ބުދަ، 18 ނޮވެމްބަރު 2026
ޚަބަރު

ފިއްތުންތަކަށް ބެލުމެއްނެތި އިސްރާއީލް ޕާސްޕޯޓް މަނާކުރީ ދިވެހި ރައްޔިތުން އެގޮތް ބޭނުންވުމުން: ރައީސް

ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ---
ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ---

އިސްރާއީލްގެ ޕާސްޕޯޓްގައި ދިވެހިރާއްޖެއަށް އެތެރެވުން މަނާކުރުމުގެ ނިންމުމަކީ، ބައިނަލްއަޤްވާމީ ފިއްތުންތަކާއި އަދި ޓޫރިޒަމަށް އަސަރުކުރާނެ ކަމުގެ އިންޒާރުތައް ލިބުނު ނަމަވެސް، ހަމައެކަނި ދިވެހި ރައްޔިތުންގެ އެދުމުގެ މަތިން ނިންމި ނިންމުމެއް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ވިދާޅުވެއްޖެއެވެ.

ޕީއެންސީން މިރޭ އާޓިފިޝަލް ބީޗް ސަރަޙައްދުގައި ކުރިއަށްގެންދާ ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ، ޚާރިޖީ ސިޔާސަތުގައި ދަމާފައިވާ "ރަތް ރޮނގު" އަދިވެސް އޮތީ ކުރިންވެސް އޮތް ގޮތަށް ކަމަށާއި، ފަލަސްޠީނުގެ ރައްޔިތުންނަށް އަނިޔާވެރިވަމުންދާހާ ހިނދަކު އިސްރާއީލަށް ރާއްޖެއިން މަރުޙަބާ ނުކިޔާނެ ކަމަށެވެ.

ރައީސް ވިދާޅުވީ، ވެރިކަމާ ހަވާލުވެވަޑައިގެންނެވި ދުވަހު، 2023 ނޮވެމްބަރު 17 ގައި ވެވަޑައިގެންނެވި ވައުދާ އެއްގޮތަށް، ސަރުކާރުގެ ޚާރިޖީ ސިޔާސަތު ބައްޓަންކޮށްފައިވަނީ "މޯލްޑިވްސް ފަސްޓް" ގެ އުސޫލުގެ މަތިން ކަމަށެވެ. އެގޮތުން، އިސްރާއީލް ފިޔަވައި ދުނިޔޭގެ އެންމެހާ ޤައުމުތަކާ، އެ ޤައުމެއްގެ ބޮޑުކުޑަމިނަށާއި ދުރުމިނަށް ބެލުމެއްނެތި، ރާއްޖެއިން އަބަދުވެސް ބާއްވާނީ އެކުވެރި، ގާތް ގުޅުމެއް ކަމުގެ ޔަގީންކަން އެމަނިކުފާނު ދެއްވިއެވެ.

"ދިވެހި ރައްޔިތުން ބޭނުންވާތީ އެ އޮތީ އިސްރާއީލް ޕާސްޕޯޓް ބޭން ކޮށްފައި. ފަލަސްޠީނުގެ ރައްޔިތުން އަނިޔާވެރިކަމާއެކީ މަރަމުންދާ ބަޔަކަށް، މިތަނުގެ ރީތި ބީޗުތަކާއި މޫދުތައް ބޭނުންކުރުމަށް މަރުޙަބާ ނުކިޔާތީ އަޅުގަނޑުމެން އެކަން މަނާކުރީ،" ރައީސް ވިދާޅުވިއެވެ.

އިސްރާއީލް ޕާސްޕޯޓް މަނާކުރުމުގެ މަސައްކަތް ފެށުމުން، ޓޫރިޒަމް ދާއިރާ ހަލާކުވެދާނެ ކަމަށާއި އެ ނޫންވެސް ގޮންޖެހުންތައް ކުރިމަތިވާނެ ކަމަށް ވިދާޅުވެ އެތައް ފަރާތަކުން ဖိއްތުންތައް ކުރިމަތިކުރުވިކަން ރައީސް ފާހަގަކުރެއްވިއެވެ. ނަމަވެސް، އެއީ ވާނެ ގޮތް ނޫން ކަމަށް ގަބޫލުކުރައްވައި، ރައްޔިތުންގެ އިޙްސާސްތަކަށް އިސްކަންދެއްވައި އެ ނިންމުމުގައި ސާބިތުވެ ހުންނެވި ކަމަށް އެމަނިކުފާނު ވިދާޅުވިއެވެ.

ރައީސް މުއިއްޒުގެ ވާހަކަފުޅު ނިންމަވާލައްވަމުން، ރިޔާސީ އިންތިޚާބުގައި ވިޔަސް އަދި އޭގެ ފަހުން ވެސް ރައްޔިތުންނަށް ވެވަޑައިގަންނަވާ ކޮންމެ ވައުދަކީ ހިތުގެ ފުންމިނުން، އެކަމެއް އެގޮތަށް ކުރުމުގެ ސާފު ނިޔަތުގައި ކުރައްވާ ކަމެއްކަން ތަކުރާރުކޮށް ހާމަކުރެއްވިއެވެ.