މޯލްޑިވިއަންއިން ކެބިން ކުރޫން ހޯދުމަށް ފުޅާ ފުރުސަތެއް ހުޅުވާލައިފި
ރާއްޖޭގެ ޤައުމީ އެއާލައިން މޯލްޑިވިއަންއިން، އެ ކުންފުނީގެ ކެބިން ކުރޫ ޓީމަށް އިތުރު މީހުން ހޯދުމަށް ފުޅާ ފުރުސަތެއް ހުޅުވާލައިފިއެވެ. މި މަޤާމުތަކަށް ޝައުޤުވެރިވާ ފަރާތްތަކަށް ހާއްސަކޮށްގެން ވޯކް-އިން އިންޓަވިއުއެއް އަންނަ ޑިސެމްބަރު މަހުގެ 10 ވަނަ ދުވަހު މާލޭގައި ކުރިއަށްގެންދިއުމަށް ހަމަޖެހިފައިވާ ކަމަށް، މޯލްޑިވިއަން ހިންގާ އައިލެންޑް އޭވިއޭޝަނުން ވަނީ ހާމަކޮށްފައެވެ.
މި ވޯކް-އިން އިންޓަވިއު އޮންނާނީ ޑިސެމްބަރު 10 ވާ ހުކުރު ދުވަހު އެސްޓީއޯ ޓްރެއިނިން ސެންޓަރުގެ ހަތަރުވަނަ ފަންގިފިލާގައެވެ. އިންޓަވިއު ކުރިއަށް ގެންދިއުމަށް ހަމަޖެހިފައިވަނީ ހެނދުނު 9:30 އިން ފެށިގެން މެންދުރުފަހު 2:30 އަށެވެ. ވައިގެ ދަތުރުފަތުރުގެ ދާއިރާއަށް ޝައުޤުވެރިކަން ހުރި، އަދި ދިވެހިރާއްޖޭގެ ރީތި ނަން ހިފެހެއްޓުމަށް ބޭނުންވާ ޒުވާނުންނަށް މިއީ ރަނގަޅު ފުރުސަތެއް ކަމަށް ބެލެވެއެވެ.
ކެބިން ކުރޫގެ މަޤާމަށް ކުރިމަތިލާ ފަރާތްތަކުގެ ކިބައިގައި ހުންނަންޖެހޭ މުހިންމު ޝަރުތުތަކެއް މޯލްޑިވިއަންއިން ވަނީ ކަނޑައަޅާފައެވެ. އެގޮތުން، ވަޒީފާއަށް ހުށަހަޅާ މީހަކީ 18 އަހަރާއި 35 އަހަރާ ދެމެދުގެ އުމުރުގެ މީހަކަށް ވާން ޖެހެއެވެ. މީގެ އިތުރުން، ދިވެހި ބަހާއި އިނގިރޭސި ބަހުން ރަނގަޅަށް ވާހަކަ ދައްކަން އެނގުމަކީ ވެސް މަޤާމަށް ކުރިމަތިލުމުގެ މުހިންމު ޝަރުތެކެވެ.
Ads by BMLތަޢުލީމީ ގޮތުން ބަލާއިރު، އޯލެވެލް ނުވަތަ އެއަށްވުރެ މަތީ ފާހެއް ލިބިފައިވާ ފަރާތްތަކަށް ކުރިމަތިލުމުގެ ފުރުސަތު ވަނީ ހުޅުވާލާފައެވެ. އިސްކޮޅުގެ ޝަރުތުތަކަށް ބަލާއިރު، ފިރިހެނެއް ނަމަ އިސްކޮޅުގައި އެންމެ މަދުވެގެން ފަސް ފޫޓު ހަތަރު އިންޗި ހުންނަން ޖެހޭނެއެވެ. އަންހެނެއް ނަމަ އިސްކޮޅުގައި އެންމެ މަދުވެގެން ފަސް ފޫޓު ދެ އިންޗި ހުންނަން ޖެހޭނެ ކަމަށް ވެސް މޯލްޑިވިއަންގެ އިއުލާންގައި ބަޔާންކޮށްފައިވެއެވެ.
މި ވޯކް-އިން އިންޓަވިއުއަށް ދާއިރު، ޝަރުތު ހަމަވާ ފަރާތްތަކުން މަޤާމަށް ބޭނުންވާ ހުރިހާ ލިޔެކިޔުންތައް ފުރިހަމައަށް ހަމަކޮށްގެން ދިއުމަށް މޯލްޑިވިއަންއިން ވަނީ އިލްތިމާސްކޮށްފައެވެ. ލިޔެކިޔުންތައް ފުރިހަމަ ނުވާނަމަ އިންޓަވިއުއަށް ބައިވެރިނުވެވޭނެކަމަށް ވެސް މޯލްޑިވިއަންއިން ވަނީ ހާމަކޮށްފައެވެ.
މޯލްޑިވިއަންއިން ކެބިން ކުރޫން ހޯދުމަށް ހުޅުވާލި މި ފުރުސަތަކީ ޒުވާނުންނަށް ވައިގެ ދަތުރުފަތުރުގެ ދާއިރާއިން އުފާވެރި މުސްތަޤުބަލެއް ބިނާކުރުމަށް ލިބޭ ރަން ފުރުސަތެކެވެ. ޝަރުތު ހަމަވާ ހުރިހާ ފަރާތްތަކަށް ވެސް އަންނަ މަހުގެ 10 ވަނަ ދުވަހު އިންޓަވިއުއަށް ހާޒިރުވެ، ޤައުމީ އެއާލައިންގެ އުދުހުންތަކުގައި ބައިވެރިވުމުގެ ފުރުސަތު ހޯދުމަށް މޯލްޑިވިއަންއިން ވަނީ ދަޢުވަތު އަރުވާފައެވެ.
Ads by MACL
