ގެދޮރުވެރިޔާ ފްލެޓް: މަޝްރޫއު ނިމުމަކާ ގާތްވަނީ، 1800 ފަރާތާއެކު އެއްބަސްވުން ހަދައިފި
ގެދޮރުވެރިޔާ ސްކީމްގެ ދަށުން ފްލެޓް ލިބުނު ފަރާތްތަކުގެ ތެރެއިން 1،800 އަށްވުރެ ގިނަ ފަރާތާއެކު އެއްބަސްވުމުގައި ސޮއިކޮށްފައިވާ ކަމަށް ފަހި ދިރިއުޅުން ކޯޕަރޭޝަން (އެފްޑީސީ) އިން ބުނެފި އެވެ. މި މަޝްރޫއު ނިމުމަކާ ގާތްވެފައިވާއިރު، އެއްބަސްވުންތަކުގައި ސޮއިކުރުމުގެ މަސައްކަތް ދަނީ ހަލުވިކަމާއެކު ކުރިއަށެވެ.
ކުރީގެ ރައީސް އިބްރާހިމް މުހައްމަދު ސޯލިހްގެ ސަރުކާރުން ފެށި، 4،000 ފްލެޓުގެ މި މަޝްރޫއަކީ އިންޑިއާގެ ޖޭއެމްސީ ޕްރޮޖެކްޓްސް ލިމިޓެޑާއި، ނެޝަނަލް ބިލްޑިންގްސް ކޮންސްޓްރަކްޝަން ކޮމްޕެނީ (އެންބީސީސީ) އާ ހަވާލުކޮށްގެން ހިންގާ މަޝްރޫއެކެވެ. ސޯޅަ ޓަވަރުގެ މައްޗަށް އެކުލެވޭ މި މަޝްރޫއުގެ މަސައްކަތުގެ 96 އިންސައްތަ މިހާރު ވަނީ ނިމިފަ އެވެ.
އެފްޑީސީން މި މަސައްކަތް ފަށާފައިވަނީ މާޗް މަހުގެ 21 ވަނަ ދުވަހުއެވެ. އެ ކޯޕަރޭޝަނުން މައުލޫމާތު ދޭ ގޮތުގައި، އެއްބަސްވުން ހެދުމަށް ޖުމްލަ 2،774 ފަރާތެއް ތާވަල්ކޮށްފައިވާއިރު، އޭގެ ތެރެއިން މިހާތަނަށް 1،826 ފަރާތަކާއެކު ވަނީ އެއްބަސްވުންތައް ފުރިހަމަކޮށްފަ އެވެ.
Ads by BMLއެއްބަސްވުންތަކުގައި ސޮއިކުރުމަށްފަހު، ފްލެޓްތަކުގެ ފިނިޝިން މަސައްކަތްތައް ނިންމާލުމަށްފަހު، ވެރިފަރާތްތަކާ ހަވާލުކުރާނެ ކަމަށް އެފްޑީސީން ބުނެއެވެ. ފްލެޓުތައް ހަވާލުކުރާނީ، ފަންކާ، ދޮރު، ކުޑަދޮރު، ޓައިލްސް، ކުލަ އަދި ފާޚާނާގެ ސާމާނު (ފާހާނާ ތައްޓާއި މޫނު ދޮންނަ ތަށި) ހިމެނޭ ގޮތަށް، އަސާސީ ގޮތުން ނިންމަންޖެހޭ ހުރިހާ ކަމެއް ފުރިހަމަކުރުމަށްފަހުގަ އެވެ.
Ads by MACL
