ކުރީގެ އިސްވެރިންނާއި ރިޓަޔަރ ކުރާ ފަރާތްތަކަށް ލިބޭ ބައެއް އިނާޔަތްތައް އުނިކުރުމަށް އިސްލާހެއް ސަރުކާރުން ހުށަހަޅަނީ
ކުރީގެ އިސްވެރިންނާއި ރިޓަޔަރ ކުރާ ފަރާތްތަކަށް ލިބޭ ބައެއް އިނާޔަތްތައް އުނިކުރުމަށް ގާނޫނު އަސާސީ އަށް އިސްލާހެއް ހުށަހަޅަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވައިފިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މިއަދު އެކްސްގައި ކުރެއްވި ޕޯސްޓެއްގައި ހާމަކުރައްވާފައިވާ ގޮތުގައި، ކުރީގެ ރައީސުލްޖުމްހޫރިއްޔާކަން ކޮށްފައިވާ ފަރާތްތަކަށާއި ރައްޔިތުންގެ މަޖިލީހުގެ މެންބަރުކަން ކޮށްފައިވާ ފަރާތްތަކަށް ޤާނޫނުތަކުން ލިބިދޭ ބައެއް އިނާޔަތްތައް އުނިކުރުމަށް ސަރުކާރުން ނިންމަވައި، މިކަމަށްޓަކައި ޤާނޫނުތަކަށް އިސްލާހުތައް ގެނައުމަށް ރައްޔިތުންގެ މަޖިލީހަށް ހުށަހެޅުމަށް ވަނީ ތައްޔާރުވެފައެވެ.
މި ނިންމުމަކީ ދައުލަތުގެ ބަޖެޓަށް ލުޔެއް ދިނުމާއި، އިނާޔަތްތައް ހަމަހަމަކުރުމުގެ ގޮތުން އަޅާ ފިޔަވަޅެއް ކަމަށް ރައީސް ވިދާޅުވިއެވެ. ޤާނޫނުތައް އިސްލާހުކުރުމަށް މަޖިލީހަށް ހުށަހެޅުމުން، މެންބަރުންގެ ބަހުސްތަކަށް ފަހު ވޯޓަށް އެހުމަށްފަހު ފާސްވާނެއެވެ.
Ads by BMLމީގެ އިތުރުން، ދައުލަތުގެ ވަޒީފާތަކުން ރިޓަޔަރ ކުރާ ފަރާތްތަކަށް ލިބެމުންދާ ޕެންޝަން އިނާޔަތްތައް އެއްހަމަ ކުރުމަށްޓަކައި ޤާނޫނުތަކާއި ޤަވާއިދުތަކަށް ގެންނަންޖެހޭ އިސްލާހުތައް ގެނައުމުގެ މަސައްކަތްވެސް މިހާރު ދަނީ ކުރެވެމުން ކަމަށް ރައީސް ޑރ. މުޢިއްޒު ވަނީ ވިދާޅުވެފައެވެ. މިގޮތުން، ދައުލަތުގެ ވަޒީފާއަކުން ރިޓަޔަރވުމުން ޕެންޝަން އިނާޔަތް ލިބެމުންދާ ފަރާތެއް އަލުން ދައުލަތުގެ ވަޒީފާއަކަށް އައުމުން، އެ ވަޒީފާގައި ހުންނަ މުއްދަތުގައި އެ އިނާޔަތް މެދުކަނޑާލަންޖެހޭ ގޮތަށް ޤަވާއިދުތައް އިސްލާހުކުރެވިގެންދާނެއެވެ.
މި ބަދަލުތަކުގެ ސަބަބުން ދައުލަތުގެ މާލީ ހާލަތަށް ހެޔޮ ބަދަލުތަކެއް އަންނާނެ ކަމަށް ސަރުކާރުން އުންމީދުކުރެއެވެ. އަދި، ރައްޔިތުންގެ މެދުގައި ހަމަހަމަކަން ޤާއިމުކުރުމަށް އެޅޭ ފިޔަވަޅެއްގެ ގޮތުގައި މިކަން ސިފަކުރެވެއެވެ. ޤަވާއިދުތަކަށް މިހާރު ގެނެވޭ އިސްލާހުތަކާއެކު، ޕެންޝަން ނިޒާމު އިތުރަށް ހަރުދަނާވެ، އޭގެ ހެޔޮ ފައިދާ ރައްޔިތުންނަށް ލިބިގެންދާނެ ކަމަށް ލަފާކުރެވެއެވެ.
ރައީސުލްޖުމްހޫރިއްޔާގެ މި ނިންމެވުމާއި ގުޅިގެން ޢާއްމުންގެ ތެރެއިން ތަފާތު ރައުޔުތައް ދަނީ ފާޅުވަމުންނެވެ. ބައެއް ފަރާތްތަކުން މިކަމަށް ތާއީދުކުރާއިރު، އަނެއް ބައި ފަރާތްތަކުން ދަނީ މިކަމުގެ ސަބަބުން ކުރިމަތިވެދާނެ ގޮންޖެހުންތަކާ މެދު ސުވާލު އުފައްދަމުންނެވެ. ޤާނޫނީ އިސްލާހުތައް މަޖިލީހަށް ހުށަހެޅުމަށްފަހު، މިކަން ތަންފީޒުވާނެ ގޮތް ބެލުމަށް ގިނަ ބަޔަކު އިންތިޒާރުކުރަމުން ދެއެވެ.
Ads by MACL
