ހަމައެކަނި އިމާރާތްތަކެއް ނޫން؛ 2040 ގައި ރައީސް މުޢިއްޒު ކުރެއްސެވި އައު ރާއްޖެ އޮންނާނީ ކިހިނެއް؟
ޤައުމީ ތަރައްޤީއަކީ ހަމައެކަނި ލޮލަށް ފެންނަ އުމްރާނީ ބިނާތަކާއި އިމާރާތްތައް އެޅުން ނޫންކަމަށާއި، 2040 ވަނަ އަހަރާ ހަމައަށް ދިވެހިރާއްޖެ ތަރައްޤީވެފައިވާ ޤައުމަކަށް ހެދުމަށް އެކުލަވާލައްވާ ތަޞައްވުރު ބިނާވެފައިވަނީ އިސްލާމްދީނުގެ ވަރުގަދަ ބިންގަލާއި، އަޚްލާޤީ ރީތި ސިފަތަކުގެ މައްޗަށް ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.
ސަރުކާރަށް ތިން އަހަރު ފުރުމުގެ މުނާސަބަތުގައި ހުޅުމާލޭ ސެންޓްރަލް ޕާކުގައި ބޭއްވި ޚާއްޞަ ރަސްމިއްޔާތުގައި ޤައުމާ މުޚާޠަބުކުރައްވަމުން ރައީސުލްޖުމްހޫރިއްޔާ ވަނީ، ކުރިއަށް އޮތް ޖީލުތަކަށް އަމާން، ތަނަވަސް އަދި ފަޚުރުވެރި ދިވެހިރާއްޖެއެއް ބިނާކުރުމަށް އެމަނިކުފާނު ކުރެއްސެވި "ޤައުމީ ތަރައްޤީގެ ތަޞައްވުރު 2040" ގެ މައިގަނޑު އޮނިގަނޑު ރައްޔިތުންނަށް ޙިއްޞާކުރައްވާފައެވެ.
ދީނީ ބިންގަލާއި އިޙްތިރާމުގެ ހިޔާވެހިކަން
Ads by BMLރައީސުލްޖުމްހޫރިއްޔާ ވިދާޅުވި ގޮތުގައި، 2040 ގެ އައު ރާއްޖެ ބިނާކުރުމުގެ އެންމެ އަޑީގައިވާ ފައުންޑޭޝަން ނުވަތަ ބިންގަލަކީ މާތްވެގެންވާ އިސްލާމްދީނުގެ މަތިވެރި އުޞޫލުތަކެވެ. އަދި މުޅި ޤައުމު އެއްބައިވަންތަކޮށްދީ، ހުރިހާ ދާއިރާތައް ގުޅުވައިދޭ މައިގަނޑު ހިޔާވެހިކަމަކީ ދާދިފަހުން ސަރުކާރުން އިފްތިތާޙުކުރި "އިޙްތިރާމު އަދާކުރުމުގެ ޤައުމީ މަޝްރޫޢު" ގެ ދަށުން އާލާކުރެވޭ އެކަކު އަނެކަކަށް އިޙްތިރާމުކުރުމުގެ ސަޤާފަތެވެ.
އެމަނިކުފާނު ފާހަގަކުރެއްވި ގޮތުގައި، އުމްރާނީ ކުރިއެރުމާއެކު ދިވެހިންގެ އަޚްލާޤާއި، ފިކުރީ އަދި ރޫޙާނީ ތަރައްޤީ ކުރިއަރުވައި، މުޖުތަމަޢުގައި ހުރި ފުރައްސާރަކުރުމާއި، ނެތިމޮށުމާއި، ދޮގުހެދުން ފަދަ ނޭދެވޭ ސިފަތައް ނައްތާލައިގެން މެނުވީ ޙަޤީޤީ ދެމެހެއްޓެނިވި ތަރައްޤީއެއް ޙާޞިލެއް ނުކުރެވޭނެއެވެ.
އައު ރާއްޖެ އުފުލައިދޭނެ އަށް ތަނބު
އިސްލާމީ ބިންގަލާއި އިޙްތިރާމުގެ ހިޔާވެހިކަމުގެ ތެރެއިން 2040 ވަނަ އަހަރުގެ ތަރައްޤީވެފައިވާ ރާއްޖެ ބިނާކުރުމަށް ރައީސް ޑރ. މުޢިއްޒު ކަނޑައެޅުއްވި މައިގަނޑު އަށް ތަނބަކީ:
1. ފުދުންތެރި ޤައުމެއް: އިޤްތިޞާދީ ގޮތުން އަމިއްލަ ފައިމައްޗަށް ތެދުވެފައިވާ، ވިޔަފާރިއާއި އިންވެސްޓްމަންޓްތަކަށް ފަހި ދިވެހިރާއްޖެއެއް ބިނާކުރުން.
2. ސިޔާދަތީ މިނިވަންކަން: ޤައުމުގެ މިނިވަންކަމާއި އިސްތިޤްލާލު ދާއިމަށް ރައްކާތެރިކުރެވިފައިވާ، ދިފާޢީގޮތުން ޤާބިލު ޤައުމަކަށް ހެދުން.
3. ވިލުންވެރި މުޖުތަމަޢެއް: ތިމާވެށީގެ ގޮންޖެހުންތަކާއި އިޤްތިޞާދީ ލޮޅުންތަކުން އަރައިގަތުމުގެ ޤާބިލުކަން ލިބިފައިވާ ޤައުމެއް ބިނާކުރުން.
4. އެންމެން ޝާމިލުވާ ވެށްޓެއް: އެއްވެސް ރައްޔިތަކު ބާކީނުކޮށް، އިޖުތިމާޢީ ޢަދާލަތު ޤާއިމުކުރެވިފައިވާ މުޖުތަމަޢެއް އުފެއްދުން.
5. އުފެއްދުންތެރި ޖީލެއް: އީޖާދީ ވިސްނުމާއި ފަންނުވެރިކަމަށް ޖާގަދީ، ޒުވާނުންގެ ހުނަރުތައް ކުރިއެރުވުން.
6. ގުޅިލާމެހިފައިވާ ޤައުމެއް: ޒަމާނީ ޓެކްނޮލޮޖީއާއި ދަތުރުފަތުރުގެ ނިޒާމުން މުޅި ރާއްޖެ އެކަތިގަނޑެއްގެ ގޮތުގައި ގުޅުވާލުން.
7. ދުޅަހެޔޮ ރައްޔިތެއް: ޞިއްޙީ ދުޅަހެޔޮކަން ކަށަވަރުކުރެވިފައިވާ، ނުރައްކާތެރި ވަބާތަކުން ސަލާމަތްވެފައިވާ މުޖުތަމަޢެއް ބިނާކުރުން.
8. ހުނަރުވެރި އަދި އިތުބާރު ހިފޭ ނިޒާމެއް: ޢިލްމީ ގޮތުން ޤާބިލު، އަދި ދައުލަތުގެ މުއައްސަސާތަކަށް ރައްޔިތުންގެ ފުރިހަމަ އިތުބާރު އޮތް ހިންގުމުގެ ނިޒާމެއް ޤާއިމުކުރުން.
ޒަމާނީ ކުރިއެރުމާއެކު ދިވެހިވަންތަކަން ދެމެހެއްޓުން
ރައީސުލްޖުމްހޫރިއްޔާގެ ވާހަކަފުޅުގައި، ޒަމާނީ ޓެކްނޮލޮޖީއާއި ތަރައްޤީއާއެކު ދިވެހީންގެ ޤައުމީ އައިޑެންޓިޓީއާއި ތަރިކަ ރައްކާތެރިކުރުމުގެ މުހިންމުކަމަށްވެސް އަލިއަޅުއްވާލެއްވިއެވެ. އެގޮތުން، ކާބަފައިންގެ ކިބައިން ވާރުތަވެފައިވާ އިންސާނިއްޔަތުކަމާއި، ވަގުތަށް ޙުރުމަތްތެރިކޮށް ހިތުމާއި، ޒިންމާދާރުކަމާއެކު މަސައްކަތްކުރުމުގެ ރީތި ސިފަތައް އަލުން ދިރުވުމަށް ދައުލަތުގެ އިސްވެރިންނާއި، މުވައްޒަފުން އަދި ޢާންމު ރައްޔިތުން ގުޅިގެން މަސައްކަތްކުރުމަށް އެމަނިކުފާނު ގޮވާލެއްވިއެވެ.
ސަރުކާރުން ޤަބޫލުކުރާ ގޮތުގައި، ރައީސް ޑރ. މުޢިއްޒު ކުރެއްސެވި މި ތަޞައްވުރާއެކު 2040 ވަނަ އަހަރުގެ ދިވެހިރާއްޖެ ވެގެންދާނީ އިޤްތިޞާދީ ގޮތުން ފުދުންތެރި، އަޚްލާޤީ ގޮތުން ރީތި އަދި ދީނީ ޢަޤީދާގައި ސާބިތުވެ އޮންނާނެ ނަމޫނާ ޤައުމަކަށެވެ.
Ads by MACL
