އޮކްޓޯބަރު 3 ގެ ހަރަކާތުގައި ހަމަނުޖެހުން ހިންގަން ފުރުސަތު ނުދޭނެ: ފުލުހުންގެ އިންޒާރު
އަންނަ ހުކުރު ދުވަހު، އޮކްޓޯބަރު 3 ގައި ބާއްވަން ހަމަޖެހިފައިވާ ހަރަކާތެއްގައި ކުށްކުރާ ގްރޫޕްތައް ބޭނުންކޮށްގެން މާލެތެރެ ހަލަބޮލިކޮށް، ތަންތަނަށް ގެއްލުންދިނުމަށް ރާވާފައިވާކަމުގެ މަޢުލޫމާތު ލިބިފައިވާކަމަށް ދިވެހި ފުލުހުން ބުނެފިއެވެ.
ފުލުހުން މިކަން ހާމަކޮށްފައިވަނީ އެމްޑީޕީއިން ކުރިއަށްގެންދަން ތައްޔާރުވާ ހަރަކާތަކާ ގުޅިގެން ނެރުނު ނޫސްބަޔާނެއްގައެވެ. މިފަދަ ހަމަނުޖެހުންތަކަށް ފުރުޞަތު ނުދޭނެކަމަށް ފުލުހުން ވަނީ ހަރުކަށިކޮށް އަންގާފައެވެ.
ފުލުހުންގެ ބަޔާނުގައި ބުނެފައިވަނީ ޤާނޫނާ އެއްގޮތަށް ސުލްހަވެރިކަމާއެކު ކުރިއަށްގެންދާ ހަރަކާތްތަކަށް ރައްކާތެރިކަން ފޯރުކޮށްދިނުމާއި، އެފަދަ ހަރަކާތްތައް ހިންގާ ސަރަޙައްދުތަކުގެ މަގުތަކާއި އެހެނިހެން ތަންތަނުގެ ސަލާމަތްތެރިކަން ކަށަވަރުކުރުމަށް ފުލުހުން އިސްކަންދޭ ކަމަށެވެ. ނަމަވެސް، ލިބިފައިވާ މަޢުލޫމާތުތަކަށް ބަލާއިރު، ހުއްދަ ދީފައިވާ ރޫޓާ ޚިލާފަށް ހިނގާލުން ކުރިއަށް ގެންގޮސް، އެކި ބައިބަޔަށް ބެހިފައިވާ ކުށްކުރާ ގްރޫޕްތައް މަގުމައްޗަށް ނެރެ، މާލޭގެ އަމަން އަމާންކަން ނަގާލައި، ތަންތަނަށް ގެއްލުންދިނުމުގެ ރޭވުންތައް ހުރިކަމަށް ފުލުހުން ވަނީ ފާހަގަކޮށްފައެވެ. މިފަދަ ޢަމަލުތަކަކީ މާލޭގެ އާންމު މަސްލަހަތު ނަގާލައިފާނެ ކަންކަން ކަމުގައި ފުލުހުން ދެކެއެވެ.
Ads by BMLއެހެންކަމުން، ސުލްހަވެރި ހަރަކާތެއްގެ ނަމުގައި ކުރިއަށްގެންދާ މި ހަރަކާތުގައި، ސުލްހަވެރިކަމާއެކު އެއްވެއުޅުމުގެ މިނިވަންކަމުގެ ޤާނޫނާ ޚިލާފުވާ، ނުވަތަ އަމަން އަމާންކަމަށް ނުރައްކާވާ އެއްވެސް ޢަމަލެއް ނުހިންގުމަށް ފުލުހުން ވަނީ ގޮވާލާފައެވެ. މާލެ ހަލަބޮލިކޮށް، ތަންތަނަށް ގެއްލުންދިނުމަށް އެއްވެސް ފަރާތަކަށް ފުލުހުން ފުރުސަތު ނުދޭނެކަމަށްވެސް އެ ބަޔާނުގައިވެއެވެ.
ހަރަކާތް ކުރިއަށްދާއިރު، އާންމު ރައްޔިތުންގެ ރައްކާތެރިކަން ކަށަވަރުކުރުމަށް މަސައްކަތްކުރާ ފަރާތްތަކަށް އެއްބާރުލުން ދިނުމަށް ފުލުހުން އިލްތިމާސްކުރެއެވެ. އަދި، ހުރިހާ ރައްޔިތުންގެ ޙައްގުތަކަށް އިހުތިރާމުކޮށް، މުޖުތަމަޢުގެ އާންމު މަސްލަހަތަށް އުނިކަމެއް ނާންނާނެ ގޮތަކަށް ހަރަކާތްތައް ކުރިއަށް ގެންދިއުމަށްވެސް ފުލުހުން ވަނީ އެދިފައެވެ.
Ads by MACL
