ބުދަ، 18 ނޮވެމްބަރު 2026
ޚަބަރު

ހުޅުމާލެ ފޭސް 3: ބިން ހިއްކުމުގެ މަސައްކަތްކުރާ ސަރަޙައްދުން އުޅަނދުތައް ނެގުމުގެ އެންމެ ފަހު މުއްދަތު އެޗްޑީސީން ދީފި

ހުޅުމާލެ ފޭސް 3: ބިން ހިއްކުމުގެ މަސައްކަތްކުރާ ސަރަޙައްދުން އުޅަނދުތައް ނެގުމުގެ އެންމެ ފަހު މުއްދަތު އެޗްޑީސީން ދީފި

ހުޅުމާލެ ފޭސް 3 ހެދުމުގެ މަސައްކަތް ހަލުވިކުރުމަށް، އެ ސަރަޙައްދުގައި އަޅާފައިވާ އުޅަނދުފަހަރު ނެގުމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން އެންމެ ފަހުގެ މުއްދަތު ދީފިއެވެ. މި މަސައްކަތަށް ހުރަސްއަޅާ ގޮތަށް އެޅިފައިވާ އުޅަނދުތައް ނޮވެމްބަރު 22، 2025 ވާ ބުރާސްފަތި ދުވަހުގެ 15:30 ގެ ކުރިން ނެގުމަށް އެޗްޑީސީން ވަނީ އަންގާފައެވެ.

އެޗްޑީސީން ހާމަކުރެއްވި ގޮތުގައި، ފޭސް 3 ބިން ހިއްކުމުގެ މަސައްކަތް ކުރިއަށްދާ ސަރަޙައްދުގައި އަޅާފައިވާ އުޅަނދުތައް ނެގުމަށް ތަކުރާރުކޮށް މުއްދަތު ދީފައިވީނަމަވެސް، ގިނަ އަދަދެއްގެ އުޅަނދުތައް ނުނަގާ ހުރުން އެ ކޯޕަރޭޝަނަށް ފާހަގަ ކުރެވިފައިވެއެވެ. ނޮވެމްބަރު 9 ގައި ކުރި އިއުލާނެއްގައި، މި އުޅަނދުތައް ނެގުމަށްފަހު ތިލަފުށި، ގުޅީފަޅު އަދި ކުޑަގިރިން ކަނޑައަޅާފައިވާ ސަރަޙައްދުތަކުގައި އެޅުމުގެ ފުރުސަތު ވަނީ ފަހިކޮށްދީފައެވެ.

އެޗްޑީސީން ނެރުނު ޗާޓެއްގައި ފާހަގަކޮށްފައިވާ ސަރަޙައްދުގައި ހުރި އުޅަނދުތައް ދީފައިވާ މުއްދަތުގެ ތެރޭގައި ނެގުމަށް ވަނީ އަންގާފައެވެ. މި މުއްދަތު ހަމަވުމަށްފަހު، އެ ސަރަޙައްދުގައި ހުންނަ އުޅަނދުތައް އެޗްޑީސީން ނަގާނެ ކަމަށާއި، އެގޮތުން ލިބޭ އެއްވެސް ގެއްލުމެއްގެ ޒިންމާ އެޗްޑީސީން ނުގަންނާނެ ކަމަށް ވެސް އެ ކޯޕަރޭޝަނުން ވަނީ ބުނެފައެވެ.

ހުޅުމާލެ ފޭސް 3 ހިއްކުމުގެ މަސައްކަތް އަވަސް މުއްދަތެއްގައި ނިންމުމަށް އެޗްޑީސީން ގިނަ މަސައްކަތްތަކެއް ކުރަމުންދާކަން ފާހަގަކޮށް، އެ މަސައްކަތްތަކަށް ހުރަސް އެޅޭ ގޮތަށް ހުރި އުޅަނދުތައް ނެގުމަށް ދީފައިވާ މުއްދަތުތަކަށް ސަމާލުވުމަށް އެޗްޑީސީން އިލްތިމާސް ކުރެއެވެ.