ދިފާޢީ ދާއިރާއިން ރާއްޖެއާއި ތުރުކީގެ ގުޅުން ބަދަހިކުރަނީ
ދިވެހިރާއްޖެއާއި ތުރުކީވިލާތާ ދެމެދު، ޚާއްޞަކޮށް ދިފާޢީ ދާއިރާއިން އޮންނަ ގުޅުން އިތުރަށް ހަރުދަނާކުރުމުގެ މައްޗަށް، ތުރުކީ ނޭވީގެ ފްލީޓް ކޮމާންޑަރ އެޑްމިރަލް ކާދިރް ޔިލްޑްޒް އާއި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ބޭއްވެވި ބައްދަލުކުރެއްވުމުގައި އަލިއަޅުއްވާލައްވައިފިއެވެ.
ރައީސުލްޖުމްހޫރިއްޔާގެ އޮފީހުގައި އޮތް މި ބައްދަލުކުރެއްވުމަކީ، އެޑްމިރަލް ޔިލްޑްޒް ރައީސުލްޖުމްހޫރިއްޔާގެ އަރިހަށް ކުރެއްވި އިޙްތިރާމްގެ ޒިޔާރަތެކެވެ.
މި ބައްދަލުކުރެއްވުމުގައި ރައީސް މުޢިއްޒު ވާހަކަފުޅު ދައްކަވަމުން، ދިވެހިރާއްޖެއަށް ތުރުކީ ސަރުކާރުން ހަދިޔާކުރެއްވި މަނަވަރަށް ޝުކުރު އަދާކުރެއްވިއެވެ. އެ މަނިކުފާނު ފާހަގަކުރެއްވި ގޮތުގައި، މި މަނަވަރަކީ ހަމައެކަނި އަސްކަރީ އެހީއެއް ނޫން ކަމަށާއި، އެއީ ދެ ޤައުމުގެ ދެމެދުގައިވާ އަޚުވަންތަކަމާއި އިތުބާރުގެ ވަރުގަދަ ރަމްޒެއް ކަމަށެވެ.
Ads by BMLމި ވާހަކަފުޅަށް ޖަވާބު ދެއްވަމުން އެޑްމިރަލް ޔިލްޑްޒް ވަނީ، ދެ ޤައުމުގެ ދެމެދުގައިވާ ގުޅުން، ޚާއްޞަކޮށް ކަނޑުގެ ސަލާމަތާއި ދިފާޢީ ދާއިރާއިން އިތުރަށް ބަދަހިކުރުމަށް މަސައްކަތްކުރައްވާނެކަމުގެ ފުރިހަމަ ޔަޤީންކަން ރައީސުލްޖުމްހޫރިއްޔާއަށް އަރުވާފައެވެ. ބައްދަލުކުރެއްވުން ނިންމަވާލައްވަމުން ދެ ބޭފުޅުންވެސް ވަނީ، ކުރިމަގުގައިވެސް ދެ ޤައުމުގެ ރައްޔިތުންގެ މަޞްލަޙަތު ހިމެނޭ ގޮތަށް ގުޅިގެން މަސައްކަތްކުރުމަށް އެއްބަސްވެވަޑައިގެންފައެވެ.
Ads by MACL
