ޓިކްޓޮކްގެ މަޝްހޫރު ފޭޒް، މާރާމާރީގެ ތުހުމަތުގައި ހައްޔަރުކުރުމަށްފަހު 10،000ރ. ގެ ކަފާލާތަކާއެކު ދޫކޮށްލައިފި
ގދ. ތިނަދޫ ސިޓީގައި، ހުއްދަ ނެތި ގެއަކަށް ވަދެ، ހަޑިހުތުރު ބަހުން ވާހަކަ ދައްކައި، މާރާމާރީ ހިންގިކަމުގެ ތުހުމަތުގައި ހައްޔަރުކުރި ޓިކްޓޮކްގައި މަޝްހޫރު އައިމިނަތު ފޭޒްލީން (ފޭޒް) 10،000 ރުފިޔާގެ ކަފާލާތުގެ ދަށުން ބަންދުން ދޫކޮށްލައިފި އެވެ.
ފުލުހުން ވިދާޅުވީ، ކޯޓުން ކަނޑައެޅި 10 ގަޑިއިރުގެ ތެރޭގައި ކަފާލާތުގެ ފައިސާ ދެއްކުމުން، ފޭޒް ދޫކޮށްލާފައިވާ ކަމަށެވެ.
ފޭޒް ހައްޔަރުކޮށްފައި ވަނީ މިދިޔަ ބުދަ ދުވަހުގެ ރޭ 22:38 ހާއިރު، ތިނަދޫގެ ގެއަކަށް ހުއްދަ ނެތި ވަދެ، އެގޭގައި ކުޑަކުދިން ތިއްބައި، ހަޑިހުތުރު ބަހުން ޒުވާބުކޮށް، މާރާމާރީ ހިންގި މައްސަލައަކާ ގުޅިގެންނެވެ. އޭނާ ހައްޔަރުކުރީ އިއްޔެ މެންދުރު 14:32 ހާއިރު ކޯޓު އަމުރެއްގެ ދަށުން ތިނަދޫ ސިޓީންނެވެ.
Ads by BMLކޯޓުން ފައިސާ ދެއްކުމަށް 10 ގަޑިއިރުގެ މުއްދަތެއް ދިން ނަމަވެސް، އެގަޑީގެ ތެރޭގައި ފައިސާ ނުދެއްކޭ ނަމަ 15 ދުވަހަށް ބަންދުގައި ބެހެއްޓުމަށް ނިންމާފައިވާ ކަމަށް ފުލުހުން ވަނީ މައުލޫމާތު ދީފައެވެ. އެހެންކަމުން، ފޭޒްގެ މިނިވަންކަމަށްޓަކައި އޭނާގެ ޓިކްޓޮކްގައި ފައިސާ ހޯދުމަށް ކެމްޕޭނެއްވެސް ކުރިއަށް ގެންދިޔައެވެ.
ކަފާލާތަކީ ކޯޓުން ކަނޑައަޅާ ޝަރުތުތަކެއްގެ ދަށުން ނުވަތަ ކޯޓުން ކަނޑައަޅާ އަދަދަކަށް ކޯޓުގައި ފައިސާ ބެހެއްޓުމަށްފަހު ބަންދުން ދޫކުރެވޭ އުސޫލެކެވެ. ރާއްޖޭގެ ގާނޫނުތައް ހަމަޖެހިފައިވާ ގޮތުން، ކުށުގެ ތުހުމަތުގައި ހައްޔަރުކުރެވޭ ފަރާތްތަކާއި، ޖިނާއީ މައްސަލަތަކުގައި ކުށް ސާބިތުވެ، ޖަލު ހުކުމް ތަންފީޒު ކުރަމުންދާ މީހުންނަށް ވެސް ކަފާލާތުގެ ދަށުން ބަންދުން ދޫކުރެވޭނެ އެވެ. ފުލުހުން ވިދާޅުވީ، ފޭޒްގެ މައްސަލަ އިތުރަށް ތަހުގީގު ކުރަމުންދާ ކަމަށެވެ.
Ads by MACL
