ބުދަ، 18 ނޮވެމްބަރު 2026
ޚަބަރު

ރޯދަ ހަދިޔާ: ކޮންމެ ގެއަކަށް ދޭ މަސްދަޅު ކޭސްތައް ތައްޔާރުކޮށް، އަންނަ ޖެނުއަރީ މަހުގެ މެދަކާ ހިސާބަށް ނިންމާލަނީ

ރޯދަ ހަދިޔާ: ކޮންމެ ގެއަކަށް ދޭ މަސްދަޅު ކޭސްތައް ތައްޔާރުކޮށް، އަންނަ ޖެނުއަރީ މަހުގެ މެދަކާ ހިސާބަށް ނިންމާލަނީ

އަންނަ ރަމަޟާން މަހު ސަރުކާރުން ރައްޔިތުންނަށް ހަދިޔާކުރުމަށް ހަމަޖެހިފައިވާ މަސްދަޅު ކޭސްތައް ބަންދުކުރުމުގެ މަސައްކަތް، ކުރިއަށް އޮތް ޖެނުއަރީ މަހުގެ ދެވަނަ ހަފްތާގެ ނިޔަލަށް ނިންމާލެވޭނެ ކަމުގެ ޔަޤީންކަން މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން ދީފިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގަތުމަށްފަހު ފެއްޓެވި "ރޯދަ ހަދިޔާ" ދިނުމުގެ ސިޔާސަތުގެ ދަށުން، މިދިޔަ އަހަރެކޭ އެއްގޮތަށް މިފަހަރުވެސް ކޮންމެ ގޭބިސީއަކަށް މަސްދަޅު ކޭހެއް ދެއްވުމަށް ސަރުކާރުން ވަނީ ނިންމަވާފައެވެ. މިކަމަށްޓަކައި ޤައުމީ މަސްކުންފުނި، މިފްކޯއިން ވަނީ ދުރާލާ ތައްޔާރުވެ، އަމަލީ މަސައްކަތް ފަށާފައެވެ.

މި މަސައްކަތާ ގުޅޭގޮތުން ޕީއެސްއެމް ނިއުސްއަށް މަޢުލޫމާތު ދެމުން މިފްކޯއިން ހާމަކުރި ގޮތުގައި، މަސްދަޅު އުފެއްދުމުގެ މަސައްކަތް އެކުންފުނިން ފަށާފައިވަނީ މިދިޔަ އޮކްޓޯބަރ މަހުގެ 27 ވަނަ ދުވަހުއެވެ. އަދި މިހާތަނަށް އައިއިރު، މުޅި ޕްރޮޖެކްޓްގެ 33 އިންސައްތަ މަސައްކަތް ވަނީ ނިންމާލެވިފައެވެ. މިފްކޯގެ އަމާޒަކީ ޖެނުއަރީ މަހުގެ ކުރީކޮޅު ހުރިހާ މަސައްކަތެއް އެއްކޮށް ފުރިހަމަކުރުމެވެ.

މިފަހަރުގެ ރޯދަ ހަދިޔާ ތައްޔާރުކުރުމުގައި މިންގަނޑެއްގެ ގޮތުގައި ބަލަނީ މިދިޔަ އަހަރު ބަހާފައިވާ އަދަދުތަކަށެވެ. އެގޮތުން ނިމިދިޔަ ރަމަޟާން މަހު ސަރުކާރުން ވަނީ ޖުމްލަ 111,231 މަސްދަޅު ކޭސް ރައްޔިތުންނަށް ފޯރުކޮށްދީފައެވެ. މީގެ ތެރޭގައި ހިމެނެނީ މާލޭ ސަރަހައްދުގެ ގޭބިސީތަކަށް ދޫކުރި 50,519 ކޭހާއި، އަތޮޅުތެރޭގެ ރަށްރަށަށް ފޮނުވި 60,712 ކޭހެވެ.

މަސްދަޅު ކޭހުގެ އިތުރުން، ރައްޔިތުންނަށް ލުއިފަސޭހަ ކޮށްދިނުމުގެ ގޮތުން ކަރަންޓު ބިލުން ޑިސްކައުންޓް ދިނުމަށްވެސް ސަރުކާރުން ވަނީ ނިންމަވާފައެވެ. މިގޮތުން ރައީސުލްޖުމްހޫރިއްޔާ ވިދާޅުވެފައިވަނީ، ޑޮމެސްޓިކް ރޭޓުގައި ކަރަންޓު ބޭނުންކުރާ ގޭބިސީތަކުގެ ރޯދަމަހުގެ ބިލަށް، ގިނަވެގެން އަރާނީ 400 ރުފިޔާ ކަމަށާއި، އެއަށްވުރެ އިތުރުވާ ބައި ސަރުކާރުން ދައްކައިދޭނެ ކަމަށެވެ.