ބުދަ، 18 ނޮވެމްބަރު 2026
ޚަބަރު

ރާއްޖޭގެ ފުޓްބޯޅަ ކުރިއެރުވުމަށް ފީފާއިން ފުރިހަމަ އެއްބާރުލުން ދޭނެކަމުގެ ޔަޤީންކަން ދެއްވައިފި

ރައީސް ޑރ. މުޢިއްޒު އާއި ފީފާގެ ރައީސް ބައްދަލުކުރެއްވުން --- ފޮޓޯ: ރައީސް އޮފީސް
ރައީސް ޑރ. މުޢިއްޒު އާއި ފީފާގެ ރައީސް ބައްދަލުކުރެއްވުން --- ފޮޓޯ: ރައީސް އޮފީސް

ދުނިޔޭގެ ފުޓްބޯޅައިގެ މައި އިދާރާ، ފީފާގެ ރައީސް ޖިއާނީ އިންފަންޓީނޯ، ރާއްޖޭގެ ފުޓްބޯޅަ ކުރިއެރުވުމަށް އެ ޖަމްޢިއްޔާއިން ފުރިހަމަ އެއްބާރުލުން ދޭނެކަމުގެ ޔަޤީންކަން ރައީސުލްޖުމްހޫރިއްޔާ ޑރ. މުޙައްމަދު މުއިއްޒުއަށް ދެއްވައިފިއެވެ.

މި ޔަޤީންކަން ދެއްވީ، ފީފާގެ ރައީސް ރާއްޖެއަށް ކުރައްވަމުން ގެންދަވާ ރަސްމީ ޒިޔާރަތުގެ ތެރެއިން ރައީސުލްޖުމްހޫރިއްޔާއާ ބައްދަލުކުރައްވައި ދެއްކެވި ވާހަކަފުޅުގައެވެ.

ރައީސުލްޖުމްހޫރިއްޔާގެ އޮފީހުގައި ބޭއްވެވި މި ބައްދަލުކުރެއްވުމުގައި، ރާއްޖޭގެ ފުޓްބޯޅައިގެ ދާއިރާ ހަރުދަނާކޮށް، ޒުވާން ކުޅުންތެރިންނަށް ފުރުޞަތުތައް ފަހިކޮށްދިނުމާ ގުޅޭގޮތުން ދެ ބޭފުޅުން ވަނީ ޚިޔާލު ބަދަލުކުރައްވާފައެވެ.

މި ބައްދަލުކުރެއްވުމުގައި ރާއްޖޭގެ ފުޓްބޯޅަ ކުރިއެރުވުމަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އަށް ދޭންޖެހޭ އެއްބާރުލުން ދެއްވާނެކަމަށް ދެ ބޭފުޅުންވެސް ވަނީ ފާހަގަކުރައްވާފައެވެ.

މިއީ ފީފާގެ ރައީސަކު ރާއްޖެއަށް ކުރައްވާ ފުރަތަމަ ރަސްމީ ޒިޔާރަތެވެ. އިންފަންޓީނޯ މި ޒިޔާރަތް ކުރައްވަމުން ގެންދަވަނީ އެފްއޭއެމްގެ ރައީސް އަޙްމަދު ޠާރިޤު (ޓޮމް) ގެ ދަޢުވަތަކަށެވެ. މި ޒިޔާރަތުގެ ތެރެއިން ރައީސް މުއިއްޒުއާއި އިންފަންޓީނޯ ވަނީ ހަވީރު ގަލޮޅު ދަނޑުގައި ބޭއްވި ޚާއްޞަ ފުޓްބޯޅަ ފެސްޓިވަލެއްގައިވެސް ބައިވެރިވެވަޑައިގެންފައެވެ.

ފީފާގެ ރައީސްގެ މި ޒިޔާރަތަކީ، ރާއްޖޭގެ ފުޓްބޯޅައަށް ކުރިމަގެއް އެބައޮތްކަން ހާމަވެ، އެފްއޭއެމުން ފުޓްބޯޅަ ކުރިއެރުވުމަށް ކުރަމުންދާ މަސައްކަތްތަކަށް ލިބުނު ވަރަށް ބޮޑު ހިތްވަރެއްކަމަށް ފުޓްބޯޅައިގެ ދާއިރާގައި ހަރަކާތްތެރިވާ ފަރާތްތަކުން ދެކެއެވެ.

މި ޒިޔާރަތުގެ ސަބަބުން، އެފްއޭއެމްގެ ހިންގުން ހަރުދަނާކޮށް، ކުލަބުތަކާއި ކުޅުންތެރިންނަށް ދިމާވެފައިވާ ގޮންޖެހުންތަކަށް ޙައްލެއް ހޯދައިދިނުމަށް ކުރާ މަސައްކަތަށް އިތުރު ބާރެއް ލިބިގެންދާނެކަމަށް އުއްމީދުކުރެވެއެވެ.