ބުދަ، 18 ނޮވެމްބަރު 2026
ޚަބަރު

ބޮލީވުޑްގެ ލެޖެންޑް ދަރްމެންދުރާގެ ވަކިވުން: އަމީތާބް ބައްޗަންގެ ހިތާމަވެރި މެސެޖެއް

ފިލްމް ޝޯލޭގައި ދެތަރިން އެކުގައި މަސައްކަތްކުރި ---
ފިލްމް ޝޯލޭގައި ދެތަރިން އެކުގައި މަސައްކަތްކުރި ---

ބޮލީވުޑްގެ ތަޖުރިބާކާރު އެކްޓަރު ދަރްމެންދުރާ، 89 އަހަރުގައި، ބަލިވެ އުޅުއްވުމަށްފަހު ނޮވެމްބަރު 24 ވަނަ ދުވަހު މުމްބާއީގައި މަރުވެއްޖެއެވެ. ނޮވެމްބަރު 1 ވަނަ ދުވަހުން ފެށިގެން އެކި ފަހަރު މަތިން ހޮސްޕިޓަލަށް ގެންދެވިފައިވާ ދަރްމެންދުރާ، ބްރީޗް ކެންޑީ ހޮސްޕިޓަލުން ދޫކޮށްލުމަށްފަހު ގެއަށް ގެންގޮސް ފަރުވާ ދެމުން ދަނިކޮށް، އެންމެ ފަހު ދުވަސްކޮޅު ވަރަށް ބޮޑަށް ހާލު ދެރަވެ، އެންމެފަހުން ވަނީ މިދުނިޔެއާ އަލްވަދާއު ކިޔާފައެވެ.

ދަރްމެންދުރާގެ ވަކިވުމާ ގުޅިގެން، އިންޑިއާގެ ފިލްމީ ދާއިރާގެ ގިނަ ބަޔަކު ވަނީ ހިތާމަ ފާޅުކޮށްފައެވެ. އެގޮތުން، އެމަނިކުފާނުގެ ފަހު ޒިޔާރަތުގައި އަމީތާބް ބައްޗަން، އަބިޝެކް ބައްޗަން އަދި އަގަސްތިޔާ ނަންދާ ވެސް ބައިވެރިވިއެވެ.

ދަރްމެންދުރާއަކީ އޭނާގެ ތަބީޢީ ސިފަތަކާއި، ހިތްހެޔޮކަމާއި އަދި ވަރަށް ބޮޑު ސާދާކަމެއްގެ ސަބަބުން މަޝްހޫރުވެފައިވާ ފަންނާނެކެވެ.

ދަރްމެންދުރާގެ އެންމެ މަޝްހޫރު ފިލްމުތަކުގެ ތެރޭގައި ހިމެނޭ ޝޯލޭ ފިލްމުން ފެށިގެން އެކުގައި މަސައްކަތްކުރެއްވި އެކްޓަރު އަމީތާބް ބައްޗަން ވަނީ އޭނާގެ ބްލޮގްގައި ހިތާމަވެރި މެސެޖެއް ލިޔެފައެވެ.

"އަނެއްކާވެސް ހިތްވަރުގަދަ ބޮޑު ފަހުލަވާނެއް އަހަރެމެންނާ ވަކިވެއްޖެއެވެ. އެ މައިދާން ދޫކޮށްލައިފިއެވެ. ނުހަނު ބާރު އަޑަކާއެކު ހިމޭންކަމެއް ފަހަތަށް ދޫކޮށްލައިފިއެވެ... ދަރަމް ޖީ... އެއީ ކިހާ ބޮޑު ނަމޫނާއެއްތޯއެވެ، އެމަނިކުފާނުގެ މަޝްހޫރު ޖިސްމާނީ ބައްޓަމުގެ ސަބަބުން އެކަންޏެއް ނޫނެވެ، އެކަމަކު އެމަނިކުފާނުގެ ހިތްޕުޅުގެ އޯގާތެރިކަމާއި، ސާދާކަމުގެ ސަބަބުންނެވެ. އޭނާ އައިސްފައިވަނީ ޕަންޖާބުގެ ރަށެއްގެ ތަބީޢަތާއެކުގައެވެ، އަދި އޭނާގެ މުޅި ކާމިޔާބު ކެރިއަރުގައި ހުންނެވީ ތަބީޢަތަށް ވަފާތެރިވެ އެވެ... ކޮންމެ ދިހަ އަހަރަކުން ބަދަލުތަކެއް އަންނަ ފިލްމީ ދާއިރާގައި ވެސް އޭނާއަށް ބަދަލެއް ނާދެއެވެ."

ބައްޗަން އިތުރަށް ލިޔުއވާފައިވެއެވެ. "އެމަނިކުފާނުގެ ހިނިތުންވުމާއި، އެމަނިކުފާނުގެ މަޑުމައިތިރިކަން އަދި އެމަނިކުފާނުގެ އިހްސާސްތައް، އެމަނިކުފާނުގެ ކައިރިއަށް އަންނަ ހުރިހާ އެންމެނަށް ވެސް ފޯރިއެވެ... މި މަސައްކަތުގައި ވަރަށް މަދުން ނޫނީ ނުފެންނަ ކަމެކެވެ، އަހަރެމެންގެ ވަށައިގެންވާ ޖައްވު ހުސްވެއްޖެއެވެ، އެއީ އަބަދަށް ހުސްކޮށް އޮންނާނެ ހުސްކަމެކެވެ... ދުޢާ."

ދަރްމެންދުރާގެ ފަހު ޒިޔާރަތުގައި ބައިވެރިވި އެހެން މަޝްހޫރު ފަންނާނުންގެ ތެރޭގައި ޝާހް ރުކް ޚާން، ސަލްމާން ޚާން، އާމިރު ޚާން އަދި ސަންޖޭ ދަތު ހިމެނެއެވެ. އަދި ފަހުން ރޭޚާ، ކާޖޮލް އަދި ޕްރީތީ ޒިންޓާ ވެސް ވަނީ ދިއޯލް އާއިލާއަށް ތަޢުޒިޔާ ކިޔުމަށް ދަރްމެންދުރާގެ ގެއަށް ޒިޔާރަތްކުރައްވާފައެވެ.

ދަރްމެންދުރާ އެންމެ ފަހުން ކުޅުނު ފިލްމަކީ އިއްކީސް (Ikkis) އެވެ. މި ފިލްމުގައި ބައްޗަންގެ ކާފަދަރި އަގަސްތިޔާ ނަންދާ އާއި ޖައިދީޕް އަހްލާވަތު ވެސް ހިމެނެއެވެ. މި ފިލްމު ރިލީޒްކުރުމަށް ހަމަޖެހިފައިވަނީ މި ކްރިސްމަސްގައެވެ.