ބަންޑާރަނައިބުގެ އޮފީހުގެ 75 އަހަރު ފާހަގަކުރުން: ހަނދާނީ ފޮތަކާ އޭއައި ޓެކްނޮލޮޖީއާއެކު އައު ވެބްސައިޓެއް އިފްތިތާހުކޮށްފި
ބަންޑާރަނައިބުގެ އޮފީހަށް 75 އަހަރު ފުރުމުގެ ޝަރަފުގައި ބޭއްވުނު ޚާއްސަ ރަސްމިއްޔާތެއްގައި، އެ އޮފީހުގެ ތާރީޚީ މުހިންމުކަން ރަމްޒުކޮށްދޭ ހަނދާނީ ފޮތެއް ނެރެ، ޒަމާނީ ޓެކްނޮލޮޖީގެ އެހީގައި ފަރުމާކުރެވިފައިވާ އައު ވެބްސައިޓެއް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ އިފްތިތާޙް ކޮށްދެއްވާފައެވެ. މި ވެބްސައިޓަކީ، ދިވެހި ސަރުކާރުގެ އިދާރާއެއްގެ ފަރާތުން ފުރަތަމަ ފަހަރަށް އާޓިފިޝަލް އިންޓެލިޖެންސް (އޭ.އައި) ބޭނުންކޮށްގެން ޤާނޫނީ މަޢުލޫމާތު ފޯރުކޮށްދޭ ޗެޓް ފީޗަރެއް ތަޢާރަފުކޮށްފައިވާ ވެބްސައިޓެކެވެ.
މި އައު ވެބްސައިޓް ފަރުމާކޮށްފައިވަނީ، ބޭނުންކުރާ ފަރާތްތަކަށް ފަސޭހަކަމާއެކު މަޢުލޫމާތު ހޯދޭނެ ގޮތަށެވެ. ޚާއްސަކޮށް ފާހަގަކޮށްލެވޭ އެއް ސިފައަކީ، ޤާނޫނީ މަޢުލޫމާތު ދިނުމަށް ވެބްސައިޓުގައި ހިމަނާފައިވާ އޭ.އައި. ޗެޓް ފީޗަރއެވެ. މިއީ ދިވެހިރާއްޖޭގައި ޢަމަލުކުރެވޭ ޤާނޫނުތަކާ ގުޅޭ މުހިންމު މަޢުލޫމާތުތައް ފަސޭހަކަމާއެކު ހޯދުމަށް މަގުފަހިކޮށްދޭނެ ވަރަށް ބޮޑު ކުރިއެރުމެކެވެ. އޭ.ޖީ. އޮފީހުން ފާހަގަކުރައްވާ ގޮތުގައި، މި ފީޗަރއަކީ އަދިވެސް ތަރައްޤީވަމުންދާ ޚިދުމަތެއް ކަމަށާއި، ކުރިއަށް އޮތްތަނުގައި އިތުރު މަޢުލޫމާތާއެކު ތަފްޞީލީ ޖަވާބުތައް ލިބޭނެ ގޮތަށް މި ޚިދުމަތް ތަރައްޤީކުރެވޭނެއެވެ.
މި މުނާސަބަތުގައި ރައީސުލްޖުމްހޫރިއްޔާ އިފްތިތާޙް ކޮށްދެއްވި ހަނދާނީ ފޮތުގައި، ބަންޑާރަނައިބުގެ އޮފީހުގެ 75 އަހަރުގެ ތާރީޚާއި، އެ މުއްދަތުގެ ތެރޭގައި އެ އޮފީހުން ކޮށްފައިވާ މުހިންމު މަސައްކަތްތަކުގެ އިތުރުން، އެތަނަށް ޚިދުމަތްކުރެއްވި ބޭފުޅުންނާއި، އެބޭފުޅުންގެ ޚިދުމަތްތައް ތަފްޞީލުކޮށް ހިމަނާފައިވެއެވެ.
Ads by BMLމި ހާއްސަ ރަސްމިއްޔާތުގައި ކުރީގެ ބަންޑާރަނައިބުންނާއި، އެ އޮފީހަށް އެކި ދުވަސްވަރު ޚިދުމަތްކުރެއްވި ގިނަ އަދަދެއްގެ ބޭފުޅުން ބައިވެރިވެވަޑައިގެންނެވިއެވެ. މި ރަސްމިއްޔާތުން ދައްކުވައިދެނީ ބަންޑާރަނައިބުގެ އޮފީހުގެ ދިގު ތާރީޚާއި، ޤާނޫނީ ދާއިރާއަށް އެ އޮފީހުން ކޮށްފައިވާ އަގުހުރި ޚިދުމަތްތަކެވެ.
Ads by MACL
