އާސަންދައިގެ ދަށުން ނުލިބޭ ބޭސްތައް ލިބޭގޮތް ހެދުމުގެ މަސައްކަތްދަނީ ކުރެވެމުން: ހެލްތު މިނިސްޓަރު
އާސަންދައިގެ ދަށުން މިހާރު ނުލިބޭ ބޭސްތައް، އެ ނިޒާމުގެ ތެރެއިން ލިބޭނެ ގޮތް ހެދުމަށްޓަކައި މަސައްކަތްތައް ކުރަމުން އަންނަ ކަމަށް ހެލްތު މިނިސްޓަރު އަބްދުﷲ ނާޒިމް އިބްރާހީމް މިއަދު ރައްޔިތުންގެ މަޖިލީހުގައި ވިދާޅުވެއްޖެއެވެ.
މިނިސްޓަރު މިހެން ވިދާޅުވީ، ގަލޮޅު ދެކުނު ދާއިރާގެ މެންބަރު މީކާއީލް އަހްމަދު ނަސީމް ކުރެއްވި ސުވާލަކަށް ޖަވާބު ދެއްވަމުންނެވެ.
މަޖިލީހުގެ ޖަލްސާގައި މެންބަރު މީކާއީލް ސުވާލުކުރެއްވީ އާސަންދައިން ކުރިން ލިބޭ ބައެއް ބޭސްތައް މިހާރު އެ ނިޒާމުގެ ދަށުން ނުލިބޭ ކަމަށް ބުނެއެވެ. ނަމަވެސް މިނިސްޓަރު ނާޒިމް ވަނީ މީކާއީލްގެ މި ވާހަކަތައް ދޮގުކުރައްވައިފައެވެ.
Ads by BMLމިނިސްޓަރު ނާޒިމް ވިދާޅުވީ، އާސަންދައިން ލިބޭ އެއްވެސް ބޭހެއް ހުއްޓާލާފައި ނުވާނެ ކަމަށާއި، އަދި އާސަންދައިގެ ދަށުން މިހާރު ނުލިބޭ ބޭސްތައް ލިސްޓަށް އިތުރު ކުރުމުގެ މަސައްކަތްތައް ސަރުކާރުން ކުރަމުންދާ ކަމަށެވެ. މީގެ ތެރޭގައި ދުންފަތުގެ އިސްތިއުމާލު ކުރުމުން ދުރުހެލިވުމަށް ބޭނުންވާ ބޭސްފަރުވާއާއި، ރާއްޖޭގައި ފުރަތަމަ ގާއިމްކުރި ފާޓިލިޓީ ސެންޓަރުގެ ހިދުމަތްތައް ހިމެނޭކަން މިނިސްޓަރު ފާހަގަކުރެއްވިއެވެ.
މިސާލަކަށް، ދުންފަތުގެ އިސްތިއުމާލުކުރުން ހުއްޓާލުމަށް ބޭނުންވާ ފަރާތްތަކުގެ ތެރެއިން ކްލިނިކަލީ ބޭސް ބޭނުންވާ ހާލަތްތަކުގައި ދޭންޖެހޭ ބޭސް، އާސަންދައިގެ ނިޒާމުގެ ތެރެއިން މިހާރު ދެވޭނެ އިންތިޒާމު ވަނީ ހަމަޖައްސާފައެވެ. ހަމައެހެންމެ، ފާޓިލިޓީ ސެންޓަރުގެ ހިދުމަތްތައް ވެސް އާސަންދައިގެ ދަށުން ލިބޭނެ އިންތިޒާމު ސަރުކާރުން ވަނީ ގާއިމްކުރައްވައިފައެވެ.
ރައީސް ޑރ. މުހައްމަދު މުއިއްޒުގެ ވައުދުފުޅާ އެއްގޮތަށް ސަރުކާރުން ވަނީ އާސަންދައަށް މިހާރުވެސް ގިނަ ހެޔޮ ބަދަލުތަކެއް ގެނެސްފައެވެ. އޭގެ ތެރޭގައި އާސަންދައިގެ ދަށުން މެޑިކަލް ޗެކަޕް ހެދުމުގެ ފުރުސަތު ފަހިކޮށްދިނުމާއި، ނަފްސާނީ ބަލިތަކަށް ފަރުވާ ހޯދާ ފަރާތްތަކަށް މުޅިން އަލަށް އާސަންދައިގެ ހިދުމަތް ދިނުން ހިމެނެއެވެ.
ކުރުކޮށް ދަންނަވާނަމަ، ހެލްތު މިނިސްޓަރު އަބްދުﷲ ނާޒިމް އިބްރާހީމް ވަނީ އާސަންދައިގެ ދަށުން އެއްވެސް ބޭހެއް ހުއްޓާލާފައި ނުވާކަމަށް ހާމަކުރައްވައި، އަދި ނުލިބޭ ބޭސްތައް ލިސްޓަށް އިތުރުކުރުމުގެ މަސައްކަތްތައް ކުރިޔަށްދާ ކަމުގެ ޔަގީންކަން ދެއްވާފައެވެ. މިގޮތުން، ދުންފަތުގެ އިސްތިއުމާލުކުރުން ހުއްޓާލުމަށް ބޭނުންވާ ބޭސްފަރުވާއާއި ފާޓިލިޓީ ސެންޓަރުގެ ހިދުމަތްތައް އާސަންދައިގެ ދަށުން މިހާރު ލިބޭނެ އިންތިޒާމު ހަމަޖައްސާފައިވާއިރު، ރައީސް މުއިއްޒުގެ ވެރިކަމުގައި މެޑިކަލް ޗެކަޕްތަކާއި ނަފްސާނީ ފަރުވާތައް ވެސް އާސަންދައިގެ ދަށަށް ވަނީ އިތުރުކުރެވިފައެވެ.
Ads by MACL
