރާތްތަކަށް ހިލޭ ބޯންމެރޯ ޓްރާންސްޕްލާންޓްގެ ޚިދުމަތް ފަހިކޮށްދިނުމަކީ ރައީސް ޑރ. މުޙައްމަދު މުޢިއްޒުގެ ސަރުކާރުގެ މުހިންމު ވައުދެކެވެ. މިކަން ހަޤީޤަތަކަށް ހެދުމަށްޓަކައި، ޒަކާތު ފަންޑުން ޚަރަދުކޮށްގެން އަހަރަކު 10 ކުއްޖަކަށް ފަރުވާ ދިނުމަށް އިސްލާމިކް މިނިސްޓްރީއާއި ހެލްތު މިނިސްޓްރީއާ ދެމެދު ވަނީ މިދިޔަ އަހަރު އެއްބަސްވުމެއް ޤާއިމުކޮށްފައެވެ.

މި އެއްބަސްވުމުގެ ދަށުން، މި އަހަރަށް ކަނޑައެޅި 10 ކުދިންގެ ތެރެއިން 3 ކުއްޖަކު މީގެކުރިން އޭޕްރީލް މަހު ފަރުވާއަށް ފޮނުވާފައިވެއެވެ. ބާކީ ތިބި 7 ކުދިން މިމަހުގެ ތާވަލަކާ އެއްގޮތަށް ފުރާނެކަމަށް ހެލްތު މިނިސްޓްރީން ބުނެއެވެ.

ކުދިން ފުރާނެކަމަށް ހަމަޖެހިފައިވާ ތާވަލް:

  • އޮގަސްޓް 4: ތިން ކުއްޖަކު

  • އޮގަސްޓް 5: އެއް ކުއްޖަކު

  • އޮގަސްޓް 8: އެއް ކުއްޖަކު

  • އޮގަސްޓް 9: އެއް ކުއްޖަކު

  • އޮގަސްޓް 12: އެއް ކުއްޖަކު

ފަރުވާއަށް ފުރުމުގެ ކުރިން، މި ހަތް ކުދިންނާއި އެކުދިންގެ އާއިލާތަކާ ހެލްތު މިނިސްޓަރު ޢަބްދުﷲ ނާޒިމް އިބްރާހީމް ވަނީ ބައްދަލުކުރައްވައި ހިތްވަރު ދެއްވާފައެވެ.

މި ޕްރޮގްރާމުގެ ދަށުން، ފާއިތުވި އަހަރުވެސް 14 ކުއްޖަކު ބޯންމެރޯ ޓްރާންސްޕްލާންޓް ހެދުމަށް ރާއްޖެއިން ބޭރަށް ފޮނުވާފައިވެއެވެ. އެކުދިންގެ ތެރެއިން ބައެއް ކުދިން ފަރުވާ ފުރިހަމަކޮށް ރާއްޖެ އައިސްފައިވާއިރު، އަނެއްބައި ކުދިންގެ ފަރުވާ އަދިވެސް ކުރިއަށް އެބަދެއެވެ.