ލ. މާވަށުގައި ތަރައްޤީގެ ބޮޑު 7 މަޝްރޫޢެއް ފަށައިފި
ލ. މާވަށުގެ ތަރައްޤީއަށް އަމާޒުކޮށް ހިންގާ 7 ބޮޑު މަޝްރޫޢެއްގެ މަސައްކަތް ރަސްމީކޮށް މިއަދު ފަށައިފިއެވެ.
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ލ. އަތޮޅަށް ކުރައްވަމުންގެންދަވާ ދަތުރުފުޅުގެ ތެރެއިން، މި މަޝްރޫޢުތައް ފައްޓަވައިދެއްވީ ޚާއްސަ ރަސްމިއްޔާތުތަކެއްގައެވެ. މާވަށުގެ ރައްޔިތުންނަށް ދިގުދެމިހުންނާނެ ފައިދާތަކެއް ލިބިގެންދާނެ މި މަޝްރޫޢުތަކަކީ، ރައީސްގެ ވެރިކަމުގައި ރަށްރަށުގެ ތަރައްޤީއަށް ދެއްވާ ސަމާލުކަމުގެ ހެއްކެކެވެ.
މި މަޝްރޫޢުތަކުގެ ތެރޭގައި ހިމެނެނީ ބޭންކް އޮފް މޯލްޑިވްސް (BML) ގެ ބްރާންޗެއް ޤާއިމުކުރުން، ގޮނޑުދޮށް ހިމާޔަތްކުރުމުގެ މަސައްކަތް، ފުލުހުންގެ މަރުކަޒެއް އެޅުން، ރަށުގެ މަގުތައް ހެދުމުގެ މަސައްކަތް، ވޮލީ ކޯޓެއް ތަރައްޤީކުރުން، ފިޓްނެސް ސެންޓަރެއް ޤާއިމުކުރުން އަދި ކުނި މެނޭޖްކުރުމާއި ވަސީލަތްތައް ހިންގާ މަރުކަޒެއް ޤާއިމުކުރުމުގެ މަސައްކަތެވެ.
Ads by BMLމި ރަސްމިއްޔާތުގައި ރައީސް މުޢިއްޒުގެ އިތުރުން ސަރުކާރުގެ އިސް ވަޒީރުންނާއި، ދައުލަތުގެ މުއައްސަސާތަކުގެ އިސްވެރިން ބައިވެރިވެވަޑައިގެންނެވިއެވެ.
-
ބީއެމްއެލް ބްރާންޗް: ފިނޭންސް މިނިސްޓަރު މޫސާ ޒަމީރު.
-
ގޮނޑުދޮށް ހިމާޔަތް: ކޮންސްޓްރަކްޝަން މިނިސްޓަރު ޑރ. ޢަބްދުﷲ މުއްޠަލިބު.
-
ފުލުހުންގެ މަރުކަޒު: ހޯމް މިނިސްޓަރު ޢަލީ އިޙްސާން.
-
ވޮލީ ކޯޓާއި ފިޓްނެސް ސެންޓަރު: ހަށިހެޔޮކަމާބެހޭ ވަޒީރު ޢަބްދުﷲ ރާފިޢު.
-
ކުނި މެނޭޖްކުރާ މަރުކަޒު: ފިނޭންސް މިނިސްޓަރު މޫސާ ޒަމީރު.
މި ރަސްމިއްޔާތުތަކުގައި ބީއެމްއެލްގެ ޗެއަރޕާސަން ޢަލީ ޙަބީބު، ސީއީއޯ އަޙްމަދު ޝަރީފް، އެމްޓީސީސީގެ އެމްޑީ ޑީސީޕީ ރިޓަޔަރޑް އަޙްމަދު ސަޢުދީ، އާރުޑީސީގެ އެމްޑީ އިބްރާހިމް ނަޒީމް އަދި ވެމްކޯގެ މެނޭޖިންގ ޑިރެކްޓަރު ވެސް ބައިވެރިވެވަޑައިގެންނެވިއެވެ.
މި ދަތުރުފުޅުގައި ރައީސް މުޢިއްޒު ވަނީ މާވަށުގެ ކައުންސިލާއި، އަންހެނުންގެ ތަރައްޤީއަށް މަސައްކަތް ކުރާ ކޮމިޓީއާއި، މުއައްސަސާތަކުގެ އިސްވެރިންނާއި، ރައްޔިތުންނާ ބައްދަލުކުރައްވައި، ރަށުގެ ހާލަތާއި ކުރިމަގުގެ ރޭވުންތަކާ ބެހޭގޮތުން މަޝްވަރާކުރައްވާފައެވެ. މި މަޝްރޫޢުތަކާއެކު މާވަށުގެ ރައްޔިތުންގެ ދިރިއުޅުމުގެ ފެންވަރު ރަނގަޅުވެ، އިޖުތިމާޢީ އަދި އިޤްތިޞާދީ ގޮތުން ކުރިއެރުންތަކެއް ލިބިގެންދާނެކަމަށް ބެލެވެއެވެ.
Ads by MACL
