ބުދަ، 18 ނޮވެމްބަރު 2026
ޚަބަރު

3،000 މެމްބަރުން ހަމަނުކުރެވިގެން އަދީބުގެ އެމްޓީޑީ އުވާލައިފި

ކުރީގެ ނައިބު ރައީސް އަހުމަދު އަދީބު --
ކުރީގެ ނައިބު ރައީސް އަހުމަދު އަދީބު --

ކުރީގެ ނައިބު ރައީސް އަހުމަދު އަދީބު އިސްވެ ހުންނަވައިގެން އުފެއްދި ސިޔާސީ ޕާޓީ، މޯލްޑިވްސް ތާޑް-ވޭ ޑިމޮކްރެޓްސް (އެމްޓީޑީ) އުވާލުމަށް އިލެކްޝަންސް ކޮމިޝަނުން ނިންމައިފިއެވެ. މިގޮތަށް ނިންމީ ސިޔާސީ ޕާޓީއެއްގެ ގާނޫނީ އަދަދான 3،000 މެމްބަރުން ހަމަކުރުމަށް ދިން މުއްދަތުގައި އެ އަދަދު ހަމަކުރެވިފައި ނުވުމުންނެވެ.

ސިޔާސީ ޕާޓީތަކުގެ ގާނޫނު ބުނާ ގޮތުން، ޕާޓީއެއްގެ ދަފްތަރުގައި 3،000 މެމްބަރުން ހަމަނުވާނަމަ، އެ އަދަދު ހަމަކުރުމަށް އިލެކްޝަންސް ކޮމިޝަނުން ތިން މަސް ދުވަހުގެ މުއްދަތެއް ދޭންޖެހެ އެވެ. އެމްޓީޑީ އުވާލަން ނިންމީ، އެ ކޮމިޝަނުން ދިން މުއްދަތު ހަމަވިއިރުވެސް ގާނޫނީ އަދަދު ހަމަނުކުރެވުމުން ކަމަށް އިލެކްޝަންސް އިން ބުނެއެވެ.

މީގެ ކުރިން 2022 ވަނަ އަހަރު ވެސް އެމްޓީޑީގެ މެމްބަރުންގެ އަދަދު 3،000 އަށް ވުރެ ދަށްވެގެން އިލެކްޝަންސްއިން ވަނީ އެ ޕާޓީއަށް ނޯޓިސް ފޮނުވާފަ އެވެ. ނަމަވެސް، އޭރު ދިން މުއްދަތުގެ ތެރޭގައި އެމްޓީޑީން ވަނީ މެމްބަރުން ހަމަކޮށް، ޕާޓީ އުވިގެން ދިއުމުން ސަލާމަތްވެފަ އެވެ.

އިލެކްޝަންސް ކޮމިޝަނުން ގެޒެޓްގައި އާންމުކުރި އިއުލާނުގައި ބުނެފައިވަނީ ސިޔާސީ ޕާޓީގެ ގާނޫނުގެ 30 ވަނަ މާއްދާގެ (ހ) ގެ 1 ވަނަ ނަންބަރަށް ރިއާޔަތްކޮށް އެމްޓީޑީ އުވާލަން ނިންމާފައިވާ ކަމަށެވެ. އަދި އެ ޕާޓީގެ ފަރާތުން އަދާކުރަންޖެހޭ ދަރަންޏެއް ވާނަމަ، އަންނަ އޮގަސްޓު މަހުގެ 31 ގެ ކުރިން އެކަން ހުށަހަޅައިގެން ނިންމުމަށްވެސް އެ އިއުލާނުގައި އަންގާފައިވެއެވެ.