ބުދަ، 18 ނޮވެމްބަރު 2026
ޚަބަރު

ރައީސް މުއިއްޒުގެ ވައުދު ފުއްދަވައި، ހުރިހާ އަތޮޅަކަށް ޕާސްޕޯޓާއި އައިޑީކާޑުގެ ޚިދުމަތް ފުޅާކޮށްފި

ރައީސް މުއިއްޒުގެ ވައުދު ފުއްދަވައި، ހުރިހާ އަތޮޅަކަށް ޕާސްޕޯޓާއި އައިޑީކާޑުގެ ޚިދުމަތް ފުޅާކޮށްފި

ރައީސް ޑރ. މުޙައްމަދު މުއިއްޒުގެ ރިޔާސީ ވައުދުފުޅެއްގެ ދަށުން، ދިވެހިރާއްޖޭގެ ހުރިހާ އަތޮޅަކަށް ޕާސްޕޯޓްގެ ޚިދުމަތް ފުޅާކޮށް، މިހާރު ވަނީ އައިޑީކާޑުގެ ޚިދުމަތް ވެސް ފުރިހަމައަށް ފޯރުކޮށްދޭން ފަށާފައެވެ. މިގޮތުން، އދ. އަތޮޅު މަހިބަދޫގައި ބޭއްވި ޚާއްސަ ރަސްމިއްޔާތެއްގައި، މިރޭ ވަނީ އެރަށުގައި ޕާސްޕޯޓްގެ ޚިދުމަތް ރަސްމީކޮށް އިފްތިތާޙުކޮށްފައެވެ.

މި ރަސްމިއްޔާތުގައި ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިޙްސާން ވަނީ މަހިބަދޫން ޕާސްޕޯޓް ހެދި ފުރަތަމަ ފަރާތަށް ޕާސްޕޯޓް ޙަވާލުކުރައްވާފައެވެ. މި މަޝްރޫޢުގެ ދަށުން، މީގެ ކުރިން މާލެއިން އެކަނި ލިބެން ހުރި މި މުހިންމު ޚިދުމަތްތައް ހޯދުމަށް އަތޮޅުތަކުގެ ރައްޔިތުންނަށް ދިމާވި ދަތިތަކަށް މިހާރު ވަނީ ޙައްލު ލިބިފައެވެ.

ރައީސް ޑރ. މުއިއްޒު ވެރިކަމަށް ވަޑައިގަތުމަށްފަހު، 2024 ވަނަ އަހަރުގެ ނޮވެމްބަރު މަހުގެ 16 ވަނަ ދުވަހު މި މަޝްރޫޢު ފައްޓަވައި، އަހަރެއްގެ ތެރޭގައި މި ޚިދުމަތްތައް މުޅި ރާއްޖެއަށް ފުޅާކުރުމުގެ މަސައްކަތް ވަނީ ބާރަށް ކުރިއަށް ގެންގޮސްފައެވެ. މިހާރު ކޮންމެ އަތޮޅެއްގައި ހުންނަ ޚިދުމަތްދޭ ރަށަކުން ފަސޭހަކަމާއެކު މި ޚިދުމަތްތައް ލިބެން ހުންނައިރު، ބައެއް އަތޮޅުތަކުގައި އެންމެ ރަށަކަށް ވުރެ ގިނަ ރަށްރަށުން ވެސް މި ޚިދުމަތްތައް ލިބޭނެ އިންތިޒާމް ވަނީ ހަމަޖައްސާފައެވެ.

މިގޮތުން، މި އަހަރު ނިމުމުގެ ކުރިން ރާއްޖޭގެ ހުރިހާ އަތޮޅަކަށް އައިޑީކާޑު ޕްރިންޓްކޮށް ދޫކުރުމާއި، ޕާސްޕޯޓްގެ ޚިދުމަތް ފުޅާކުރުމުގެ ރައީސްގެ ވައުދުފުޅު ވަނީ ފުއްދަވާފައެވެ. ސަރުކާރުން ނިންމާފައިވަނީ ކުރިއަށް އޮތްތަނުގައި މި ޚިދުމަތްތައް އިތުރު ރަށްތަކަށް ފުޅާކުރުމަށެވެ.