2027ގެ ނިޔަލަށް ހުރިހާ ރަށަކަށް ފެނާއި ނަރުދަމާ: ޤާނޫނަށް ގެނައި އިޞްލާޙު ރައީސް ތަސްދީޤުކުރައްވައިފި
ދިވެހިރާއްޖޭގެ މީހުން ދިރިއުޅޭ ހުރިހާ ރަށެއްގައި 2027 ވަނަ އަހަރުގެ ނިޔަލަށް ފެނާއި ނަރުދަމާގެ ނިޒާމު ޤާއިމުކުރުމަށް މަގުފަހިކުރާ، ފެނާއި ނަރުދަމާގެ ޤާނޫނަށް ގެނައި ދެވަނަ އިޞްލާޙު، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު ތަސްދީޤުކުރައްވައިފިއެވެ. ސަރުކާރުގެ ފަރާތުން ހުށަހެޅުއްވި މި އިޞްލާޙުގެ މައިގަނޑު އަމާޒަކީ، ދައުލަތުގެ ކަމާބެހޭ އިދާރާތައް ގުޅިގެން، ރަށްރަށާ އެކަށީގެންވާ ފެންވަރުގެ ޚިދުމަތްތައް ކަނޑައެޅިފައިވާ މުއްދަތުގެ ތެރޭގައި ފޯރުކޮށްދިނުމެވެ.
މި އިޞްލާޙުގެ ދަށުން، ފެނާއި ނަރުދަމާގެ ދާއިރާ ހަރުދަނާކޮށް، ޚިދުމަތުގެ ފެންވަރު ރަނގަޅުކުރުމަށް އިތުރު ކަންތައްތަކެއް ވަނީ ހިމަނާފައެވެ. އޭގެތެރޭގައި، މި ޚިދުމަތްތައް ފޯރުކޮށްދިނުމުގައި ކައުންސިލުތަކަށް ބޭނުންވާ ފަންނީ އެހީތެރިކަން ފޯރުކޮށްދީ އެ ފަރާތްތަކުގެ ޤާބިލުކަން އިތުރުކުރުމާއި، ދާއިރާގައި މަސައްކަތްކުރާ ފަންނީ މީހުންނަށް ލައިސަންސް ދޫކުރުމުގެ އުސޫލުތައް ކަނޑައެޅުން ހިމެނެއެވެ. މީގެ އިތުރުން، ފެނުގެ ރައްކާތެރިކަން ކަށަވަރުކުރުމަށް ޓަކައި، ފެން ތަޙްލީލުކުރާ ލެބޯޓްރީތަކުން ޚިދުމަތް ދިނުމުގެ ޝަރުޠުތައްވެސް ބަޔާންކޮށްފައިވެއެވެ.
މި އިޞްލާޙަށް ޢަމަލުކުރަން ފެށުމާއެކު، ފެނާއި ނަރުދަމާގެ ނިޒާމު ނަހަމަ ގޮތުގައި ބޭނުންކުރާ ފަރާތްތަކާމެދު ފިޔަވަޅު އަޅައި އަދަބު ދިނުމުގެ ބާރު ލިބިގެންދެއެވެ. އަދި ޤާނޫނު ތަންފީޛުކުރުމަށް ބޭނުންވާ ގަވާއިދުތަކާއި އުސޫލުތައް، މިއަދުން ފެށިގެން 3 މަސް ދުވަހުގެ ތެރޭގައި އެކުލަވާލައި ޢާންމުކުރަންޖެހެއެވެ.
Ads by BMLރައްޔިތުންގެ މަޖިލީހުގެ 2024 ވަނަ އަހަރުގެ ދެވަނަ ދައުރުގައި ފާސްކުރެއްވި މި ބިލު، ރައީސުލްޖުމްހޫރިއްޔާ ތަސްދީޤުކުރައްވައި ދިވެހިސަރުކާރުގެ ގެޒެޓުގައި މިއަދު ޝާއިޢުކުރެއްވުމާއެކު، މި ޤާނޫނަށް ވަނީ ޢަމަލުކުރަން ފަށާފައެވެ.
Ads by MACL
