ބުދަ، 18 ނޮވެމްބަރު 2026
ބްރޭކިންގ ބޮޑު އަގުގައި ޑޮލަރު ވިއްކި ތިން ތަނެއްގެ ލައިސަންސް ބާޠިލުކޮށް، އެއް މިލިއަން ރުފިޔާއިން ޖޫރިމަނާކޮށްފި
ޚަބަރު

ރައްޔިތުންގެ ޝަކުވާތައް ހުށަހަޅަން މާލެއާއި ހުޅުމާލޭގައި ސީ.ސީ.ބީގެ ދެ ލައުންޖު ހުޅުވައިފި

މާލޭގައި ހުޅުވި ސިޓިޒަންސް ކޮމްޕްލެއިންޓްސް ބިއުރޯ (ސީ.ސީ.ބީ) ގެ ލައުންޖުން ރައްޔިތަކަށް ޚިދުމަތް ފޯރުކޮށްދެނީ. (ފޮޓޯ: ރައީސުލްޖުމްހޫރިއްޔާގެ އޮފީސް)
މާލޭގައި ހުޅުވި ސިޓިޒަންސް ކޮމްޕްލެއިންޓްސް ބިއުރޯ (ސީ.ސީ.ބީ) ގެ ލައުންޖުން ރައްޔިތަކަށް ޚިދުމަތް ފޯރުކޮށްދެނީ. (ފޮޓޯ: ރައީސުލްޖުމްހޫރިއްޔާގެ އޮފީސް)

ހުށަހެޅުމުގެ ފުރުޞަތު ފަހިކޮށްދިނުމުގެ ގޮތުން، ސިޓިޒަންސް ކޮމްޕްލެއިންޓްސް ބިއުރޯ (ސީ.ސީ.ބީ) ގެ ދެ ލައުންޖު މާލެއާއި ހުޅުމާލޭގައި މިއަދު ހުޅުވައިފިއެވެ.

ރައީސުލްޖުމްހޫރިއްޔާގެ އޮފީހުން ހާމަކުރި ގޮތުގައި، މި ދެ ލައުންޖަކީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ރިޔާސީ ވަޢުދުފުޅާ އެއްގޮތަށް ޤާއިމުކުރެއްވި ސިޓިޒަންސް ކޮމްޕްލެއިންޓްސް ބިއުރޯގެ ޚިދުމަތްތައް ރައްޔިތުންނާ އިތުރަށް ގާތުން ފޯރުކޮށްދިނުމަށް އެޅުއްވި މުހިންމު ފިޔަވަޅެކެވެ.

މިގޮތުން، ރައްޔިތުންނަށް ފަސޭހައިން ޒިޔާރަތްކުރެވޭނެ ފަދަ ސަރަޙައްދުތަކެއްގައި ހުޅުވި މި ދެ ލައުންޖުގެ ތެރެއިން މާލޭގެ ލައުންޖު ޤާއިމުކޮށްފައިވަނީ ހުޅުމާލެ ފެރީ ޓާރމިނަލްގައެވެ. އަދި ހުޅުމާލެ ފޭސް 1 ގެ ލައުންޖު ހުންނާނީ އުމަރު ޒާހިރު ބިލްޑިންގގެ ތިރީ ފަންގިފިލާގައެވެ. ރައީސުލްޖުމްހޫރިއްޔާގެ އޮފީހުން ވިދާޅުވި ގޮތުގައި ސަރުކާރު ބަންދު ނޫން ކޮންމެ ދުވަހަކު ހެނދުނު 9:00 އިން މެންދުރުފަހު 3:00 އަށް މި ދެ ލައުންޖުން ޚިދުމަތް ލިބެން ހުންނާނެއެވެ. މީގެ އިތުރުން، ކުރިއަށް އޮތް ކައިރި މުސްތަޤުބަލެއްގައި ހުޅުމާލެ ފޭސް 2 ގައިވެސް ސީ.ސީ.ބީގެ ލައުންޖެއް ހުޅުވުމަށް ވަނީ ހަމަޖެހިފައެވެ.

ރައީސުލްޖުމްހޫރިއްޔާގެ ވަޢުދުފުޅާ އެއްގޮތަށް އެމަނިކުފާނުގެ އޮފީހުގައި ސިޓިޒަންސް ކޮމްޕްލެއިންޓްސް ބިއުރޯ އުފެއްދެވީ މި އަހަރުގެ އެޕްރީލް މަހުގެ 16 ވަނަ ދުވަހުއެވެ. ރައްޔިތުންގެ ޝަކުވާތަކާއި ކަންބޮޑުވުންތަކަށް މެދުކެނޑުމެއް ނެތި 24 ގަޑިއިރު އިޖާބަދިނުމަށް އުފެއްދެވި މި ބިއުރޯގެ ދަށުން، "ސިޓިޒަންސް ވޮއިސް" ގެ ނަމުގައި ޚާއްޞަ ވެބް ޕޯޓަލެއް އިފްތިތާޙުކޮށް، 24 ގަޑިއިރު ޚިދުމަތްދޭ ކޯލް ސެންޓަރެއްވެސް ވަނީ ޤާއިމުކޮށްފައެވެ.

އެހެންކަމުން، ލައުންޖުތަކަށް ޒިޔާރަތްކުރުމުގެ އިތުރުން، ސީ.ސީ.ބީގެ ހޮޓްލައިން ނަންބަރު 1470 އަށް ގުޅައިގެންނާއި ވެބް ޕޯޓަލް މެދުވެރިކޮށްވެސް ރައްޔިތުންނަށް ކޮންމެ ވަގުތަކުވެސް ޚިޔާލާއި ޝަކުވާ ހުށަހެޅުމުގެ އިންތިޒާމު މިހާރު ވަނީ ފަހިވެފައެވެ.